Misyungu 11 - Chiyawo Bible

¹ Mpimo wakunyenga ukusiwanyalaya AMBUJE,* nambo mpimo wacilungamo ukusiwasangalasya.

² Naga kupoka kumjinjile mundu, ngakusakaŵilisya kuyicisya yakutesya soni, nambo kulinandiya ni Pasha lundapo.

³ Goloka mtima kwa ŵandu ŵakulungama kukusikwalongolela, nambo kupindika nganisyo kwa ŵandu ŵangakulupicika, kukusikwajonanga.

⁴ Cipanje cangakamucisya kose pa lisiku lya kukutumbilila Mlungu, nambo cilungamo ni cikusamkulupusya mundu ku ciwa.

⁵ Cilungamo ca mundu jwambone cikusamjongolela petala lyakwe, nambo mundu jwakusakala mtima, kukusamgwisya ni kusakala mtima kwakwe peko.

⁶ Kulungama kwa ŵandu ŵaswela mtima kukusikwakulupusya, nambo yindu yakusakala yayikusakumbicika ni ŵandu ŵa unami, yikusiyaŵika mu ukapolo acimsyenewo.

⁷ Naga mundu jwakusakala awile, cikulupi cakwe cikusamala soni, yakusajembeceya ŵandu ŵangakusamjogopaga Mlungu, yikusaŵa yangali mate.

⁸ Ŵandu wakulungama akusakulupusidwa ku yisawusyo, nipo m'malo mwakwe, ŵandu ŵakusakala ni ŵakusagwila mwelemo.

⁹ Mundu jwakumnyosya Mlungu, akusiŵajonanga acimjakwe ni pakamwa pakwe, nambo mundu jwakulungama akusakulupuka kupitila mkumanyilila yindu cenene.

¹⁰ Mlungu pakwapa upile ŵandu ŵakwe, msinda wosope ukusasangalala. Nambo wosope naga akonasika, ŵandu akusagumila mwa lukondwa.

¹¹ Kupitila mu upile wakusapocela ŵandu ŵakulungama, musi ukusakwela, nambo pakamwa pa ŵandu ŵakusakala mtima pakusapasula musiwo.

¹² Mundu jwakumnyosya mjakwe, jwangali lunda, nambo mundu jwakumanyilila akusawugala pakamwa pakwe.

¹³ Jwa unami akusajuwula ya asili. Nambo jwa mtima wakulupicika, akusasunga pakamwa pakwe.

¹⁴ Pakusoŵa lunda lwakulongolela, musi ukusagwa; nambo papatupile acimkamusi pakusaŵa mtendele.

¹⁵ Jwakumpelecela cikole mundu jwa cilendo tacilipweteka msyene, nambo jwakuŵengana ni ya cikole taciŵa pa mtendele.

¹⁶ Jwamkongwe jwa ndamo jambone akusapocela ucimbicimbi, nambo acalume ŵangalwe akusagambaga kupata cipanjepe basi.

¹⁷ Mundu akulitendela msyene yambone pa umi wakwe pakuŵa jwa canasa, nambo mundu jwangalwe akusalipweteka msyene.

¹⁸ Mundu jwakusakala akusapocela malipilo gacabecabepe, nambo mundu jwakutenda yacilungamo akusapocela mbote jisyesyene.

¹⁹ Mundu jwakusalimbicila ya cilungamo tacikola umi, nambo mundu jwakusawutucila yakusakala taciwa.

²⁰ Ŵandu ŵakusakala mtima AMBUJE akusiŵanyalaya, nambo ŵandu ŵa ndamo jambone akusiŵasangalasyaga AMBUJE.

²¹ Yisyene nditu, ŵandu ŵakusakala ngisicakulusya cilango ca Mlungu, nambo ŵandu ŵali ŵa cilungamo tacikulupuka.

²² Kusalala kwa jwamkongwe jwangali lunda soni jwamkamwa, kuli mpela cipini ca golidi* pa lupula lwa liguluŵe.

²³ Yindu yakusayikumbila ŵandu ŵambone yikusiyamalila cenene, nambo yakusayijembeceya ŵandu ŵakusakala yikusamala ni kutumbilisya Mlungu.

²⁴ Apali ŵandu ŵakusagamba kupeleka, ni kwambaga kusicililape, ni apali ŵane ŵakusuka cakaŵajilwe kupeleka ni kwambaga kulagape.

²⁵ Mundu jwakupeleka tacisicila, jwakwakamucisya acimjakwe nombe najo tacipocela cikamucisyo.

²⁶ Ŵandu akusamlwesa mundu jwakusiŵajima acimjakwe yakulya, nambo upile tiwuciŵa pa mundu jwa canasa jwakwete lisosa lyakusumisya yakulyayo.

²⁷ Mundu jwakusalimbicila kusosasosa yambone, akusasosa upile, nambo mundu jwakusayisosasosa yakusakala tiyicimsimana.

²⁸ Mundu jwalijose jwakulupilila cipanje cakwe tacigwa, nambo ŵandu ŵakulupilila Mlungu tacisipucila mpela lisamba lyeŵisi.

²⁹ Mundu jwakwasawusya ŵa mwiŵasa lyakwe tacilaga, nipo cisilu ticiciŵa kapolo jwa mundu jwalunda.

³⁰ Cisogosi ca ŵakulungama cili citela ca umi, soni mundu jwakwete luŵilango lwakujipitikusya mitima ja ŵandu, jwana lunda.

³¹ Naga ŵakulungama akusapocela mbote mwakuŵajilwa ni yitendo yawo pa cilambo capasi pano, uli nambi kwa ŵandu ŵakusakala ni ŵa ulemwa?*