Misyungu 10 - Chiyawo Bible

Misyungu jakulekanganalekangana ja Solomoni

¹ Aji ni misyungu ja Solomoni: Mwanace jwalunda akusiŵasangalasya babagwe, nambo mwanace jwakuloŵela akusiŵatesya canasa mamagwe.

² Cipanje cakupata mwawiyi, cangatamilisya, nambo cilungamo cikusamkulupusya mundu ku ciwa.

³ AMBUJE* ŵangakunda kuti mundu jwambone atameje ni sala, nambo yindu yakusayikumbila mundu jwakusakala, Mlungu ngakusamkunda kuti ayipate.

⁴ Ulesi ukusamgwicisya mundu m'yisawusyo ya ulanda, nambo makono gakulilimbicila, gakusamsicilisya mundu.

⁵ Mwanace jwakugungula yakulya ndaŵi ja cawu ali mwanace jwalunda, nambo mwanace jwagambaga gona ndaŵi jagungula, ali mwanace jwakutesya soni.

⁶ Mundu jwambone tacipocela upile wa Mlungu, nambo pakamwa pa mundu jwakusakala pakusasisa yandewo.

⁷ Mundu jwambone, acimjakwe tacimkumbucila ni mitima jakusangalala, ngasaliŵalicika, nambo lina lya mundu jwakusakala, tiyicimala mpela cindu cewole.

⁸ Mundu jwa mtima wa lunda, akusasamalila malamusi, nambo cisilu cikusagamba kuŵecetesya, ticicijonasika.

⁹ Mundu jwakwenda mwakulupicika, akusajenda mwangatojimatojima, nambo jwakwenda matala gakusakala tacimanyika.

¹⁰ Mundu jwakumsisinila meso mwakunyenga, akusayicisya yisawusyo, jwakwamuka mwakulimba mtima, akusayicisya mtendele.

¹¹ Pakamwa pa mundu jwambone ni uliŵa wa umi, nambo pakamwa pa mundu jwakusakala pakusasisa yandewo.

¹² Uŵengani ukusatandisya njojo, nambo cinonyelo cikusasilila yakulemwa yosope.

¹³ Pakamwa pa mundu jwa umanyilisi pakusakopoka ya lunda, nambo cikoti ngasicityoka pa mgongo pa ŵandu ŵakuloŵela.

¹⁴ Ŵandu ŵalunda akusasunga umanyilisi, nambo pakamwa pa mundu jwakuloŵela pakusajonanga mwangakaŵilisya.

¹⁵ Cipanje cikusicacijila ŵandu ŵakusicila nambo usawuci ukusiwajonanga ŵandu ŵakulaga.

¹⁶ Malipilo ga ŵandu wakutenda yambone ni umi, nambo mbote ja ŵandu ŵakutenda yakusakala jikusagambaga konjecesya ulemwa wine.

¹⁷ Ŵandu ŵakusapikanila pakwajamuka akulosya kuti akwenda mwitala lya umi, nambo mundu jwakukana kumjamuka akusasokonecela.

¹⁸ Mundu jwakusisa uŵengani akwete ngomo sya unami, soni mundu jwakusajenesya ya unami ali jwakuloŵela.

¹⁹ Mkutupa kwa maloŵe, ngaŵa mkusoŵa yakulemweceka, nambo mundu jwakutaŵa pakamwa ni jwalunda.

²⁰ Maloŵe ga mundu jwakutenda yambone gali mpela silifa* jwambone mnope, nambo nganisyo sya mundu jwakusakala sili syacabecabe.

²¹ Maloŵe ga mundu jwambone gakusigakamucisya ŵandu ŵajinji, nambo yisilu yikusala ligongo lya ungali lunda.

²² Upile wa AMBUJE ni wukusamsicilisya mundu, macili ga mundu pajikajikape ngaŵa mkonjecesya kandu.

²³ Mundu jwakuloŵela akusasangalala pakutenda yindu yakusakala nambo kwa mundu jwakupikanicisya cenene yindu, kutenda yindu ya lunda ni kukusampa mundu lukondwa.

²⁴ Cakusacijogopa mundu jwakusakala ticicimgwila, nambo yakusayikumbila mundu jwambone taciyipata.

²⁵ Mbungo jamacili naga jipujile, jikusijapyajila ŵandu ŵakusakala, nambo ŵandu ŵambone tacitamilicika mpaka kalakala.

²⁶ Kasimumtuma mundu jwaulesi kuti amtendele tusengo twine twakwe; tacimsakalisya mpela yila mwakusatendela mkamwa finyo jwamcesuce, soni mpela mulikusatendela lyosi m'meso.

²⁷ Kwajogopa AMBUJE kusalewuya umi wa mundu, nambo yaka ya ŵandu ŵakusakala tiyicinandipa.

²⁸ Yakusayijembeceya ŵandu ŵambone kuti yitendekwe yikusayicisya lukondwa, nambo yakusayijembeceya ŵandu ŵakusakala yikusawila m'mandanda.

²⁹ AMBUJE ni ŵakusiŵacinga ŵandu ŵambone, nambo ŵandu ŵakusakala, akusiŵajonanga.

³⁰ Ŵandu ŵambone ngasiŵatyosya pa malo gawo, nambo ŵandu ŵakusakala ngasatamilicika pa cilambo.

³¹ Pakamwa pa ŵandu ŵakutenda yambone pakusakopoka ya lunda, nambo lulumi lwangaŵeceta yagoloka tacilukata.

³² Ngomo sya ŵandu ŵambone sikusamanyilila yakuŵajilwa kuŵeceta, nambo pakamwa pa ŵandu ŵakusakala, pangamanyilila yakwenela kuŵeceta.