Misyungu 1 - Chiyawo Bible

Umbone wa Misyungu

¹ Aji ni misyungu ja Solomoni, mwanace jwa Daudi,* mwenye jwa cilambo ca Isalaeli.

² Misyunguji jili jakwakamucisya ŵandu kuti amanyilile lunda ni majiganyo, kuti apikanicisye cenene ngopolelo syakusokoka,

³ kuti alijiganye ndamo ja kutenda yindu mwa lunda ni kuti aŵe ŵakulupicika, ŵacilungamo ni ŵangali lusagu.

⁴ Jikwakamucisya soni kuti ŵandu wamba apate lunda kuŵa ŵakalamuka ni kwajiganya acacanda kuyimanyilila yindu ni kuyimulika cenene,

⁵ kuti mundu jwalunda naga akujipikana jele misyunguji, ajonjecesye kulijiganya kwakwe nambo soni kuti mundu jwakupikanicisya yindu cenene, apate umanyilisi,

⁶ nambo soni kuti apikanicisyeje ngopolelo syakusisika sya misyungu ni maloŵe ga ŵandu ŵalunda.

Kwatetela acacanda

⁷ Kwajogopa AMBUJE jili ndande ja lunda, ŵakuloŵela akusalunyosya lunda soni akusaganyosa malamusi.

⁸ Mwanangu, mpikanile yakumtetela baba ŵenu, soni mkasimkana yakumjiganya mama ŵenu.

⁹ Ligongo majiganyo gawo tigamkamucisye kusalalisya ndamo jenu mpela yacikusatendela cisoti cakusalala ku mtwe kwenu, soni cuma ca mlukosi mwenu.

¹⁰ Mwanangu naga ŵandu ŵa ulemwa ali mkusaka kumlemwekasya, mkasimwapikanila.

¹¹ Naga ajile, “Myice akuno, tukajuŵilile ŵandu kuti twawulaje, kwende tukaswambe ŵandu ŵangalemwa.

¹² Atamose twasimane ali ŵacijumi ni umi wambone, kwende twamile ŵambumbu mpela yigakusati malembe pakwamila ŵandu.

¹³ Tucipata yindu yejinji ya mtengo wapenani, ni tucigumbasya jwele katunduju m'majumba getu.

¹⁴ Myice mjinjile mwikuga lyetu, ni tucigaŵana cipanje cetu.”

¹⁵ Mwanangu, kasimjendaga nawo ŵandu ŵamti myoyo, mlitalikanganye mwasyene kwa jemanjajo.

¹⁶ Pakuti jemanjajo ŵangakaŵa kutenda yakusakala, akusaŵaga ali cile kuwutucila ya kuwulaga basi.

¹⁷ Yangakamucisya kose kutega lwawu kutendaga cijuni ciwukucisosa kucitanjisya cili mkulola.

¹⁸ Nambo ŵandu ŵeleŵa akusagambaga kulitega acimsyene, mwelemo ni mucili ciwa cawo.

¹⁹ Jeleji ni mbesi ja umi wa ŵandu ŵaciswamba ŵakusapata yipanje mwa ngondo. Cipanjeco cikusicawulaga acimsyenepewo ŵakusacisonganya.

Lunda lukwatetela ŵandu

²⁰ Ajile jii apikane! Lunda lukugumila, kuŵilanga m'misewu ni m'misika.

²¹ Lukuŵilanga myipata yakwinjilila m'misinda ni m'malo gosope gakusonganila ŵandu.

²² Lundalo lukugumila kuti, “Jemanja ŵandu ŵakuloŵela! Ana mkusaka kuŵa ŵakuloŵela mpaka cakaci? Ana timŵe mlikulung'andila lunda mpaka cakaci? Ana timcilijiganya cakaci?

²³ Mpikanile pangumkalamusya; tinampe msyungu wambone soni tinam'manyisye lunda lwangu.

²⁴ Mbele ndili kumŵilanga m'mwejo, kumŵilanga kuti myice, nambo nganimpikanaga. Nganimungosya kose pinamŵilangaga.

²⁵ Mwawunyosisye msyungu wangu, soni nganimsaka kuti namjamuce atamose panandi.

²⁶ Ni naga msimane ni yisawusyo, tinjimseka. Tinjimnyosya payiticimyicilila yisawusyo.

²⁷ Payiticimyicilila yisawusyo mpela litumbela, patilicimyicilila likungu lyamti mpela cimbunga. Patiwucimsimana ulanda ni yisawusyo.

²⁸ Pelepo timcimbilanga une lunda, nambo ngasinimjanga. Timcisosa kulikose, nambo ngasimumbata.

²⁹ Ligongo mwaŵengene nalo lunda nambo soni nganimwajogopa AMBUJE.

³⁰ Nganimsaka kuwupikanila msyungu wangu soni mwakunyosisye kwamuka kwangu.

³¹ Ni sambano timcilya yisogosi ya masengo genugo, timcilwala nayo yakusakala yimteje mwatendele ŵandu ŵane.

³² Ŵandu ŵakuloŵela akusawulajidwa ligongo lya kungapukana kwawo. Yisilu yikusalijonanga yisyenepe ligongo lya kulikwesya kwawo.

³³ Nambo jwele jwakusambikanila une, taciŵa pambone, tacitama mwa mtendele, ngajogopa cakusakala cilicose.”