Mika 6 - Chiyawo Bible

Isalaeli jwajamucidwe ligongo lya ulemwa wa ŵandu ŵakwe

¹ Mpikane sambano yele yakuŵeceta AMBUJE. Mjimuce AMBUJE, mlongosole pameso pa matumbi niyikwesya yipikane magambo genu.

² Mpikane maloŵe ga AMBUJE, jemanja matumbi ni jemanja yilimbilimbi ya mpaka kalakala ya cilambo capasi. AMBUJE akwajimba magambo ŵandu ŵakwe, akusisyana ni Aisalaeli.

³ AMBUJE akuŵeceta kuti, “Jemanja ŵandu ŵangu, ana ndesile cici kwa jemanja? Ana nimpesisye ni cici? Munjanje.

⁴ Paja unetu namkopwesye ku cilambo ca Iguputo. Namwombwele ku cilambo ca ukapolo. Mwakuti natesile kwatuma Mose,* Aloni* ni Miliyamu kuti amlongolele.

⁵ Jemanja ŵandu ŵangu, mkumbucile yiŵasosile Balaki mwenye jwa ku Mowabu kumtendela, nambo soni Balamu mwanace jwa Bewoli muŵamjanjile. Mkumbucile yiyatendekwe pa ulendo wakutyoka ku Shitimu kuja ku Giligala. Mkumbucile yosope yeneyi kuti m'manyilile yele une AMBUJE yinatesile pakusosa kumkulupusya.”

Yakusosa AMBUJE

⁶ Ana njigale cici kuti ngayice pameso pa AMBUJE, kuti ngamlambile Mlungu jwakwinani? Ana njigale ŵanace ŵa ng'ombe ŵa caka cimo kuti mbelece mbopesi jakutinisya?

⁷ Ana AMBUJE tacisangalala ni ngondolo sya mikambako macila macila kapena sulo sya mawuta ga olifi* macila likumi kwisa soni likumi. Ana tinjipeleka mwanace jwangu jwandanda kupagwa ligongo lya ulemwa* wangu? Ana mwanace jwangu taŵe mbopesi jakulipila ulemwa wangu?

⁸ Iyayi, AMBUJE ŵamlosisye kala, m'mwe mundu, cicili cambone. Yakusaka jwalakwejo kuti uwe tuyitendeje ni ayi: kutenda yayili yakulungamika, kulosya cinonyelo ni kutama mwakulinondiya pameso pa Mlungu jwenu.

⁹ Luli lunda kwajogopa AMBUJE. Akuwusalila msinda wa Yelusalemu kuti, “Mpikane jemanja wosope ŵakutama mu msinda awuno.

¹⁰ Ana une mpaka ndiŵalile yipanje yayili m'nyumba sya ŵandu ŵakusakala, yiŵayipatile mwa unami, nambo soni mpimo wangakwanila wele uli welwesece?

¹¹ Ana mpaka nimkululucile uli mundu jwakwete sikelo syakwajiŵila acimjawo nambo soni mipimo jakunyenga?

¹² Ŵandu ŵakusicila akusatenda ya ngondo. Ŵandu wosope ali ŵakutama mwelemo ali ŵa unami akusagamba kutamila kuŵeceta ya unami.

¹³ Ali ni ligongo lyakwe ndandite kumlagasya ni kumjonaga ligongo lya ulemwa wenu.

¹⁴ Timcilya nambo ngisimjikuta. Sala ngisijimtyoka. Timcisonganya yindu nambo ngisiyisunjika. Yele yitimcisungayi tiyicijonanjidwa pa ngondo.

¹⁵ Timcipanda nambo ngisimgowola. Timcijenga mawuta ga olifi nambo ngisimkamulisya masengo. Timciminya mipeleya nambo finyo jwakwe ngisim'mwa.

¹⁶ Msunjile ndamo jakusakala ja Mwenye Omuli ni yitendo yosope ya mwiŵasa lya Ahabu. Mkuyisye matala gawo gosope. Myoyo tinjimjonanga kwakumalilatu nipo jwalijose tacimnyodola. Kulikose ŵandu tacimnyosya.”