Mika 4 - Chiyawo Bible

Kulamula kwa AMBUJE kwa mtendele palipose

¹ Masiku gakwisaga petumbi pajili Nyumba ja AMBUJE tacilitenda kuŵa lyelewu kupunda matumbi gane gosope. Tilicigamba kuŵa njoo penani pa matumbi gosope. Mitundu josope ja ŵandu tijiciwutucila kweleko.

² Ŵandu ŵa mitundu jejinji taciyika ni tacijila kuti, “Kwende tukwele Kwitumbi lya AMBUJE, ku Nyumba ja AMBUJE jwa Yakobo,* ni tacitujiganya matala gakwe, uwe ni tujendeje m'matala gakwemo. Pakuti ku Siyoni* ni kuticikutyocela misyungu jakwejo. Ku Yelusalemu ni kuticikutyocela maloŵe ga AMBUJE.”

³ Jwalakwejo tacilamula magambo pasikati pa mitundu jejinji ja ŵandu, tacimasya kungapikanganana pasikati pa ngosyo sya ŵandu atamose sisili kutali; Ŵanduwo tacisyana mawupanga gawo kuti gaŵe majela, soni mipamba jawo kuti jiŵe yipula yakutengulila nyambi; Mtundu wine ngisiwumenyana ni ujakwe, soni ngisiwuliŵicila cile kuputa soni ngondo.

⁴ Jwalijose tacitama mu mtendele pasikati pa mgunda wakwe wa mipeleya ni nguju, soni pangali jutacajogoya. AMBUJE Ŵamaciligosope aŵecete yeleyi.

⁵ Mitundu josope ja ŵandu jikusalambila ni kumpikanila mlungu jwawo, nambo uwe tucilambila ni kwapikanila AMBUJE Mlungu jwetu mpaka kalakala.

Aisalaeli taciwujila kumangwawo kutyocela ku ukapolo

⁶ AMBUJE akuti, “Ndaŵi jikwisa jitinjasonganya pampepe ŵandu ŵinapele cilango, ŵele ŵalasile mnope ku ukapolo.

⁷ Jemanjajo alemele soni ali kwakutalikangana ni kumangwawo, nambo tinjitenda ndande jasambano ni ŵele ŵasigalile, nipo taciŵa mtundu wekulungwa. Tinjalamulila jemanjajo Petumbi lya Siyoni kutyocela ndaŵi jelejo mpaka kalakala.”

⁸ Sambano m'mwe Yelusalemu, kwele Mlungu ali mpela mkucinga, akwalolela ŵandu ŵakwe wosope, timciŵa soni likulungwa lya ucimwene wele uwaliji wenu.

⁹ Ana ligongo cici mkulila mwakwesya maloŵe camti myiyi? Ana ligongo cici mkulaga mpela jwamkongwe pa ndaŵi jakwe jakuŵeleka mwanace? Ana ni ligongo lyakuti nginimkola mwenye, nambo soni kuti nduna syenu siwile?

¹⁰ Mgalagate ni kuwuwula jemanja ŵandu ŵa ku Siyoni, mpela jwamkongwe pa ndaŵi jakuŵeleka mwanace, pakuti sambano mkwenela kutyoka mu msinda ni kuja kutama kwitinji kwangali majumba. Tacimtyosya kuja ku Babiloni,* nambope kweleko timcikulupusidwa, AMBUJE tacimwombola kwa amagongo ŵenu.

¹¹ Mitundu jejinji jisongene kuti jimenyane ni m'mwejo Siyoni. Jikuŵeceta kuti, “Kwende twasakasye, tulole kumala kwakwe kwa msinda wa Siyoniwu.”

¹² Nambo mitundu jeleji ngajikusimanyilila nganisyo sya AMBUJE. Ngakumanyilila kuti jwalakwejo ŵawunjice mpela matita ga tiligu pa malo gakupwagulila.

¹³ AMBUJE akuŵeceta kuti, “Jemanja ŵandu ŵa ku Yelusalemu, mjawule mkapelece cilango kwa amagongo ŵenu! Tinimtende jemanja kuŵa ŵakulimbangana mpela ng'ombe jamkambako jajikwete yiboda ya cisyano ca bulonsi ni misengo ja cisyano cakolanjidwa ayiloni. Timcitusulanya mitundu jejinji ja ŵandu, yiŵapindwile jemanjajo, m'mwejo timcija kuyipeleka kwa AMBUJE, yipanje yawo timcija kuyipeleka kwa AMBUJE ŵa cilambo cosope capasi.”