Mika 3 - Chiyawo Bible

Mika akwajamuka acimlongola ŵa msinda wa Yelusalemu

¹ Une natite, mpikane jemanja acimlongola ŵa Isalaeli. Ana ngaŵaga jemanja ni ŵimkwenela kumanyilila cilungamo?

² Mkusaŵengana ni yindu yayili yambone, ni kunonyelaga yayili yakusakala. Ŵandu ŵangu mkusimwakusa lipende ali cijumi, ni kunupula mnowu wawo kutyocela ku maupa gawo.

³ Mkusimundila ŵandu ŵangu, pakutenda mpela kuti mkusimwakusa lipende, kukasanya maupa gawo, ni kwakatanyila mu mpika mpela nyama.

⁴ Ndaŵi jikwisa pitimcililila kwa AMBUJE nambo ngisamjanga. Ndaŵi jelejo tacimlosya ndungu ligongo lyakuti masengo genu gali gakusakala.

⁵ AMBUJE akuŵeceta kuti: “Pana ŵakulocesya ŵakusiŵasokonesya ŵandu ŵangu: akusiŵalocesyela ya mtendele kwa ŵele ŵakusiŵalisya jemanjajo, nambo kwa ŵele ŵangali cakwapa jemanjajo, akusiŵalocesyela ngondo.”

⁶ Sambano AMBUJE akuŵeceta kuti, “Ali ni ligongo lyakwe sambano ngisimwona soni yindu kupitila m'mesomkulola, ngisimlocesya soni. Jemanja ŵakulocesya kumswelele, cipi cimyicilile.”

⁷ Ŵakusala yitiyicitendekwa msogolo tacitesyedwa soni, ŵakulondola yisango tacatesya soni. Wosope tacigamba kamula pakamwa kusoŵa cakuŵeceta, ligongo lyakuti Mlungu ngakwajanga jemanjajo.

⁸ Nambo une, AMBUJE angumbesye ni macili, angumbesye ni msimu wakwe. Angumbesye ni kulungamika ni kulimba mtima, kuti najamuce ŵa mwiŵasa lya Yakobo* ligongo lya yakulemwa yenu, kuti nalosye Aisalaeli ulemwa* wawo.

⁹ Mpikane ayi jemanja acimlongola ŵa liŵasa lya Yakobo, jemanja ŵakulamulila liŵasa lya Isalaeli. Jemanja mkusaŵengana ni yindu ayo yayili yakulungama, mkusayipinda yindu yayili yakuwona kuti yiŵe yakulemweceka.

¹⁰ Mkutaŵa msinda wa Mlungu wa Yelusalemu pakukamulisya masengo yipanje yakuyipata pakuwulaga ŵandu ni ungatenda cilungamo.

¹¹ Acimlongola ŵakwe ŵangalamula magambo pali pangali cakupocela capacisyepela, ŵakutaga mbopesi ŵakwe ŵangajiganya pali pangali malipilo, ŵakulocesya ŵakwe ŵangalocesya naga pali pangali mbiya. Nambo akusajegamila pa AMBUJE ni kuŵeceta kuti, “Ana eti paja AMBUJE ali pasikati petu? Pangali cakusakala ca mpaka citugwile.”

¹² Myoyo, ligongo lya jemanja msinda wa Siyoni* tiwucitipulidwa mpela litimbe, Yelusalemu taciŵa masame, nipo litumbi lya Nyumba ja AMBUJE ni tiliciŵa ukweti.