Mika 2 - Chiyawo Bible

Cilango kwa ŵandu ŵakwalagasya acimjawo

¹ Likungu kwa ŵandu ŵakusaliŵicila cile kutenda ya ciswamba. Pamti kucele, naga akwete lipesa, akusatenda yakusakala asacile naga kutenda.

² Akusasumula migunda kapena majumba naga agakumbile. Akusamlagasya mundu ni liŵasa lyakwe ni kumsumula yosope yakwete.

³ Myoyo AMBUJE akuŵeceta kuti, “Tinjiyika ni likungu pa jemanja mwakuti ngisimpakombola kutila. Timsimanikwe mwacimsyene mli mu yipwetesi nipo ngisimjenda soni mwakulapwa ligongo lyakuti ndaŵi jelejo tijiciŵa jakogoya.

⁴ Ndaŵi jelejo pitijiciyika, ŵandu tacikamulisya masengo ngani jenu pakumnyosya jemanja. Tacimjimbila nyimbo ja maliloji: “Nginitujonasika kwakumalilatu! Ligongo cici akusaka kutusumula cilambo ciŵatupele kala. Migunda jetu ajigaŵile kwa ŵatukamwile ukapolo.”

⁵ Sambano pa ndaŵi jele AMBUJE jitaciwucisya cilambo kwa ŵandu ŵakwe jemanja ngisimpocela mbuwa jilijose.

⁶ Ŵandu akusasalila kuti, “Mkatulalicila, mundu jwalijose akalalika yeleyi. Mlungu ngasatutesya soni uweji.

⁷ Ana yeleyi yili yakwenela kuyiŵeceta jemanja ŵa mwiŵasa lya Yakobo?* Ana kululuka kwa AMBUJE kumasile? Ana yeleyi ni yiŵatesile? Ana maloŵe gakwe ngigayikasya yambone kwa mundu jwakwenda mwa kulungamika?”

⁸ AMBUJE akuti, “Jemanja mkusimwajimucila ŵandu ŵangu mpela m'magongo. Mkusimwawula mkanjo ŵandu ŵa mtendele, ŵele ŵakusagamba kwenda ni mtima wakutulala, ngaganisya ya ngondo.

⁹ Mkusimwakoposya acakongwe ŵa ŵandu ŵangu m'nyumba syawo syambone. Ŵanace ŵawo mkusimwasumula upile wangu.

¹⁰ Mnyakuce, mtyoce, pakuti agano ngaŵa malo gakupumulila. Ulemwa* wenu usakesye malo agano.

¹¹ “Ŵandu ŵeleŵa akusaka jwakulalicila jwagambaga kwawula aku nakuku kulalicila ya unami acitiji kuti, ‘Ngulocesya kuti tikuciŵa finyo ni yakumwa ya ukali yejinji.’ Jwakulalicila jwamti myiyiju ni jwele ŵandu jwampaka amnonyele.

¹² “Nambo jemanja wosope ŵa mwiŵasa lya Yakobo, tinjimsonganya pamo mpela mkucinga mwakusasonganyicisya pamo ngondolo. Malogo tigacigumbala ni ŵandu ŵajinji.”

¹³ Mlungu tacawugulila jemanjajo litala ni kwakoposya mu ukapolo. Wosope tacitemanya yipata ya msinda ni kutila. AMBUJE taciŵa pasogolo pa jemanjajo.