Matayo 9 - Chiyawo Bible

Yesu ŵaposisye mundu jwamlemale yiŵalo

¹ Yesu* ŵajinjile mwiboti ni komboka nyasa, nipo ŵayice ku msinda wakumangwawo.

² Kweleko ŵandu ŵane ŵayice najo mundu jwamlemale yiŵalo ali agonile pa macila. Yesu pakuciwona cikulupi cawo, ŵamsalile mundu jwamlemalejo kuti, “Limbani mtima mwanangu, ulemwa* wenu ukululucidwe.”

³ Kaneko aciŵalimu ŵane ŵa Malamusi giŵalembile Mose* ŵatandite kuganisya m'mitima mwawo kuti, “Mundu jweleju akunyosya Mlungu.”

⁴ Nambo Yesu ŵayimanyi yiŵaganisyaga jemanjajo nipo jwalakwe ŵawusisye kuti, “Ligongo cici mkuganisya yindu yakusakala m'mitima mwenu?

⁵ Ana cangasawusya ni capi, kusala mundu kuti ‘Ulemwa wenu ukululucidwe,’ kapena kusala kuti, ‘Mjimuce ni mtande kwenda?’

⁶ Tinamlosye jemanja kuti Mwanace jwa Mundu* akwete ulamusi pacilambo capasi pano wakululucila ulemwa.” Papopo ŵamsalile mundu jwamlemale yiŵalo jula kuti, “Mjimuce, mjigale macila genu, mjawuleje kumangwenu.”

⁷ Mundu jula jwajimwice ni kwawulaga kumangwakwe.

⁸ Ŵandu wosope ŵala piŵayiweni yeleyi, wakamwile woga, ni ŵamlumbile Mlungu pakwapa ŵandu ulamusi wamti myiyi.

Yesu akumŵilanga Mateyu

⁹ Yesu ŵatyosile kumalo gala, nipo piŵaliji mkwenda, ŵam'weni mundu jwine, lina lyakwe Mateyu,* ali atemi m'nyumba ja kukomecesya msongo. Yesu ŵamsalile jwalakwejo kuti, “Munguye une.” Jwalakwejo jwajimwice ni ŵamkuyisye.

¹⁰ Yesu piŵalyaga yakulya m'nyumba ja Mateyu, ŵandu ŵajinji ŵakomesya msongo ni ŵane soni ŵa ulemwa, ŵayice kukulya nawo pamo Yesujo ni ŵakulijiganya* ŵakwe.

¹¹ Afalisi* ŵane piŵayiweni yeleyi, ŵawusisye ŵakulijiganya ŵa Yesu kuti, “Ligongo cici mwalimu jwenu akulya pampepe ni ŵakomesya msongo soni ni ŵandu ŵa ulemwa.”

¹² Nipo Yesu piŵapikene gele maloŵego, ŵajanjile kuti, “Ŵandu ŵangakulwala ŵangamsosa jwa mtela, nambo awo pewo ŵele ŵakulwala.

¹³ Mjawule mkalijiganye gopolela kwa maloŵe ga Mlungu gala gagakuti, ‘Ngusasaka canasa, ngaŵa mbopesi.’ Pakuti nganiyicila kukwaŵilanga ŵandu ŵakulungama nambo ŵandu ŵa ulemwa.”

Ŵandu ŵawusisye ya kulijima kulya

¹⁴ Kaneko ŵakulijiganya ŵa Yohane* M'batisi ŵayice kwa Yesu ni ŵamwusisye kuti, “Ana uli uwe pamo ni Afalisi tukusalijima yakulya kaŵilikaŵili, kutendaga ŵakulijiganya ŵenu ngakusalijima kose?”

¹⁵ Yesu ŵajanjile jemanjajo pakwawusya kuti, “Ana ŵaŵilanjidwe ku cindimba ca ulombela mpaka akombolece kulijima yakulya pa ndaŵi jali ni mlombela? Yangakomboleka! Nambo pitijiciyika ndaŵi jitacatyocesya mlombelajo. Ndaŵi jelejo ni jitacilijima yakulya.”

¹⁶ “Pangali mundu jwakujigala cigamba ca nguwo jasambano ni kucitotelela pa cakuwala ca kalakala. Naga akutenda myoyo, cigamba ca nguwo ja sambano cila cikusakwinyata nipo cikusanyocola cakuwala cakala, soni kupapuka kwakwe kukusaŵaga kwekulungwa kulekangana ni pandanda.

¹⁷ Soni pangali mundu jwakusataga finyo jwasambano mu misaku ja mapende gakalakala, ligongo naga akutenda myoyo, misaku ja mapendejo tijiwulice, finyowo tiwujasicile pasi, soni misakujo tijijonasice. Nambo finyo jwasambano jukwenela kutajidwa mu misaku ja sambano, myoyo yosope yiŵili tiyisunjice cenene.”

Mwanace jwamkongwe jwa jwamkulungwa jwa Ciyuda ni jwamkongwe juŵakwayiye cakuwala ca Yesu

¹⁸ Yesu piŵaŵecetaga yeleyi, jwamkulungwa jwine jwa nyumba ja mapopelo ŵayice kwa jwalakwe ni ŵatindiŵele pameso pakwe acitiji, “Ambuje, mwanangu jwamkongwe awile pangakaŵapa. Conde ayice kuti amsajice magasa kuti akole soni umi.”

¹⁹ Papopo Yesu ŵanyakwice ni ŵamkuyisye jwalakwejo pampepe ni ŵakulijiganya ŵakwe.

²⁰ Sambano ŵapali jwamkongwe jwine juŵaliji mkulwala ulwele wa ku mwesi kwa yaka likumi ni yiŵili. Jwalakweju ŵayice pakupitila cakunyuma kwa Yesu, ni ŵakwayiye lujenje lwa cakuwala ca Yesu.

²¹ Jwalakweju ŵaganisyaga mu mtima mwakwe kuti, “Naga ngumkwaya Yesu, atamose yakuwala yakwe peyo, une timbole.”

²² Pelepo Yesu ŵagalawice, ni ŵam'weni jwamkongwejo, nipo ŵatite, “Mkadandawula mwanangu, cikulupi cenu cimposisye.” Ndaŵi jijojo jwamkongwe jula jwaposile.

²³ Kaneko Yesu piŵajile ku nyumba ja jwamkulungwa jula, ŵasimene ŵandu ŵakwimba yitolilo, nipo soni ŵandu ŵajinji acililaga malilo.

²⁴ Jwalakwe ŵasalile kuti, “Mkopokangane wosope! Pakuti mwanaceju nganawa agambile kugona lugono basi.” Papopo ŵanduwo ŵatandite kumseka mwakumnyosya.

²⁵ Nambo piŵakopwesye wosopewo, Yesu ŵajinjile kucipinda kujwaliji mwanace kula, kaneko ŵamkamwile pamkono, nipo jwajimwice.

²⁶ Nganiji jajenele mbali josope ja cele cilamboco.

Yesu ŵaposisye ŵandu ŵaŵili ŵangalola

²⁷ Piŵatyokaga Yesu kweleko, ŵandu ŵaŵili ŵangalola ŵamkuyisye jwalakwejo. Ŵaliji mgumila kuti, “Ŵalakwe Mwanace jwa Daudi,* atutendele canasa.”

²⁸ Yesu piŵajinjile m'nyumba, ŵandu ŵangalola ŵala ŵayice kwa jwalakwe, jwalakwe ni ŵawusisye kuti, “Ana mkukulupilila kuti mpaka ngombole kumposya?” Jemanjajo ŵatite, “Elo, Ambuje.”

²⁹ Yesu ni ŵakwayiye meso ga jemanjajo acitiji, “Yimtendecele mpelaga yimtite pakulupilila kwenu.”

³⁰ Pelepo meso ga jemanjajo gawugwice. Sambano Yesu ŵasalicisye mwamacili kuti, “Jwine jwalijose akamanyilila yeleyi.”

³¹ Nambo jemanjajo ŵatyosile pelepo ni kuja kujijenesya nganiji ku mbali syosope sya cele cilamboco.

Yesu ŵaposisye mundu jwangaŵeceta

³² Piŵakopokaga jemanjajo m'nyumbamo, ŵandu ŵane ŵayice kwa Yesu ni mundu jwangaŵeceta, ligongo jwakamwilwe ni msimu wakusakala.

³³ Yesu piŵawukopwesye msimu ŵakusakalawo, mundu jula ŵatandite kuŵeceta. Ŵandu wosope ŵasimonjile acitiji, “Kutandilila kalakala nganituyiwoneje yindu yamti myiyi mu Isalaeli.”

³⁴ Nambo Afalisi ŵatite, “Jweleju akusakoposya misimu jakusakala* ni macili gakumpa mcimwene jwa misimu jakusakala.”

Ya canasa ca Yesu

³⁵ Yesu ŵajesilejesile m'misinda ni m'misi josope. Ŵapitaga mcijiganya m'nyumba syawo sya mapopelo, ni kulalicilaga Ngani Syambone* syakwamba ya Ucimwene wa kwinani. Soni ŵaliji mkuposya yilwele yosope ya ŵandu ni kulembuka kwa myilu yawo.

³⁶ Piŵagaweni makuga ga ŵandu, ŵatendele canasa, ligongo jemanjajo ŵaliji ŵakudandawula nipo ŵaliji ŵakusoŵa cikamucisyo mpela ngondolo syangali mkucinga.

³⁷ Sambano ŵasalile ŵakulijiganya ŵakwe kuti, “Yakugowola yipali yejinji, nambo ŵamasengo ŵakuti ayisonganye yosope pampepe ali ŵamnono.

³⁸ Myoyo mŵende kwa msyene yakugowolayo kuti atumisye ŵamasengo kuti akasonganye yagowola yakwe.”