Matayo 8 - Chiyawo Bible

Yesu ŵaposisye mundu jwa matana

¹ Yesu* piŵatulwice mwitumbi, ŵandu ŵajinji ŵamkuyisye jwalakwejo.

² Sambano mundu jwine juŵalwalaga ulwele wa matana jwayice ni ŵamtindiŵalile acitiji, “Ambuje, naga akusosa, akukomboleka kuswejesya.”

³ Yesu ŵatambasukwile ligasa lyakwe, ni ŵamkwayiye jwakulwalajo acitiji, “Cambone, ngusaka, swejelani!” Mwa ndaŵi jijojo, mundu jula jwaposile ku ulwele wakwe ula.

⁴ Sambano Yesu ŵamsalile kuti, “Mkalamuce, Kasimumsalila jwine jwalijose yeleyi, nambo mgambe kwawula mkalilosye kwa ŵakutaga mbopesi, nipo mkapelece mtuka uŵalamwile Mose* wula. Welewu uŵe umboni pameso pa ŵandu kuti mposile nditu.”

Yesu ŵamposisye jwakutumicila jwa jwamkulungwa jwa asilikali ŵa Ciloma

⁵ Yesu piŵajinjile m'musi wa Kapelenaumu, jwamkulungwa jwine juŵalamulilaga likuga lya asilikali 100 ŵa Ciloma ŵayice kukuŵenda cikamucisyo kwa jwalakwe.

⁶ Ŵatite, “Ambuje, mcanda jwangu kumusi ali cigonele kulwala mwakuti ni kwenda kose ngakupakombola, pakuti yikumpweteka mnope.”

⁷ Yesu ŵamsalile kuti, “Yambone, tiyice kukumposya jwalakwejo.”

⁸ Nambo jwamkulungwa jwa asilikali jula ŵatite, “Ambuje, nganguŵajilwa kose kuti ŵalakwe akajinjile m'nyumba jangu. Nambo agambe kuŵeceta liloŵepe nipo jwamasengo jwangu taŵe cenene.

⁹ Pakuŵa none ngwete acakulungwa ŵakusandamulila, nambo une soni ngwete asilikali ŵingusinalamulilaga. Pingumsalila jwine kuti, ‘Mjawule,’ akusajawula. Pingumsalila soni jwine kuti, ‘Myice,’ akusayikaga nditu. Soni ngusinamsalila kapolo jwangu kuti, ‘Mtende camti,’ akusacitendaga nditu.”

¹⁰ Yesu piŵapikene maloŵega ŵasimonjile nago, ni ŵagalawucile ŵandu ŵaŵamkuyaga ŵala ni kwasalila kuti, “Ngumsalila jemanja kuti, une nganinacisimane cikulupi mpela celeci sikati ja Aisalaeli.

¹¹ Ngumsalicisya kuti ŵandu ŵajinji taciyika kutyocela kungopoko lyuŵa ni kungapilo lyuŵa kwisa kutama nawo pa cindimba mu Ucimwene wa kwinani pampepe ni Abulahamu,* Isaki ni Yakobo.*

¹² Nambo ŵele ŵakaŵajilwe kutama mu ucimwenewo, tacaponya kusa, mcipi, kweleko tikuciŵa kulila ni kutawuna meno ligongo lya yipwetesi yakogoya.”

¹³ Kaneko pakumsalila jwamkulungwa jwa asilikali jula Yesu ŵatite, “M'mwe jawulagani, mjende cenene, nipo yitendekwe mpela yamtite pakulupililayi.” Nipo mcanda jwakwe jula ŵalamile ndaŵi jijojo.

Yesu ŵaposisye ŵandu ŵajinji

¹⁴ Yesu piŵajinjile m'nyumba ja Petulo,* ŵasimene akwegwe ŵawo Petulo ali cigonele, ŵaliji ali alipwice.

¹⁵ Ŵakamwile mamawo pamkono, nipo kulipuka kula kwamasile. Mama ŵala ŵajimwice ni kutanda kumtumicila Yesu.

¹⁶ Pa ndaŵi ja ligulo, jemanjajo ŵayice kwa Yesu ni ŵandu ŵajinji ŵaŵakamwilwe ni misimu ja kusakala. Yesu ŵajikopwesye misimujo ni maloŵepe, nipo ŵaposisye wosope ŵiŵalwalaga.

¹⁷ Ŵatesile yosope yeneyi kuti yitendekwe yiŵaŵecete jwakulocesya* Yesaya kuti, “Jwalakwe ŵaposisye yilwele yetu, ni kututenda uwe kuti tuŵe cenene.”

Ya kumkuya Yesu

¹⁸ Yesu piŵaweni ŵandu ŵajinji ali amsyungulile, ŵasalile ŵakulijiganya* ŵakwe kuti, “Kwende tujombocele lisi linelyo.”

¹⁹ Nambo pa ndaŵi jijojo ŵayice jumo jwa aciŵalimu ŵa Malamusi* acimsalilaga kuti, “Cemwalimu, tinakuye kulikose kutajawuleje.”

²⁰ Yesu ŵamjanjile kuti, “Makule gakwete mbanga syakwe, soni yijuni yikwete yisusi yakwe, nambo Mwanace jwa Mundu* nganakola palipose pakuti agone ni kupumula.”

²¹ Jwakulijiganya jwakwe jwine ŵamsalile Yesu kuti, “Ambuje, ambe lipesa kuti njawule kumusi ngasice malilo ga baba ŵangu.”

²² Nambo Yesu pakumjanga ŵatite, “M'mwejo munguye, nipo mwaleceni ŵawe asiceje ŵawe acimjawo.”

Yesu ŵalekasisye mbungo m'nyasa

²³ Yesu ŵajinjile mwiboti, nipo ŵakulijiganya ŵakwe ŵamkuyisye mwiboti pemo.

²⁴ Mwacisisimucisya, jatandite mbungo jakogoya pa nyasapo, mwakuti matumbela galiji mkwinjila mwibotimo. Nambo Yesu ŵaliji mlugono.

²⁵ Papopo ŵakulijiganya ŵakwe ŵala ŵamjimwisye acitiji, “Ambuje, atukulupusye, tuli ciŵandika kuwa!”

²⁶ Pelepo Yesu ŵajanjile ni kwawusya kuti, “Ligongo cici mkutenda woga, ana nganimkola cikulupi?” Ali atite myoyo, Yesu ŵajimwice ni kujilamula mbungojo ni matumbela gakwe, nipo paliji pana bata.

²⁷ Ŵakulijiganya ŵala ŵasimonjile acitiji, “Ana jweleju ali mundu jwamti uli pakuŵa mbungo, ni matumbela gakwe yikumpikanila?”

Yesu ŵaposisye ŵandu ŵaŵakamwilwe ni misimu jakusakala

²⁸ Yesu piŵayice lisi line lya nyasa, ku upande wa cilambo ca Gadala, ŵasimene ni ŵandu ŵaŵili ŵiŵakamwilwe ni misimu jakusakala* ŵiŵatyocelaga ku malembe. Jemanjajo ŵaliji ŵaukali wakogoya mwakuti ŵandu nganapakombolaga kupita lyele litalalyo.

²⁹ Mwacisisimucisya ŵandu ŵaŵiliwo ŵatandite gumila acitiji, “Ana akusaka cici kwa uwe, ŵalakwe Mwanace jwa Mlungu? Ana ayice kukutupa uwe cilango ndaŵi mkanijikwane?”

³⁰ Ciŵandika ni pelepo paliji pana likuga lya maguluŵe gigaliji mkulya.

³¹ Nipo misimu jakusakala jila jamŵendile Yesu kuti, “Naga mkutukoposya, tutumisyani kuti tukajinjile mu likuga lya maguluŵe gagali apogo.”

³² Yesu ŵajisalile misimujo kuti, “Yambone, jawulagani,” nipo jalakwejo jakopwece ni kuja kukwinjila m'maguluŵego. Papopo likuga lyosope lya maguluŵego lyagungumwice ni kuselelecela ku nyasa gali mkuwutuka mnope, ni kuja kukuliponya m'nyasamo mpaka kuwila m'momo.

³³ Ŵakucinga maguluŵe ŵala ŵatisile kuja kumusi. Piŵajinjile mu msinda, ŵasalile ŵandu wosope yele yiyatendekweyo, nipo soni yele yiyatendekwele ŵandu ŵiŵakamwilwe ni misimu jakusakala ŵala.

³⁴ Papopo ŵandu wosope ŵa mu msindamo ŵakopwece kuti akawonegane najo Yesu. Nipo piŵam'weni, ŵamŵendile jwalakwejo kuti atyoce ku upande wawowo.