Matayo 7 - Chiyawo Bible

Ya kwalamula ŵane

¹ “Mkasimwalamulaga ŵandu ŵane kuti ali ŵakulemwa, kuti nomwe mtakulamulidwa ni Mlungu.

² Yimkuti pakwalamula ŵandu ŵane, m'momo soni Mlungu ni mutacimlamulila nomwe ŵakwe. Nipo mpimo umkusakamulicisya masengo pakwapima nawo ŵane, Mlungu tacikuyicisya m'momo pemo pakumwucisya jemanja.

³ Ana uli mkulolecesya kaciswani kakali mliso lya mlongo mjenu, nambo ngamkuciganicisya ya ciswani cekulungwa cacili mliso mwenu?

⁴ Ana mpaka mumsalile uli mlongo mjenu kuti, ‘Mjime nimtyosye kaswani kakali mliso mwenuka,’ kutendaga ugweji mliso mwakwe muli mwana ciswani cekulungwa?

⁵ M'mwe mundu jwa unami! Mtande kaje kutyosya ciswani cekulungwa cacili mliso lyenu, kaneko ni timpakombole kulola cenene nikuja kutyosya kaciswani kakali mliso lya mlongo mjenu.

⁶ “Mkasipaga m'mbwa yindu yayipelecedwe kwa Mlungu, nimkaŵa kumgalawucila ni kumpaculanya, soni kasimgaponyelaga maguluŵe yindu ya mtengo mnope, kogopela kuti gatakuliŵataliŵata, pakuŵa gangakombola kulekanganya pasikati pa yindu yayili yambone ni yakusakala.

Ya kuŵenda, kusosasosa ni kupoposya

⁷ “Mŵende, nipo Mlungu tacimpa yimkusaka, msosesose nipo timsimane, poposyani nipo Mlungu tacimwugulila litanga.

⁸ Pakuti mundu jwakuŵenda, ni jwakusapocela; jwele jwakusasosasosa, ni jwakusasimana; nipo jwakupoposya ni jwele jwakusawugulilidwa.

⁹ Ana ŵani mwa jemanja ŵimli acatati, mpaka mumpe mwanace liganga citamileco jwalakwejo ali aŵendile mkate?

¹⁰ Kapena jwalakwejo ali aŵendile somba, ana mpaka mumpe lijoka?

¹¹ Naga jemanja, ni ungalumbana wenuwo, mkusim'manyilila kwapa ŵanace ŵenu yindu yambone, kuli uli Atati ŵenu ŵakwinani, ana mpaka calepelekasye cici kupeleka yindu yambone kwa ŵele ŵakusamŵenda jwalakwejo?

¹² Mwatendeleje ŵandu ŵane mpela mumkusacila kuti ŵane amtendeleje jemanja. Ayi ni yigakwiganya Malamusi ga Mose* pampepe ni majiganyo ga ŵakulocesya.

Ya cipata cakanganika

¹³ “Jinjilani pa cipata cakanganika. Pakuti cipata cakwinjilila ku Jahena* cili cekulungwa, soni litala lyakuja kuconasiko lili lyangasawusya kwendamo, nipo ŵandu ŵajinji akusajinjilila kweleko.

¹⁴ Nambo cipata cakwinjilila ku mbepo cili cakanganika, soni litala lyakwinjilila kweleko, lili lyakusawusya kwabasi, ni ligongo lyakwe ŵandu ŵakusalisimana lyele litalali, ali ŵakuŵalanjika.

Ya citela ni yisogosi yakwe

¹⁵ “Mkalamuce nawo ŵakulocesya ŵa unami. Akusayikaga kwa jemanja ni uwonece wakulitimalika mpela ngondolo, nambo mkati mwawo gali masogo gakogoya.

¹⁶ Timcamanyilila ni yitendo yawo. Ana yitela ya miŵa mpaka yisogole mipeleya? Ana citela ca midodo mpaka cisogole nguju?

¹⁷ Myoyo soni, citela cambone cikusasogola yisogosi yambone, nambo citela cacabe, cikusasogola yisogosi yacabe.

¹⁸ Citela cambone ngaŵa mkusogola yisogosi yacabe, kapena citela cacabe kusogola yisogosi yambone.

¹⁹ Citela cilicose cangasogola yisogosi yambone, akusacikata ni kuciponya pa moto.

²⁰ Myoyo timcamanyilila ni yitendo yawo.

Ya ŵitacijinjila mu Ucimwene wa kwinani

²¹ “Ngaŵa mundu jwalijose jwakusangolanga une kuti, ‘Ambuje, Ambuje,’ tacijinjila mu Ucimwene wa kwinani iyayi. Nambo ŵitacijinjila ni ŵelepewo ŵakusatenda lisosa lya Atati ŵangu ŵakwinani.

²² Pa lyele lisikulyo, ŵandu ŵajinji tacitiji kuti, ‘Ambuje, Ambuje, ana ngati uwe twaliji mkulalicila maloŵe ga Mlungu mu lina lyawo? Ngati uweji twaliji mkukoposya misimu jakusakala* pakukolanga lina lyawo? Ana ngati uwe ŵeŵala ŵitwatendega masengo gamacili gejinji mu lina lyawo?’

²³ Pelepo tinjasalila mwangasisa kuti, ‘Ngingum'manyilila kose. Mtyoce apa ŵandu ŵa yitendo yakusakala.’

Ya ŵandu ŵaŵili ŵakutaŵa majumba

²⁴ “Mundu jwalijose jwakugapikana maloŵe ganguga ni kugakamulisya masengo, akulandana ni mundu jwalunda juŵataŵile nyumba jakwe pa lwala.

²⁵ Pijaputile ula, cikumba cayice, nipo mbungo japujile ni kugomba pa nyumbajo, nambo nganijigwa kose, ligongo nyumbajo jataŵidwe pa lwala.

²⁶ “Nambo mundu jwalijose jwakugapikana maloŵe ganguga, ni ngagakamulicisya masengo, ali mpela mundu jwakuloŵela juŵataŵile nyumba jakwe pa msanga.

²⁷ Pijagwile ula, cikumba cayice, nipo mbungo japujile ni kugomba pa nyumbajo, nipo jagwile. Kugwa kwakwe kwaliji kwakulindimukuka kwakogoya.”

Ŵandu ŵasimonjile ni kwiganya kwa Yesu

²⁸ Yesu* piŵamasile kuŵeceta gele maloŵega, ŵandu wosope ŵala ŵasimonjile ni wiganye wakwe,

²⁹ ligongo ŵaliji mkwiganya mpela mundu jwa ulamusi, ngaŵaga mpela muŵatendelaga aciŵalimu ŵa Malamusi* ŵala.