Matayo 5 - Chiyawo Bible

Yiŵajiganyisye Yesu petumbi ( 5:1—7:29 )

¹ Yesu* piŵaliweni likuga lya ŵandu ŵajinji lila, ŵakwesile petumbi. Jwalakwe piŵatemi pasi, ŵakulijiganya* ŵakwe ŵamkuyisye papopo.

² Nipo ŵatandite kwajiganya acitiji:

Ya ŵandu ŵali ŵa upile

³ “Ŵana upile ŵandu ŵakulaga m'mitima mwawo mu usimu, pakuti Ucimwene wa kwinani uli wa jemanjajo!

⁴ Ŵana upile ŵandu ŵakulila m'mitima, pakuti Mlungu tacatulasya.

⁵ Ŵana upile ŵandu ŵakutulala mitima, pakuti Mlungu tacapa cilambo capasi kuŵa cawo.

⁶ Ŵana upile ŵandu ŵijakwete sala ni njota jakusosa kutenda lisosa lya Mlungu, pakuti Mlungu tacajikutisya.

⁷ Ŵana upile ŵandu ŵakwatendela acimjawo canasa, pakuti nombe nawo Mlungu tacatendela canasa.

⁸ Ŵana upile ŵandu ŵaswela mitima, pakuti tacimwona Mlungu.

⁹ Ŵana upile ŵandu ŵakwisa nawo mtendele, pakuti tacikolanjidwa ŵanace ŵa Mlungu.

¹⁰ Ŵana upile ŵandu ŵakulagasidwa ligongo lyakutenda lisosa lya Mlungu, pakuti Ucimwene wa kwinani uli wa jemanjajo!

¹¹ “Ŵana upile jemanja ŵandu pakumnyosyaga, kumlagasya ni kumlambucisya yakusakala ya mitundumitundu ligongo lyakuti mli ŵakunguya ŵangu.

¹² Sangalalani, secelelani, ligongo mbote jenu jili jajikulungwa kwinani. Pakuti mwelemu ni muŵasawucisyaga soni ŵakulocesya ŵiŵapali jele ndaŵijo jemanja mkinimpagwe.

Njete ni lilanguka

¹³ “Jemanja mli mpela njete ja cilambo capasi. Nambo naga jisulwice, ana mpaka jinonye soni uli? Nganijikola soni masengo amta panandi, nambo kwamba kujijasa kusa basi, ŵandu ni kujiliŵataga.

¹⁴ “Jemanja mli mpela lilanguka lya cilambo cosope. Msinda wuwutaŵidwe penani petumbi ngaŵa mkusisika kose.

¹⁵ Pangali mundu jwakusati ali apambile nyali, ni kujiwunicila ni ciŵiga. M'malo mwakwe akusajiŵika pa malo gakuwonecela cenene, nipo jikusamulicila ŵandu wosope ŵali m'nyumbamo.

¹⁶ Myoyo soni jemanja mlosyeje lilanguka lyenu pameso pa ŵandu, kuti pitagawoneje masengo genu gambone, ŵacimbicisyeje Atati ŵenu ŵakwinani.

Ya Malamusi ga Mose

¹⁷ “Mkasimganisyaga kuti yice kukumasya Malamusi ga Mose* ni yakwiganya ya ŵakulocesya. Unetu nganimbicila kukugamasya Malamusigo, nambo kuti yosope yilembedwe mwelemo yitendekwe.

¹⁸ Ngumsalicisya kuti kwinani ni cilambo capasi mkiniyimale, ngasipatyoka kalemba kalikose pa Malamusigo mpaka yosope yayilembedwe mwelemo yili yitendekwe.

¹⁹ Myoyo jwalijose jwakunyosya limpepe lya gele malamusiga, atamose lyalinandi lyose, ni kwajiganyaga ŵandu ŵane kuti nombe nawo atendeje myoyo, jwalakwejo taciŵa jwamnondi mu Ucimwene wa kwinani. Nambo jwalijose jwakusagapikanila ni kutenda yigakuti Malamusigo ni kwajiganyaga soni ŵandu ŵane kuti ajileje myoyo, jwalakwejo taciŵa jwamkulungwa mu Ucimwene wa kwinani.

²⁰ Ni ligongo lyakwe ngumsalila kuti naga kulupicika kwenu ngakukupunda kulupicika kwa aciŵalimu ŵa Malamusi* ni Afalisi* ngasimjinjila kose mu Ucimwene wa kwinani.

Ya kutumbila

²¹ “Mwapikene kuti ŵandu ŵakala ŵala ŵalamwile kuti, ‘Mkawulaga, nipo jwalijose jwakumwulaga mjakwe taciŵilanjidwa ku nganya kukwimbidwa magambo.’

²² Nambo une ngumsalila kuti jwalijose jwakumpila mtima mlongo mjakwe taciŵajilwa kuŵilanjidwa ku nganya ja magambo. Jwalijose jwakumnyosya mjakwe kuti, ‘Nganimŵa kandu m'mwe,’ taciŵajilwa kuŵilanjidwa kunganya jekulungwa kukwimbidwa magambo. Nipo jwalijose jwakumkolanga mjakwe kuti, ‘M'mwe ŵangali mate,’ taciŵajilwa kuja kukuponyedwa ku moto wa Jahena.*

²³ “Ni ligongo lyakwe pakupeleka mtuka wenu kwa Mlungu pa malo gakupelecela mbopesi, nipo ndaŵi jijojo mkukumbucila kuti mkwete magongo ni mjenu,

²⁴ mlece mtuka wenuwo pa malo gakupelecela mbopesi papopo, nipo mjawule mkatande kaje kwilana ni mlongo mjenujo. Kaneko ni mjawule mkapelece mtuka wenu ula kwa Mlungu.

²⁵ “Mjilaneje najo mwacitema mjenu jwamlaŵilile kwa mwenye mli mwitala, mkanimyice kunganya ja magambo, kogopela kuti jwalakwejo komboleka kumjigalila m'mwejo kwa jwakulamula, nipo jwakulamulajo tacimpeleka m'mwejo kwa asilikali ŵitacimŵika m'mwejo m'nyumba ja akayidi.

²⁶ Ngumsalicisya kuti timcitama mwelemo mpaka mli mlipile mbiya syosope.

Ya cikululu

²⁷ “Mwapikene kuti ŵandu ŵakala ŵala ŵalamwile kuti, ‘Kasimtenda cikululu.’

²⁸ Yambone, nambo une sambano ngumsalila kuti, mundu jwalijose jwakumlolecesya jwamkongwe ni kumkumbila, atesile najo kala cikululu mu mtima mwakwe.

²⁹ Myoyo, naga liso lyenu lya kumlyo likumlemwekasya, mlikolotole ni kulijasa. Kuli kwambone kuti mŵe ŵangali ciŵalo cenu cimpepe, kulekangana ni kuti cilu cenu cosope aciponye ku Jahena.

³⁰ Nipo naga mkono wenu wamlyo ukumlemwekasya, mwukate ni kuwujasa. Kuli kwambone mnope kuti mjase ciŵalo cenu cimpepe, kulekangana ni kuti cilu cenu cosope aciponye ku Jahena.

Ya kulekangana ulombela

³¹ “Ŵandu ŵakala ŵala ŵalamwile soni kuti, ‘Naga mundu akwaleka ŵamkwakwe, ŵapeje ŵakongwewo cikalata cakulekanganila.’

³² Nambo sambano ngumsalila kuti: Naga jwamlume akwaleka ŵamkwakwe, pangaŵaga ligongo lyakuti atesile cikululu, akwatendekasya cikululu ŵakongwewo naga akulombela soni. Nipo jwamlume jutiŵalombe ŵele ŵakongwewo, nombe nawo akutenda cikululu.

Ya kulumbila

³³ “Mwapikene soni kuti ŵandu ŵakala ŵala ŵalamwile kuti, ‘Mkalumbila mwa unami, nambo myitendeje mpela yimwatite pakutenda cilanga* kwa Ambuje pakulumbila kwenu.’

³⁴ Yambone, nambo une ngumsalila kuti, atamose kulumbila* kweneko, kasimlumbilaga kose. Kasimlumbila kuti, ‘Kwinani!’ Pakuti kwinaniko ni kucili citengu ca Ucimwene wa Mlungu.*

³⁵ Kasimlumbila pakolanga kuti, ‘Pali cilambo capasi!’ Pakuti cilambo capasi ni pakuliŵatilapo sajo syakwe. Kasimlumbila kuti, ‘Pali Yelusalemu!’ Pakuti Yelusalemu uli msinda wa mwenye jwamkulungwa.

³⁶ Kasimlumbila atamose mtwe wenu, pakuti ngaŵa mkupakombola m'mwejo kulugalawusya luwumbo lumo kuti luŵe lweswela kapena lwepiliwu.

³⁷ Mgambeje kuti, ‘Elo,’ kapena ‘Iyayi.’ Ligongo yele yimkusajonjecesyayo, yikusatyocela kwa Satana.*

Ya kuwucisya yakusakala

³⁸ “Mwapikene kuti ŵandu ŵakala ŵala ŵalamwile kuti, ‘Liso kulipila liso, lino kulipila lino.’

³⁹ Yambone, nambo une ngumsalila kuti, mundu jwakusakala ngalimbana najo. Naga mundu jwalijose akumputa pa lijeje lya kumlyo, mumgalawucisye kumpa soni lijakwelyo.

⁴⁰ Nipo naga mundu jwine akusaka kumjigalila ku nganya kukumjimba magambo, acisakaga kumsumula malaja genu, mumkunde ajigale ni mkanjo wenu wakwe.

⁴¹ Naga mundu akumkanganicisya kwenda najo mkuli umpepe, mjende najo mikuli jiŵili.

⁴² Naga mundu akumŵenda kandu, mumpeje. Soni naga mundu jwine akusaka kwasima kandu kwa m'mwejo, mkasimumkanya.

Ya kwanonyela amagongo

⁴³ “Mwapikene kuti ŵandu ŵakala ŵalamwile kuti, ‘Mumnonyeleje mnasi jwenu, nikumŵenga m'magongo jwenu.’

⁴⁴ Cambone, nambo une ngumsalila kuti, mwanonyeleje amagongo ŵenu nipo mwapopeleleje ŵandu ŵakusamsawusya.

⁴⁵ Naga mkuyitenda yeleyi, tiyicilosya kuti mli ŵanace ŵasyesyene ŵa Atati ŵenu ŵali kwinani. Pakuti ŵalakwewo akusaŵalisya lyuŵa kwa ŵandu ŵambone ni ŵandu ŵakusakala, nipo akusiŵagwicisya ula, ŵandu ŵakusatenda yindu yambone ni ŵandu ŵakusatenda yindu yakusakala.

⁴⁶ Naga mkwanonyela ŵawowo pewo ŵakusamnonyela jemanja, ana mkwembecela kupocela mbote jamti uli? Ana ngaŵaga atamose ŵakomesya msongo akusatendaga iyoyo peyo?

⁴⁷ Nipo naga mkwakomasya acalongo acimjenupe, ana pelepo mtesile cici cakwapunda ŵandu ŵane? Ana ngati atamose ŵandu ŵakusa akusatendaga iyoyo soni?

⁴⁸ Myoyo mŵeje ŵambone mnope mpela mwaŵelele Atati ŵenu ŵakwinani.