Matayo 4 - Chiyawo Bible

Yesu ŵalinjidwe ni Satana

¹ Panyuma pa yeleyi, Msimu wamlongolele Yesu* kwawula ku cipululu kuti akalinjidwe ni Satana.*

² Kwa masiku makumi mcece Yesu nganalya kandu kalikose musi ni cilo, mwakuti jamkwete sala.

³ Sambano Satana jwayice kwa Yesu ni kumsalila kuti, “Naga mli mwanace jwa Mlungu, mgalamule magangaga kuti gaŵe mkate.”

⁴ Nambo Yesu ŵajanjile kuti, “Malemba galembedwe kuti, ‘Mundu ngaŵa mkuŵa ni umi ligongo lya mkatepe, nambo ni maloŵe gosope gakusaŵeceta Mlungu.’ ”

⁵ Kaneko Satana ŵamjigele Yesu kwawula najo ku Yelusalemu, Msinda Weswela. Nipo ŵamjimice penani pa Nyumba ja AMBUJE,

⁶ ni ŵamsalile kuti, “Naga yili yakuwona kuti mli Mwanace jwa Mlungu, mliponye pasi. Pakuti yilembedwe m'Malemba kuti: ‘Mlungu tacilamulila malayika* gakwe kuti gamsunje, nipo tigacimjangata m'myala mwawo, kuti mkaligombesya sajo syenu pa liganga.’ ”

⁷ Nambo Yesu ŵatite, “Malemba gakuti soni, ‘Mkasimumlinga Ambuje, Mlungu jwenu.’ ”

⁸ Pakumalisya, Satana ŵamjigele Yesu kwawula najo kwitumbi lyelewu mnope, nipo kweleko ŵamlosisye ucimwene wosope wapasi pano ni ukulungwa wakwe.

⁹ Sambano Satanajo ŵamsalile Yesu kuti, “Yosope yeneyi tinjimpa naga mkukunda kundindiŵalila ni kulambila une.”

¹⁰ Papopo Yesu ŵatite, “Mtyoce apa, Satana! Pakuti yilembedwe m'Malemba kuti, ‘Mumlambileje Ambuje, Mlungu jwenu, ni kwatumicila ŵelewo pewo.’ ”

¹¹ Pelepo Satana jula ŵamlesile Yesu, nipo malayika gayice ni kumkamucisya Yesujo.

Yesu ŵagatandite masengo gakwe ku Galileya

¹² Yesu piŵapikene kuti Yohane* ŵamponyisye m'nyumba ja ukayidi, ŵapite ku Galileya.

¹³ Ni ŵatyosile ku Nasaleti kuja kutama ku Kapelenaumu, msinda wine wa mungulugulu Nyasa ja Galileya, mu mpika mwa mbali ja Sebuloni ni Nafutali.

¹⁴ Yeleyi yatendekwe kuti gakwanile maloŵe giŵaŵecete jwakulocesya* Yesaya kuti,

¹⁵ “M'mwe cilambo ca Sebuloni ni cilambo ca Nafutali, petala lya ku nyasa, pesi pa Yolodani, ku Galileya, cilambo ca ŵandu ŵa mitundu jine!*

¹⁶ Ŵandu ŵakutama mu cipi, aliweni lilanguka lyekulungwa. Ŵandu ŵakutama mcilambo ca cipi camti bii mpela cilambo ca ciwa, lilanguka lyasimene.”

¹⁷ Kutandila jele ndaŵijo Yesu ŵatandite kulalicila kuti, “Mpitikuce mtima, pakuti Ucimwene wa kwinani uŵandicile.”

Yesu ŵaŵilasile ŵandu mcece ŵakuwulaga somba

¹⁸ Yesu piŵaliji mkwenda mungulugulu mwa Nyasa ja Galileya, ŵaweni ŵandu ŵaŵili ŵanakajumo, Simoni* jwakolanjidwa Petulo* ni Andileya,* mpwakwe ŵiŵaliji kuwulaga somba pakukamulisya masengo makoka. Pakuti ŵaliji ŵakutanjisya somba.

¹⁹ Yesu ŵasalile kuti, “Jemanja myice, munguye une, nipo tinimjiganye kuŵa ŵakwajigalila ŵandu kwa une mpela yimkuti pakutanjisya somba.”

²⁰ Papopo jemanjajo ŵalesile makoka gawo ni ŵamkuyisye.

²¹ Piŵatyosile pa malopo kuja pasogolo, Yesu ŵaweni ŵandu ŵane soni ŵaŵili ŵanakajumo, Yakobo* ni Yohane,* ŵanace ŵa Sebedayo. Jemanjajo ŵaliji mwiboti pampepe ni baba ŵawo, ali mkulinganya makoka gawo, Yesu ni ŵaŵilasile.

²² Papopo jemanjajo ŵalesile liboti lyawo ni baba ŵawo ŵala, ni ŵamkuyisye Yesu.

Yesu ŵaliji mkwiganya, kulalicila ni kwaposya ŵakulwala

²³ Yesu ŵajesile mcilambo cosope ca Galileya acijiganyaga m'nyumba sya mapopelo ni kulalicila Ngani Syambone* syakwamba Ucimwene wa Kwinani. Ŵaliji mkuposya soni yilwele yosope ya ŵandu ni yakupweteka ya myilu yawo.

²⁴ Mbili jakwe jajenele mcilambo cosope ca Siliya, mwakuti ŵandu ŵayikaga nawo kwa jwalakwe, ŵakulwala wosope ŵiŵaliji mkulaga ni yilwele ni yakupweteka yakulekanganalekangana, ŵandu ŵakamulwa ni misimu jakusakala,* ŵamjilinjili ni ŵalemale, jwalakwe ŵaposyaga.

²⁵ Ŵandu ŵajinji ŵamkuyaga kutyocela ku Galileya, ku dela jakolanjidwa Misinda Likumi,* ku Yelusalemu, ku Yudeya ni pesi pa Lusulo lwa Yolodani.