Matayo 28 - Chiyawo Bible

Yesu ŵajimwice ku ŵawe

¹ Pilyamasile lisiku lyakupumula,* kumasikusiku kwa lisiku lya mlungu, Maliya jwa ku Magadala ni Maliya jwine jula ŵayice kukulola lilembe lila.

² Mwacisisimucisya cilambo catenganyice mnope, ligongo lilayika lya Ambuje lyatulwice kutyocela kwinani, ni lyayingalamulile pambali liganga lila, ni kutama pacanya pakwepo.

³ Uwonece wakwe waliji mpela njasi, nipo cakuwala cakwe caliji ceswela mpela utandi wa mbee.

⁴ Pelepo acilonda ŵala ŵakamwilwe woga ni ŵatandite kutetemela, nipo ŵaliji mpela ŵandu ŵawe.

⁵ Nambo lilayikalyo lyaŵecete ni acakongwe ŵala nipo ŵasalile kuti, “Jemanja mkasimjogopa iyayi. Ngumanyilila kuti mkusosa Yesu,* juŵamkomele pa msalaba jula.

⁶ Nganaŵa amuno, ajimwice ku ŵawe mpela yiŵatite pakumsalila yila. Myice mlole piŵagonile.

⁷ Mjawule mwacitema sambano jino, mkasalile ŵakulijiganya* ŵakwe ŵala kuti, ‘Jwalakwe ajimwice ku ŵawe, nipo sambano alongolele kwawula ku Galileya, timkamwonele kweleko.’ Mkumbucile yinimsalileyi.”

⁸ Pele acakongwewo ŵatyosile ku malembeko mwacitema, ali akamwilwe ni woga nambo soni kwineku ni cisangalalo cacikulungwa, ni ŵawutwice kuja kukwasalila ŵakulijiganya ŵakwe ŵala.

⁹ Mwacisisimucisya Yesu ŵasimangene nawo ni ŵatite, “Monitu mwanja mama!” Jemanjajo ŵayice ni kumŵandicila soni ŵakamwile sajo syakwe, nipo ŵamlambile.

¹⁰ Papopo Yesu ŵasalile kuti, “Kasimjogopa. Mjawule mkasalile acalongo acimjangu kuti akajawule ku Galileya. Takambonele kweleko.”

Yiŵaŵecete acilonda ŵala

¹¹ Piŵajawulaga acakongwe ŵala, ŵane mwa acilonda ŵala ŵajawile ku msinda, ni ŵasalile acakulungwa ŵa ŵakutaga mbopesi yosope yele yiyatendekwe.

¹² Sambano acakulungwa ŵa ŵakutaga mbopesi ŵala ni acakulungwa ŵa Ayuda* ŵasongangene ni kupangana lunda. Ŵapele acilonda ŵala mbiya syejinji,

¹³ ni ŵasalile kuti, “Mjileje, ‘Ŵakulijiganya ŵakwe ŵayice cilo kukwiŵa mtembo wakwe uwe tuli mlugono.’

¹⁴ Myoyo bwanamkubwa* pitapikane yeleyi, mtima wawo tiwucitama pasi, nipo tipaciŵa pangali kandu kakumsawusya.”

¹⁵ Acilonda ŵala piŵapocele mbiya sila, ŵatesile kweli mpela yila yiŵatite pakwasalila. Kwakuti jele mbiliji jajenele pasikati pa Ayuda mpaka lelo jino.

Yesu ŵatumile ŵakulijiganya ŵakwe

¹⁶ Ŵakulijiganya likumi ni ŵaŵili ŵala ŵajawile ku Galileya kwitumbi kwele Yesu ŵalangene nawo kuti akasimane.

¹⁷ Piŵam'weni, ŵamtindiŵalile, nambo ŵane ŵakayicilaga.

¹⁸ Yesu ŵaŵandicile ni ŵasalile kuti, “Mbegwile ulamusi wosope kwinani ni pasi pano.

¹⁹ Ni ligongo lyakwe jemanja mjawule, mkajiganye ŵandu ŵa ngosyo syosope. Mkabatisyeje mu lina lya Atati, ni lya Mwanace, ni lya Msimu Ŵaswela,

²⁰ ni kwajiganya yosope yele yinamlamulile. Nipo unejo ndili ni jemanja masiku gosope, mpaka mbesi ja cilambo capasi cino.”