Matayo 27 - Chiyawo Bible

Yesu ku nganya ja Pilato

¹ Kundaŵi pikwacele, acakulungwa wosope ŵa ŵakutaga mbopesi ni acakulungwa ŵa Ayuda* ŵatesile mtemela kuti amwulaje Yesu.

² Ŵamtaŵile, ni ŵajile najo kwa Pilato,* bwanamkubwa* jwa ku Loma.

Ya ciwa ca Yudasi

³ Pelepo Yudasi, juŵampelece Yesu kwa amagongo ŵakwe jula, piŵayiweni kuti magambo gamsakalile Yesu, ŵakamwilwe ni canasa cakogoya, ni kuligamba pa yele yiŵatesileyo. Sambano ŵajawile kukwawucisya acakulungwa ŵa ŵakutaga mbopesi ni acakulungwa ŵa Ayudawo mbiya makumi gatatu sya silifa,* sila.

⁴ Ŵatite, “Nalemwisye pakumpeleka mundu jwangalemwa kuti awulajidwe.” Nambo jemanjajo ŵatite, “Uwe nganitukola nayo kandu, yenu yeleyo.”

⁵ Yudasi ŵajile kusiponya mbiya sila m'Nyumba ja AMBUJE ni ŵatyosile kuja kukulitaŵilila.

⁶ Acakulungwa ŵa ŵakutaga mbopesi ŵala ŵasilokotanyisye mbiya acitiji, “Malamusi getu ngagakutukunda kuŵika mbiyasi mwakusunjila cipanje ca m'Nyumba ja AMBUJE, pakuti sili sya miasi.”

⁷ Myoyo ŵakamulene kuti mbiyasyo asumile mgunda wa mgumba yiŵiga, kuti uŵe malembe ga acalendo.

⁸ Ni ligongo lyakwe mgundawo mpaka lelo jino ukusaŵilanjidwa “Mgunda wa miasi.”

⁹ Pelepo yatendekwe yiŵaŵecete jwakulocesya* Yelemiya kuti, “Ŵajigele mbiya sila makumi gatatu, mtengo wakwe wele uŵalamwile Aisalaeli,

¹⁰ ni ŵasumile mgunda wa mgumba yiŵiga mpela yiŵatite Ambuje pakundamulila.”

Pilato ŵamwusisye Yesu yiwusyo

¹¹ Sambano Yesu ŵajimi pameso pa bwanamkubwa jwa ku cilambo ca Loma, uŵamwusisye kuti, “Ana m'mwejo mli mwenye jwa Ayuda?” Yesu ŵajanjile kuti, “Mŵecete mwasyene jika.”

¹² Nambo acakulungwa ŵa ŵakutaga mbopesi ŵala ni acakulungwa ŵa Ayuda piŵamŵecetelaga, Yesu nganajanga kandu kalikose.

¹³ Pelepo Pilato ŵamwusisye jwalakwejo kuti, “Ana ngamkupikana yosope yakumŵecetelayi?”

¹⁴ Nambo Yesu nganajanga kandu kalikose atamose liloŵe limpepe, mwakuti bwanamkubwa jula ŵasimonjile mnope.

Pilato ŵalamwile kuti Yesu awulajidwe

¹⁵ Pa ndaŵi ja cindimba ca Pasaka,* bwanamkubwa ŵaliji mkwagopolela ŵandu mkayidi jumo, jwele juŵamsakaga jemanjajo.

¹⁶ Pa jele ndaŵijo ŵapali mkayidi jwine jwakumanyika, lina lyakwe Balaba.

¹⁷ Sambano ŵandu piŵasongene, Pilato ŵawusisye kuti, “Ana mkusaka kuti namgopolele jwapi, Balaba kapena Yesu jwakolanjidwa Klistu?”*

¹⁸ Ŵatite myoyo ligongo Pilato ŵamanyilile kuti acakulungwa ŵa Ayudawo agambile kumpeleka Yesu ligongo lya wiwu basi.

¹⁹ Pilato piŵaliji pa citengu cakulamulila magambo, ŵamkwakwe ŵamtumicisye maloŵe kuti, “Mkatenda najo kandu mundu jwakulungamajo, pakuti sagamisi sisawisye kwabasi cilo cipiteci, ligongo lya jwalakwejo.”

²⁰ Acakulungwa ŵa ŵakutaga mbopesi ni acakulungwa ŵa Ayuda ŵakanganicisye ŵandu kuti amŵende Pilato kuti amgopole Balaba, nipo kuti Yesu awulajidwe.

²¹ Sambano Pilato jula ŵawusisye kuti, “Ana mkusaka kuti namgopolele jwapi mwa ŵaŵiliŵa?” Ŵandu ŵala ŵatite, “Balaba.”

²² Pilato ŵawusisye kuti, “Nambi sambano ndende najo cici Yesu, jwakolanjidwa Klistuju?” Ŵandu wosope ŵala ŵajanjile kuti, “Amkomele pa msalaba!”

²³ Pilato ŵawusisye soni kuti, “Ana ŵalemwisye cici?” Nambo ŵandu ŵala ŵajendelecele gumila kwakupundanganya acitiji, “Amkomele pa msalaba!”

²⁴ Pilato ŵayiweni kuti ngayikwilana kose, nipo kuti ŵandu ali ciŵandika kutenda njojo. Myoyo ŵaŵilasisye mesi, ni ŵanaŵile myala pameso pa ŵandu wosope, aciŵecetaga kuti, “Uneji ni nganingola kose kandu pa ciwa ca jwele munduju. Yeleyo yenu, timliwonele mwacimsyene.”

²⁵ Ŵandu wosope ŵala ŵatite, “Ciwaco, magambo gakwe gaŵe petuwe ni ŵanace ŵetu.”

²⁶ Pelepo Pilato ŵagopolele Balaba, ni ŵalamwile kuti Yesu akwapulidwe yikoti. Kaneko ŵampelece kuti akamkomele pa msalaba.

Asilikali ŵamtesile Yesu cipongwe

²⁷ Kaneko asilikali ŵamjigele Yesu ni kuja nawo m'nyumba ja bwanamkubwa nipo ŵalisongenye likuga lyosope lya asilikali acimjawo ni ŵamsyungulile Yesu.

²⁸ Ŵamwusile yakuwala yakwe ni ŵam'wecice mkanjo ŵecejewu.

²⁹ Ŵapanganyicisye cisoti ca ucimwene cakuluka kutyocela ku nyambi sya miŵa ni ŵam'wecice mu mtwe, nipo ŵamkamulisye litete m'myala ku mkono wakwe wamlyo. Kaneka ŵatandite kumtindiŵalila, acing'andaga najo mwacipongwe kwine acimsalilaga kuti, “Moni mwenye jwa Ayuda.”

³⁰ Ŵamsunile mata ni ŵajigele litete lila ni kumputaga nalyo mu mtwe.

³¹ Piŵamasile ng'anda najo mwacipongwe myoyo, ŵamwusile mkanjo wula ni ŵam'wecice yakuwala yakwe, kaneko ŵamjigele, ni kwawula nawo kuti akakomele pa msalaba.

Ŵamkomele Yesu pa msalaba

³² Piŵakopokaga mu msindamo, ŵasimene ni mundu jwine jwa ku Kilene, lina lyakwe Simoni.* Sambano asilikali ŵala ŵamkanganicisye kuti anyakule msalaba wa Yesu.

³³ Nipo ŵayice ku malo gakolanjidwa Gologota, gopolela kuti, “Malo ga cikalakasa ca mtwe.”

³⁴ Kweleko ŵampele Yesu finyo wewanganye ni ndulu kuti amwe, nambo piŵapasisye, jwalakwe ŵakanile kumwa.

³⁵ Piŵamkomele pa msalaba, ŵagaŵene yakuwala yakwe pakulondola cisango.

³⁶ Kaneka ŵatemi pasi ni kumlondelaga.

³⁷ Penani pa mtwe wakwe ŵalembile maloŵe gakulosya magambo gakumwulajila, gakuti, “Aju ni Yesu, mwenye jwa Ayuda.”

³⁸ Papopo ŵakomele soni pa msalaba ŵaciswamba ŵaŵili, jwine mbali ja ku mkono wamlyo, jwine mbali ja ku mkono wamciji wa Yesu.

³⁹ Ŵandu ŵiŵapitaga pelepo, ŵaliji mkumŵecetela maloŵe gacipongwe acipukunyaga mitwe jawo.

⁴⁰ Ŵatite kuti, “M'mweji eti mwatiji kuti, ‘Tinjipasula Nyumba ja AMBUJE ni kujitaŵa soni pa masiku gatatu?’ Mlikulupusye mwasyene naga m'mwejo mli Mwanace jwa Mlungu, ni mtuluce pa msalabapo.”

⁴¹ Nombe nawo acakulungwa ŵa ŵakutaga mbopesi, aciŵalimu ŵa Malamusi* ni acakulungwa ŵa Ayuda ŵaliji kumseka jwalakwejo. Acitiji kuti,

⁴² “Mwakulupwisye ŵandu ŵane, nambo mkulepela kulikulupusya mwasyene. Ana ngati mwenye jwa Aisalaeli? Atulucepotu pa msalabapo kuti twakulupilile.

⁴³ Akusakulupilila Mlungu, amkulupusyetu sambano Mlungujo, naga akusamnonyela kweli, paja ŵatiji, ‘Une ndili mwanace jwa Mlungu.’ ”

⁴⁴ Ŵaciswamba ŵele ŵiŵakomele pampepe ni Yesu ŵala, nombe nawo soni ŵaliji kumlalatila.

Ciwa ca Yesu

⁴⁵ Kutandila ndaŵi ja 12 koloko musi mpaka 3 koloko ligulo, cayice cipi pa cilambo cosope.

⁴⁶ Sambano ndaŵi pijakwanaga ca m'ma 3 koloko, Yesu ŵagumisile ni maloŵe gamakulungwa acitiji, “Eli, Eli, lama sabakitani?” Gopolela kuti, “Mlungu jwangu, Mlungu jwangu, ligongo cici andesile?”

⁴⁷ Ŵandu ŵane ŵaŵajimi pelepo piŵagapikene maloŵego, ŵatite, “Munduju akumŵilanga Eliya.”*

⁴⁸ Papopo jwine ŵawutwice ni kuja kujigala siponji. Ŵajiloŵece mu finyo wawucesuce, ni kujikoloŵeka petete jili jegumbale ni finyo jwamcesucejo, ni ŵampele kuti amwe.

⁴⁹ Nambo ŵiŵajimi pelepo ŵatite, “Kwende tujembecele, tulole naga Eliya tayice kukumkulupusya jwalakwejo.”

⁵⁰ Nambo Yesu ŵagumisile soni mnope ni ŵapumwile mpweya kakumalisya.

⁵¹ Ni mlole, papopo nguwo jakuciga ku lusasa lwa Nyumba ja AMBUJE japapwice cilikati, kutyocela penani mpaka pasi. Cilambo catenganyice nipo maganga gekulungwa gakasice.

⁵² Malembe gawugwice nipo ŵandu ŵa Mlungu ŵajinji ŵaŵawile kala, ŵajimwice ku ŵawe.

⁵³ Ŵakopwece m'malembe, nipo Yesu piŵajimwice ku ŵawe, jemanjajo ŵajinjile mu Yelusalemu, Msinda Weswela, nipo ŵandu ŵajinji ŵaweni.

⁵⁴ Jwamkulungwa jwa asilikali pamo ni ŵele ŵaŵaliji najo pakumlondela Yesu ŵala, piŵakuweni kutenganyika kwa cilambo ni yine yosope yiyatendekwe yila, ŵatesile woga kwabasi acitiji, “Yisyene nditu kuti munduju ŵaliji Mwanace jwa Mlungu.”

⁵⁵ Pakutalicila panandi pati myoyo, ŵapali acakongwe ŵaŵaliji mkulolecesya. Jemanjajo ni ŵele ŵaŵaliji mkumkuya Yesu kutyocela ku Galileya acimtumicilaga.

⁵⁶ Pasikati pawo ŵapali Maliya jwa ku Magadala, ni Maliya mama ŵawo Yakobo ni Yosefe, nipo soni mama ŵawo ŵanace ŵa Sebedayo.

Ŵamsicile Yesu mwilembe

⁵⁷ Pilyakapilaga lyuŵa, ŵayice mundu jwine jwakusicila jwakutyocela ku Alimateya, lina lyakwe Yosefe. Nombe najo ŵaliji jwakulijiganya jwa Yesu.

⁵⁸ Jwalakweju ŵajile kukuŵenda mtembo wa Yesu kwa Pilato. Myoyo Pilato ŵalamwile kuti ampe mtembowo.

⁵⁹ Sambano Yosefe ŵawujigele ni kuwuŵijilila mu nguwo jeswela ja bafuta.

⁶⁰ Ŵawusicile mwilembe lyakwe lyasambano liŵatesile kusepa pa lwala. Ni ŵaligundumucisye liganga pa mlango wa pelembepo kuti awugalepo, ni ŵatyosilepo.

⁶¹ Maliya jwa ku Magadala ni Maliya jwine jula ŵaliji papopo ali atemi pasi kulolegana ni lilembelyo.

Ŵaŵisile alonda pelembe lya Yesu

⁶² Kundaŵi kwakwe, lili lipite lisiku lyakuliŵicila cile kwa lisiku lyakupumula* lya Ayuda, acakulungwa ŵa ŵakutaga mbopesi ni Afalisi* ŵasongangene ni ŵajawile kwa Pilato.

⁶³ Ŵamsalile Pilatojo kuti, “Bwana, tukukumbucila kuti mundu jwa unami jula piŵaliji jwacijumi ŵatiji kuti, ‘Gali gapite masiku gatatu, tinjijimuka soni.’

⁶⁴ Sambano mlamule kuti alondelejepo pelembe lyakwe mpaka lisiku lyatatu. Tukogopela kuti ŵakulijiganya* ŵakwe atakwika ni kwiŵa mtembo wakwe, kaneka taciŵaga mkwasalila ŵandu kuti, ‘Jwalakwe jula ajimwice ku ŵawe.’ Kulambusya kwambesiku tikuciŵa kwakusakala mnope kupunda kwandanda kula.”

⁶⁵ Pilato ŵasalile kuti, “Ngati asilikali ŵakulondela mkwete. Mwajigalani mjawule, mkalondele pelembepo mumkupakombolela.”

⁶⁶ Jemanjajo ŵajawile nditu, ni ŵawugele lilembe kwakulimba pakumatamata liganga lila, ni ŵaŵisile cimanyisyo pa ciliganga cakuwugalilaco. Ni ŵalesile asilikali ŵala acilondaga.