Matayo 26 - Chiyawo Bible

Mtemela wakulandana ya kwawulaga Yesu

¹ Yesu* piŵamasile kuŵeceta ngani syosopesi, ŵasalile ŵakulijiganya* ŵakwe kuti,

² “Ana eti mkumanyilila kuti cindimba ca Pasaka* ticitande pitigamale masiku gaŵili, nipo Mwanace jwa Mundu* tacimpeleka kuti akamkomele pa msalaba.”

³ Pa ndaŵi jelejo acakulungwa ŵa ŵakutaga mbopesi ni acakulungwa ŵa Ayuda* ŵasongene m'nyumba ja Kayafa juŵaliji kapitawo jwa ŵakutaga mbopesi wosope.

⁴ Ŵalangene yakusosasosa litala lyakuti ampelecele Yesu mwamcisyepela ni kumwulaga.

⁵ Nambo ŵatite, “Yeleyi tukayitenda pa ndaŵi ja cindimba iyayi, kogopela kuti ŵandu atakutenda njojo.”

Jwamkongwe jwine ŵampakesye Yesu mawuta ku Betaniya

⁶ Lisiku line Yesu ŵaliji ku Betaniya, m'nyumba ja Simoni* jwa matana.

⁷ Piŵaliji mkati mwakulya, ŵayice jwamkongwe jwine ali ajigele libotolo lya alabasita lyaligumbale ni mawuta gakununjila ga mtengo wapenani. Ŵagatasile mawutago pa mtwe pa Yesu.

⁸ Nambo ŵakulijiganya ŵakwe piŵayiweni yeleyi, yasakalisye mnope nipo ŵatite, “Ligongo cici konanga camti myiyi?

⁹ Nditu gele mawutaga, yikakombolece kugasumisya pa mtengo wekulungwa kwabasi, nipo mbiyasyo ni kuja kwapa ŵandu ŵakulaga.”

¹⁰ Yesu ŵamanyilile yiŵaŵecetaga jemanjajo nipo ŵawusisye kuti, “Ana mkumsawucisya cici? Pakuti yandendele jwelejuyi, yili yambone soni yakunonyelesya mnope.

¹¹ Timciŵa ni ŵandu ŵakulaga pasikati pa jemanja ndaŵi syosope nambo une ngasimba pasikati pa jemanja ndaŵi syosope.

¹² Jwalakweju atasile gele mawutaga pa cilu cangu, kuti acilinganyicisye cile mkanicisicidwe mwilembe.

¹³ Kusyene ngumsalicisya kuti kulikose kwele ŵandu taciŵaga ali mkulalicila Ngani Syambone* pa cilambo cosope capasi, mkasalicisyeje soni yele yatesile jwamkongweju, kuti ŵandu tamkumbucileleje.”

Yudasi ŵalangene ni acakulungwa ŵa Ayuda yakumpeleka Yesu

¹⁴ Kaneko Yudasi Isikaliyoti,* jumo jwa ŵakulijiganya likumi ni ŵaŵili ŵala, ŵajawile kwa acakulungwa ŵa ŵakutaga mbopesi.

¹⁵ Ni ŵawusisye kuti, “Ana timcimba cici patinjimpeleka Yesu kwa jemanja?” Jemanjajo ŵampele mbiya sya silifa,* makumi gatatu.

¹⁶ Sambano kutandila papopo Yudasi ŵatandite kusosasosa lipesa lyakumpelecela Yesu kwa jemanjajo.

Yesu ŵatesile cindimba ca Pasaka ni ŵakulijiganya ŵakwe

¹⁷ Pa lisiku lyandanda lya cindimba ca mikate jangali cakusasaŵilisya,* ŵakulijiganya ŵala ŵayice kukumwusya Yesu kuti, “Ana akusaka kuti uweji tukakolosye kwapi malo gakuja kulila cindimba ca Pasaka?”

¹⁸ Jwalakwe ŵasalile kuti, “Mjawule mu msindamu kwa mundu jwine jwakwe, mkasalile kuti, ‘Cemwalimu akuti ndaŵi jawo jili ciŵandika, akwisa kukulila kumangwenu kuno cindimba ca Pasaka pampepe ni ŵakulijiganya ŵakwe.’ ”

¹⁹ Ŵakulijiganya ŵala ŵatesile mpela yiŵatite pakwasalila Yesu, ni ŵakolosisye cakulya ca Pasaka.

²⁰ Pikwaswele, Yesu ni ŵakulijiganya ŵakwe likumi ni ŵaŵili ŵala ŵatemi pampepe ni kulyaga.

²¹ Jemanjajo piŵaliji mkulya myoyo, Yesu ŵasalile kuti, “Kusyene ngumsalicisya kuti jumo mwa jemanja tacimbeleka kwa amagongo ŵangu.”

²² Ŵakulijiganya ŵala ŵadandawile mnope, ni ŵatandite jumo kumwusya kuti, “Mwine pane ni kuŵa une, Ambuje?

²³ Yesu ŵajanjile kuti, Jwele jwapambile mkate wakwe mu mbale pampepe ni une, jwelejo ni jutambelece.

²⁴ Mwanace jwa Mundu akuja kukuwulajidwa mpela yigatite Malemba pakusala ya jwalakwe. Nambo akwete likungu mundu jwele jutacimpeleka Mwanace jwa Mundujo. Kukaliji kwambone mnope kwa jwele mundujo akaŵe ngapagwa.”

²⁵ Yudasi, jwele panyuma pakwe ŵampelece Yesu, ŵawusisye kuti, “Ana kapena une Cemwalimu?” Yesu ŵajanjile kuti, “Mŵecete mwasyene.”

Ya cakulya ca Ambuje

²⁶ Jemanjajo piŵaliji mkulya myoyo, Yesu ŵajigele mkate, ni ŵamtogolele Mlungu, ŵawugaŵenyegaŵenye, kaneko ŵapele ŵakulijiganya ŵala, jwalakwejo ali mkuŵeceta kuti, “Pocelani, mlye, celeci cili cilu cangu.”

²⁷ Kaneko ŵajigele mgawo, ŵamtogolele Mlungu ni ŵawupelece kwa ŵakulijiganya ŵala. Ŵasalile kuti, “Mwani jemanja wosope.

²⁸ Pakuti aji ni miasi jangu jakusimicisya cilanga* ca Mlungu. Miasi jeleji jinasulwisye ligongo lya ŵandu ŵajinji, kuti Mlungu ŵakululucile ulemwa* wawo.

²⁹ Ngumsalila kuti, ngasim'mwa soni cakumwa ca cisogosi ca mpeleyaci mpaka lisiku lyele litinjimwa finyo jwasambano pampepe ni jemanja mu ucimwene wa Atati.”

³⁰ Piŵamasile kwimba nyimbo jakumlumba Mlungu, wosope ŵakopwece pasa ni kwawulaga ku Litumbi lya Olifi.*

Yesu ŵaŵecetele cile kuti Petulo tacimkana

³¹ Kaneko Yesu ŵasalile jemanjajo kuti, “Cilo cino cino wosopemwe timundile ni kundeka une jika. Pakuti Malemba gakusala kuti, ‘Tinjimwulaga jwakucinga, nipo ngondolo tisicibalalikangana.’

³² Nambo patinjijimuka ku ŵawe, jutinjilongolela ni une kwawula ku Galileya.”

³³ Petulo* ŵamjanjile kuti, “Atamose wosope ajase mtima ni kwaleka, nambo une jikape ngasinaleka.”

³⁴ Yesu ŵamjanjile Petulo kuti, “Kusyene ngumsalicisya kuti cilope cino, tambala mkanatongole, timŵe mli munganile katatu kuti ngamkumanyilila une.”

³⁵ Kaneko Petulo ŵajanjile kuti, “Atamose ali atite kuti ambulaje pampepe ni ŵalakwe, une ngaŵa mkwakana kose kuti ngangwamanyilila.” Ŵakulijiganya ŵane wosope ŵala nombe nawo soni ŵaŵecete yilayila.

Lipopelo lya Yesu ku Getisemane

³⁶ Papopo Yesu ni ŵakulijiganya ŵakwe ŵajile ku malo gane gakolanjidwa Getisemane. Sambano ŵasalile ŵakulijiganyawo kuti, “Tamani apano, une ngwawula ako kukupopela.”

³⁷ Ŵajigele Petulo pampepe ni ŵanace ŵaŵili ŵa Sebedayo. Yesu ŵatandite kudandawula ni kulagasika mu mtima mwakwe.

³⁸ Ni ŵasalile jemanjajo kuti, “Mu mtima mwangu mugumbele canasa cekulungwa cakuwa naco. Jemanja mtame panopano, mesope pampepe ni une.”

³⁹ Ŵajawile pasogolo panandi, ni ŵaligwisisye pasi camakuku acipopelaga kuti, “Atati, naga yili yakomboleka, andyocesye mgawo wa yisawusyowu. Nambope atende yakusosa kwa ŵalakwe, ngaŵaga yingusosa une.”

⁴⁰ Nipo ŵawujile kwa ŵakulijiganya ŵala, ni ŵasimene ali mlugono. Sambano ŵamwusisye Petulo kuti, “Ana wosopemwe mlepele kutama mesope pampepe ni une atamose pakandaŵi kamnonope kano?

⁴¹ Tamani mesope ni kupopela kuti mkalinjikwa. Mtima wenu ukusaka, nambo cilu cenu cili cangali macili.”

⁴² Yesu ŵajawile soni kaŵili, ni ŵapopesile acitiji, “Atati naga mgawo wa yisawusyowu ngaŵa mkomboleka kundyocela, akaŵe mpaka nawumwelepe, yambone, yele yamkusaka yitendekwe.”

⁴³ Piŵawujile soni, ŵasimene ali mlugono, ligongo yikope yawo yasitopelwe ni lugono.

⁴⁴ Yesu ŵalesile soni, ni ŵajawile kukupopela katatu, aciŵecetaga maloŵe galagala.

⁴⁵ Kaneko ŵayice kwa ŵakulijiganya ŵakwe ni ŵatite, “Ana mli ciŵela gona ni kupumula kwakwe? Mlole, ndaŵi jila ni jiŵandicile nipo Mwanace jwa Mundu akuja kukupelecedwa m'myala mwa ŵandu ŵa ulemwa.

⁴⁶ Mjimuce, kwende tujawuleje. Mlole, ngati jwakwisa kukumbeleka jula aju ayice.”

Yesu ŵakamwilwe

⁴⁷ Yesu ali mkuŵecetape myoyo, ŵayice Yudasi, jumo jwa ŵakulijiganya likumi ni ŵaŵili ŵala. Ŵayice ni likuga lya ŵandu ŵajinji ali ajigele mawupanga ni yimbonga. Acakulungwa ŵa ŵakutaga mbopesi ni acakulungwa ŵa Ayuda ni ŵaŵatumile ŵanduwo.

⁴⁸ Jwakupeleka jula ŵaliji ali ŵasalile cimanyisyo kuti, “Jwele jutingamkomasye, ni jujojo, mkamkamule.”

⁴⁹ Sambano piŵayice Yudasi, ŵagambile kwawula piŵaliji Yesu nipo kaneko ŵamkomasisye kuti, “Moni, Cemwalimu!”

⁵⁰ Yesu ŵajanjile kuti, “Mjangu, tendani yele yimyicile.” Papopo ŵandu ŵala ŵayice ni kumkamula Yesu.

⁵¹ Nambo jwine mwa ŵele ŵiŵaliji pampepe ni Yesu, ŵaswekwile upanga wakwe, ni ŵamkunwile jwamasengo jwa jwamkulungwa jwa ŵakutaga mbopesi* wosope, mpaka ŵamkatile lipikanilo.

⁵² Pelepo Yesu ŵamsalile kuti, “Ucisyani upanga wenu mwigonelo mwakwe, pakuti wosope ŵakamula upanga, taciwulajidwa ni upanga.

⁵³ Ana ngamkumanyilila kuti ngakombolece kwaŵenda Atati, nipo mwandaŵi jijojo akandumicisye makuga ga ngondo ga malayika* gakupunda likumi ni gaŵili?

⁵⁴ Nambo ngatende myoyo, nambi yingatendekwe camtuli yele yigaŵecetele cile Malemba kuti yikuŵajilwa kutendekwa?”

⁵⁵ Pelepo Yesu ŵawusisye ŵandu ŵala kuti, “Ana uli myice kukungamula ni mawupanga ni yimbonga, mpela kuti une jwaciswamba? Lisiku ni lisiku naliji m'Nyumba ja AMBUJE njijiganyaga, nambo jemanja nganimungamula.

⁵⁶ Nambo yosopeyi yitendekwe kuti yiwonece kweli yele yiŵalembile ŵakulocesya.” Pelepo ŵakulijiganya ŵakwe wosope ŵala ŵatisile, ni kumleka jika.

Yesu ku Nganya ja Ayuda

⁵⁷ Sambano ŵandu ŵele ŵaŵamkamwile Yesu ŵala, ŵajawile najo ku nyumba ja Kayafa, jwamkulungwa jwa ŵakutaga mbopesi wosope. Kweleko ŵasongangene aciŵalimu ŵa Malamusi* ni acakulungwa ŵa Ayuda.

⁵⁸ Nambo Petulo ŵaliji acimkuyicisyaga pakutalicila, mpaka ku luŵala lwa nyumba ja jwamkulungwa jwa ŵakutaga mbopesi jula. Ŵajinjile mkati, ni ŵatemi pasi pampepe ni alonda ŵa ku Nyumba ja AMBUJE kuti alole mwele mutiyimalile.

⁵⁹ Acakulungwa ŵa ŵakutaga mbopesi ŵala ni Nganya josope, ŵaliji mkusosasosa umboni wakumlambucisya Yesu kuti amwulaje.

⁶⁰ Nambo nganawusimana atamose kuti syayice mboni syejinji sya unami. Pakumalicisya ŵayice ŵandu ŵaŵili.

⁶¹ Ŵatite, “Mundu jweleju ŵatiji, ‘Une mpaka napakombole kupasula Nyumba ja AMBUJE ni kujitaŵa soni masiku gatatu.’ ”

⁶² Sambano jwamkulungwa jwa ŵakutaga mbopesi wosope ŵajimi ni kumwusya kuti Yesu kuti, “Ana nganimkola cakwanga? Nambi yamtuli yakumŵecetela ŵanduyi?”

⁶³ Nambo Yesu nganajanga kandu kose. Pelepo jwamkulungwa jwa ŵakutaga mbopesi wosope jula ŵamsalile Yesu kuti, “Ngumlamula mu lina lya Mlungu jwacijumi kuti mtusalile mwakulumbila naga m'mwejo mli kweli Mkulupusyo jwakulocesyedwa jula, mwanace jwa Mlungu.”

⁶⁴ Yesu ŵamjanjile kuti, “Aŵecete asyene jika. Nambo soni ngwasalila kuti kutandila sambano timcimwona Mwanace jwa Mundu ali atemi ku mkono wamlyo wa Mlungu Jwamaciligosope. Timcimwona ali mkwisa m'mawunde.”

⁶⁵ Pelepo jwamkulungwa jwa ŵakutaga mbopesi wosope jula ŵapapwile yakuwala yakwe acitiji, “Kunyosya Mlungu kwakogoya kweleku! Ana pelepa kuŵa mkusosa soni mboni sine? Mlipikanile mwacimsyene kunyosya Mlungu kwakogoyaku.

⁶⁶ Sambano jemanja ni mkuganisya uli?” Jemanjajo ŵajanjile kuti, “Akuŵajilwa kuwulajidwa.”

⁶⁷ Papopo jemanjajo ŵatandite kumsunila mata ku meso ni kumputaga, ŵane kumgombaga makofi,

⁶⁸ acitiji, “M'mwe Mkulupusyo jwakulocesyedwa, nambi ngati m'mwe jwakulocesya?* Mlote, ana ŵani ŵamputile?”

Petulo ŵamkanile Yesu

⁶⁹ Petulo ŵaliji ali atemi kusa mluŵala lwa nyumba jila, pelepo mwali jwine jwamasengo ŵayice acimsalilaga kuti, “Nomwe ŵakwetu mwaliji ni Yesu jwa ku Galileya.”

⁷⁰ Nambo jwalakwe ŵakanile pameso pa ŵandu wosope, ŵatite, “Ngangumanyilila une yele yamkuŵecetayo.”

⁷¹ Piŵakopokaga Petulo kuja ku cipata, mwali jwine soni jwamasengo ŵam'weni, ni ŵatandite kwasalila ŵaŵaliji pelepowo kuti, “Ŵakulungwa ŵeleŵa ŵaliji ni Yesu jwa ku Nasaletiju.”

⁷² Petulo ŵakanile soni mwakulumbila kuti, “Kusyene nditu, Ngingum'manyilila kose jwele mundujo.”

⁷³ Nipo kali kapite kandaŵi, ŵandu ŵaŵaliji pelepo ŵala ŵayice ni kumsalila Petulo kuti, “Nditu nomwe ŵakwe soni mli ŵa mpingo* welewu, pakuti atamose kuŵeceta kwenu kukumjuwula.”

⁷⁴ Pelepo Petulo ŵatandite kulumbila* ni kulilwesa acitiji, “Nditu, Mlungu andende cilicose, mundu jweleju une Ngingum'manyilila kose.” Ndaŵi jijojo tambala jwatongwele.

⁷⁵ Sambano Petulo ŵakumbucile maloŵe gala giŵamsalile Yesu kuti, “Tambala mkanatongole, timciŵa mli munganile katatu kuti ngamkumanyilila.” Papopo ŵakopwece pasa, ni ŵalisile misosi kusyene ni canasa cakupundanganya.