Matayo 25 - Chiyawo Bible

Citagu ca aciŵali likumi

¹ “Pa jele ndaŵijo ya Ucimwene wa kwinani tiyicilandana ni yele yiyatendecele aciŵali likumi. Jemanjajo ŵajigele nyali syawo ni kujaga kukumcingamila mlombela.

² Aciŵali msano ŵaliji ŵakuloŵela, nipo msano ŵanewo ŵaliji ŵakalamuka.

³ Msano ŵakuloŵela ŵala ŵajigele nyali syawo, nambo nganajigala cile mawuta gane gapambali.

⁴ Nambo msano ŵakalamuka ŵala ŵajigalile cile mawuta gane ga pambali m'mabotolo gawo.

⁵ Pakuŵa kuti mlombela ŵacelewe kwisa, wosope ŵatandite gwesela ni ŵagonile.

⁶ “Sambano pakati cilo kwapikanice gumila kwakuti, ‘Mlombela ali mkwisa! Mkopoce mkamcingamile!’

⁷ Aciŵali likumi ŵala ŵajimwice, ni kutanda kupamba nyali syawo sila.

⁸ Ŵakuloŵela ŵala ŵaŵendile ŵakalamuka ŵala kuti, ‘Mtugaŵile mawuta, mlole nyali syetu sikusima.’

⁹ Nambo ŵakalamuka ŵala ŵajanjile kuti, ‘Iyayi, tukogopela kuti naga tutende myoyo, mawutago ngagatukwanila wosopewe. Uli mgambe kwawula ku sitolo mkasume genu.’

¹⁰ Piŵajawulaga kukusuma, mlombela ŵayice. Ŵiŵaliŵicile cilepe ŵala ni ŵajinjile najo pampepe m'nyumba ja cindimba; panyuma pakwe ŵawugele pa mlango.

¹¹ “Kaneko aciŵali ŵane ŵala nombe nawo ŵayice acitiji, ‘Ambuje, Ambuje, atuwugulile!’

¹² Nambo Mlombelajo jwatite, ‘Iyayi, Ngingum'manyilila jemanja!’ ”

¹³ Pakumalisya Yesu* ŵatite, “Sambanotu jemanja mŵeje mesope, pakuti ngamkumanyilila lisiku kapena ndaŵi jakwe.

Citagu ca ŵamasengo ŵatatu

¹⁴ “Ya Ucimwene wa kwinani mpaka tuwulandanicisye mwamti myi: Jwapali mundu juŵasakaga kwawula pa ulendo. Mkananyakuce, ŵaŵilasile ŵamasengo ŵakwe, ni ŵalecele cipanje cakwe.

¹⁵ Jwine ŵampele mbiya msano, jwine siŵili, nipo jwine mbiya jimpepe. Ŵampele jwalijose mwakulingana ni lunda lwakwe, ni ŵatyosile.

¹⁶ Jwamasengo juŵapocele mbiya syakwana msano jula, ŵatyosile kuja kutenda malonda ni ŵapatile soni sine syakwana msano.

¹⁷ Yalumo soni jwele juŵapocele mbiya syakwana siŵili jula, ŵapatile mbiya sine soni syakwana siŵili syakupwatika.

¹⁸ Nambo jwele juŵapocele mbiya jimo jula, ŵapite ni kuja kujisolela pasi mbiya ja mbujegwe jila.

¹⁹ “Pigapite masiku gamajinji, mbujegwe jula ŵawusile ni ŵaŵilasile ŵamasengo ŵakwe ŵala kuti amsalile yiŵatesile nasyo mbiya sila.

²⁰ Jwamasengo juŵapocele mbiya syakwana msano jula, ŵayice nasyo sine syakupwatikapo syakwana msano soni acitiji, ‘Ambuje, mwandecele mbiya syakwana msano. Mlole, mbatile sine syakwana soni msano, asi.’

²¹ Mbujegwe jula ŵatite, ‘Mwatesile cenene kwabasi, mcanda jwangu jwambone ni jwakulupicika. Sambano pakuŵa mwakulupicice pa yindu yamnono, tinjimŵika kuti mloleleje yindu yejinji. Myice kuti msangalale pampepe ni une mbujegwenu.’

²² “Nombe najo jwamasengo juŵapocele mbiya syakwana siŵili jula, ŵayice acitiji, ‘Ambuje, mwandecele mbiya syakwana siŵili. Mlole, mbatile sine syakwana siŵili, asi.’

²³ Mbujegwe jula ŵatite, ‘Mwatesile cenene kwabasi, mcanda jwangu jwambone ni jwakulupicika. Sambano pakuŵa mwakulupicice pa yindu yamnono, tinjimŵika kuti mloleleje yindu yejinji. Myice kuti msangalale pampepe ni une mbujegwenu.’

²⁴ “Nombe najo soni jwele juŵapocele mbiya jimo jula, jwayice acitiji, ‘Ambuje, une namanyilile kuti m'mwejo mli mundu jwakusawusya. Mkusagowolaga kwele kwanganimpanda kose, nipo mkusasonganganya yindu kwele kunganim'misa kose mbeju.

²⁵ Ni naliji mkogopa, myoyo najile kukujisolela pasi mbiya jenu jila. Mlole, ngati aji sambano mbiya jenujo.’

²⁶ Pele mbujegwe jula ŵamjanjile kuti, ‘M'mwejo jwamasengo jwangalumbana ni jwaulesi. Ana wele utendewu mwamanyilile kuti unejo ngusagowola kwele kwamkanimbanda, nipo ngusasonganganya yindu kwele kwanganimisa mbeju?

²⁷ Sambanotu yikaliji cenene mkajiŵice ku banki mbiya jangujo, une pakuwuja ningajipocele pamo ni syakonjecesya syakwe.

²⁸ Mumsumule mbiyajo ni mjipelece kwa jwele jwakwete mbiya syakwana likumijo.

²⁹ Pakuŵa jwalijose jwakwete cindu, tacimjonjecesya yine, myoyo tacikola yejinji kwakupundanganya. Nambo jwele jwamkanakola kandu, atamose kele kakweteko tacimsumulape.

³⁰ Sambano jwamasengo jwangali mateju mkamponye kusa ku cipi. Kweleko tacilila ni kulumanya meno.’

Kulamula kwakumalisya

³¹ “Pitaciyika Mwanace jwa Mundu* mlumbili lwakwe pampepe ni malayika* gosope, tacitama pa citengu cakwe ca ucimwene.

³² Tacasonganya ŵandu ŵa ngosyo syosope pameso pakwe, nipo tacalekanganya mpela mwele jwakucinga mwakusalekanganicisya ngondolo ni mbusi.

³³ Ngondolo tacisiŵika ku mkono wakwe wamlyo, nambo mbusi ku mkono wakwe wa mciji.

³⁴ Sambano jwalakwejo mpela mwenye tacasalila ŵa ku mkono wamlyo kuti, ‘Yikani akuno jemanja ŵampegwile upile ni Atati ŵangu. Jinjilani mu Ucimwene uŵamlinganyicisye cipanganyicisye cilambo capasi.

³⁵ Pakuŵa jangwete sala, nipo mwambele yakulya, jangwete njota, nipo mwambele cakumwa. Naliji mlendo, nipo mwambocele ku nyumba kwenu.

³⁶ Naliji jwamakonope, nipo mwambwecice, naliji mkulwala, nipo mwayice kukundola, naliji m'nyumba ja ukayidi, nipo mwayice kukungungulusya.’

³⁷ “Pelepo ŵandu ŵakulungama ŵala tacitiji kuti, ‘Ambuje, ana lisikuci litwaweni wawo jili jakwete sala, uwe ni kwalisya, pane jili jakwete njota, uwe ni kwapa cakumwa?

³⁸ Lisikuci litwaweni ali mlendo, uwe ni kwapocela m'majumba getu, pane ali ŵamakonope, uwe ni kwaweca?

³⁹ Lisikuci twaweni ali mkulwala pane ali m'nyumba ja ukayidi, uwe ni kwisa kukwakungulusya?’

⁴⁰ “Mwenyejo tacajanga kuti, ‘Nditu ngumsalicisya kuti ndaŵi jilijose pimwamtendelaga yeleyi jwine jwalijose jwa acalongo acimjangu ŵacanandiŵa, mwaliji mkundendela soni une.’

⁴¹ “Kaneko mwenyejo tacasalila ŵa ku mkono wakwe wamciji ŵala kuti, ‘Mtyoce apa, jemanja ŵandu ŵalwesece. Jawulagani ku moto wangamala, wele Mlungu ŵamlinganyicisye Satana* ni malayika gakwe.

⁴² Une jangwete sala, nambo nganimumba yakulya, jangwete njota, nambo nganimumba cakumwa.

⁴³ Naliji mlendo, nambo nganimumbocela m'majumba genu. Naliji jwamakonope, nambo nganimumbweca. Naliji mkulwala, naliji soni ku nyumba ja ukayidi, nambo nganimyika kukungungulusya.’

⁴⁴ “Pelepo nombe nawo soni tacitiji kuti, ‘Ambuje, ana lisikuci litwaweni jili jakwete sala, pane jili jakwete njota, pane ŵamakonope, lisikuci twapikene kuti ali mkulwala, pane ali m'nyumba ja ukayidi, uwe ni ngakamucisya?’

⁴⁵ Mwenyejo tacajanga kuti, ‘Nditu ngumsalicisya kuti, ndaŵi jilijose pimwakanaga kwakamucisya ŵane ŵali ŵa acalongo acimjangu atamose ŵacanandiŵa, mwakanaga kungamucisya une jwakwe.’

⁴⁶ Pelepo jemanjajo tacityoka kwawula ku cilango cangali mbesi, nambo ŵakulungama ŵala tacijawula ku umi wangamala.”*