Matayo 24 - Chiyawo Bible

Yesu ŵaŵecetele cile ya konasika kwa Nyumba ja AMBUJE

¹ Yesu* ŵakopwece ku Nyumba ja AMBUJE, nipo piŵaliji mkwawula, ŵakulijiganya* ŵakwe ŵayice ni kumlosyaga yiŵatite utaŵe wakwe wa Nyumbajo.

² Nambo Yesu ŵasalile kuti, “Nambi ngati mkuyiwona yosope yeneyi? Nditu ngumsalicisya kuti ngasipasigala kose liganga atamose limo lyakusajika pacanya pa lijakwe; gosope tigacigumulidwa.”

Ya yisawusyo ni yipwetesi

³ Sambano Yesu piŵatemi pasi, Petumbi lya Olifi, ŵakulijiganya ŵakwe ŵayice kwa jwalakwe pacisyepela ni ŵatite, “Atusalile, ana yeleyi tiyicitendekwa cakaci? Ana ticicitendekwa cici kulosya kuti ndaŵi jikwanile jakwika soni kwa ŵalakwe nambo soni mbesi ja cilambo capasi?”

⁴ Yesu ŵajanjile kuti, “Mkalamuce kuti jwine jwalijose akasamsokonesya.

⁵ Ŵandu ŵajinji taciyika acikolangaga lina lyangu nipo tacitiji kuti, ‘Mkulupusyo jwakulocesyedwa jula ni une,’ nipo tacasokonesya ŵandu ŵajinji.

⁶ Timcipikana lisegwe lya ngondo pakuŵandicila ni ngani sya ngondo sya kwakutalika. Nambo jemanja mkatenda woga. Yindu yeleyi yikwenela kutendekwa, nambo ngayikugopolela kuti mbesi ja cilambo capasi jiyice.

⁷ Mitundu ja ŵandu jakulekanganalekangana tijicimenyana ngondo, soni ucimwene tiwucijimucilana ni ucimwene ujakwe. Tikuciŵa kwana sala ni yisicinya ku malo gakulekanganalekangana.

⁸ Yosopeyi kuli kutanda kwa yisawusyo.

⁹ “Kaneko ŵandu tacimpeleka kuti mkapedwe cilango, kaneko tacimwulaga. Mitundu josope ja ŵandu, tijicimŵenga jemanja ligongo lyakunguya une.

¹⁰ Pa jele ndaŵijo ŵandu ŵajinji tacijasa cikulupi cawo, tacipelekana nipo soni taciŵengana.

¹¹ Tikuciwoneka ŵakulocesya ŵa unami ŵajinji ŵele ŵitacisokonesyaga ŵandu ŵajinji.

¹² Sambano pakuŵapo yakusakala tiyicitupilatupila, cinonyelo ca ŵandu ŵajinji ticicinandipa.

¹³ Nambo jwalijose jutacipilila mpaka pambesi, ni jutacikulupuka.

¹⁴ Nipo Ngani Syambonesi syakwamba ya Ucimwene wa Mlungu* tisicilalicidwa pa cilambo cosope capasi, kuti ŵandu ŵa mitundu josope asipikane, kaneko mbesi ni tijiciyika.

Cindu cakogoya

¹⁵ “Timciciwona ‘Cindu cakogoya cila’ ciŵacisasile jwakulocesya* Daniele cili cijimi pa malo gamaswela.” (M'mwejo ŵamkuŵalanga mpikanicisye cenene.)

¹⁶ Pelepo ŵali ku Yudeya atilile ku matumbi.

¹⁷ Jwele jwali pa msakasa wa nyumba jakwe, akatuluka ni kuja kwinjila soni m'nyumba kuti akajigale katundu.

¹⁸ Jwalijose jwali ku migunda, akasajawula soni ku nyumba kuti akajigale cakuwala.

¹⁹ Tiyiciŵa yakogoya kwa acakongwe ŵele ŵitaciŵa ali akwete cilu, nipo soni acakongwe ŵele ŵitaciŵa ni ŵanace ŵakonga pa gele masikugo.

²⁰ Mpopele kwa Mlungu kuti ndaŵi jitimcitilaga, jikasijiŵa ndaŵi jakusisima, kapena lisiku lyakupumula.*

²¹ Pakuti yisawusyo yakogoya mnope tiyiciwoneka gele masikugo, nganiyiwoneceje soni citandilile cipanganyicisye Mlungu cilambo capasi mpaka sambano jino, nipo ngasiyiwoneka soni.

²² Gele masikugo, Ambuje akaŵe kuti nganagapungula, mkanapagwa mundu jwalijose jwakakulupwice. Nambo Mlungu tacigapungula masikugo kwa ligongo lya ŵandu ŵaŵasagulidwe ni jwalakwe msyene.

²³ “Pa jele ndaŵijo naga jwine tamsalile kuti, ‘Mlole, ali apanotu Klistu* jula!’ Kapena ‘Ajo jwali apopojo!’ Kasimkulupilila kose.

²⁴ Pakuti tikuciwoneka ŵandu ŵa unami ŵitaciŵecetaga kuti, ‘Klistu jula ni une,’ pane kuti, ‘Jwakulocesya jula ni une.’ Ŵandu ŵa unamiŵa tacitendaga yindu yamacili ni yakusimonjesya kuti naga kuli kwakomboleka ŵasokonesye atamose ŵandu ŵakusagulidwa ŵa Mlungu.

²⁵ Mpikanicisye, une nimsalile cile jemanja yeleyi ndaŵijo mkinijikwane.

²⁶ “Ni ligongo lyakwe naga ŵandu tamsalile kuti, ‘Mlole, Klistu ali ako ku cipululu,’ kasimjawula. Pane taciti, ‘Mlole, ali mkati mwa nyumba’ mkakulupilila.

²⁷ Pakuti Mwanace jwa Mundu* taciyika mpela njasi jajikusamesya ni kuŵala kwinani kutyocela kungopoko lyuŵa mpaka kungapilo lyuŵa.”

²⁸ Pajatu ŵatite, “Kulikose kwaciwilile cindu, matumbusi gakusasonganaga kweleko.

Ya kwisa kwa Mwanace jwa Mundu

²⁹ “Patiyicimala yisawusyo ya gele masikugo, lyuŵa tiliciŵilila, mwesi tiwucileka kuŵala, ndondwa tisicigwa kutyocela kwinani, nipo macili ga kwinani tigacitenganyika.

³⁰ Pelepo cimanyisyo ca Mwanace jwa Mundu ticiciwoneka kwinani. Ŵandu ŵa ngosyo syosope sya pacilambo capasi tacilila, nipo tacimwona Mwanace jwa Mundu ali mkwisa m'mawunde mwamacili ni lumbili lwekulungwa.

³¹ Tilicipikanika lipenga lyamacili, nipo jwalakwe tacigatuma malayika* gakwe ku mbali syosope mcece sya cilambo capasi kukwasonganya ŵandu ŵasagulidwe ni Mlungu kutyocela kumtepa wine wa cilambo capasi mpaka kumbesi jine soni jijakwe.”

Lijiganyo lya citela ca mkuju

³² “Mcilolecesye citela ca mkuju ni mlijiganye kutyocela pa celeco. Pimkuwona kuti nyambi syakwe sitandite kulosya uŵisi, nipo masamba gatandite kusipuka, mkusamanyilila kuti cawu ciŵandicile.

³³ Myoyo soni, pitimciyiwona yosope yimbecete yila, tim'manyilile kuti Mwanace jwa Mundu aŵandicile.

³⁴ Kusyene ngumsalicisya kuti yosopeyi tiyicitendekwa ŵandu ŵa mpago awunowu mkanamale kuwa wosope.

³⁵ Kwinani ni cilambo capasi tiyicimala, nambo maloŵe gangu ngasigamala macili kose.”

Lisiku lyambesi ngalikumanyika

³⁶ Nambo ya lisiku kapena ndaŵi jakwe, pangali jwakujimanyilila. Atamose malayika gakwinani ngagakumanyilila. Atamose uneji Mwanace ngangumanyilila, nambo Atati jikape ni ŵakumanyilila.

³⁷ Lisiku lyakwisa kwa Mwanace jwa Mundu tiliciŵa mpela muyatendecele yindu mu ndaŵi ja Nowa.

³⁸ Mu gele masikugo, mkaniciyice cikumba ca mesi, ŵandu ŵagambaga kulya ni kumwa, ŵaliji mkulombela ni kulombedwa, mpaka lisiku liŵajinjile Nowa m'combo mula.

³⁹ Ŵandu nganamanyilila kandu kalikose pa yele yitiyitendekwe kuyicila mpaka pa ndaŵi cicayice cikumba ca mesi ni kwajonanga wosope. Tiyiciŵa soni myoyo pitaciyika Mwanace jwa Mundu.

⁴⁰ Pa ndaŵi jelejo ŵandu ŵaŵili taciŵa ali mu mgunda, jumo tacimjigala, jwinejo tacimleka.

⁴¹ Acakongwe ŵaŵili taciŵa ali mkutwa, jumojo tacimjigala, jwinejo tacimleka.

⁴² “Jemanja soni sambano mŵeje mesope, ligongo ngamkumanyilila lisiku litaciyika Ambuje ŵenu.

⁴³ Nambo m'manyilile kuti, msyene nyumba akamanyilile ndaŵi jakuyicila jwawiyi, ni kuti akaliji ali atemi mesope, ngamkanakunda kuti jwawiyi akase nyumbajo.

⁴⁴ Myoyo soni jemanja mŵeje ŵa cile ndaŵi syosope, ligongo Mwanace jwa Mundu taciyika pa ndaŵi jingamkwembeceya jemanja kuti tayice.

Jwamasengo jwakulupicika ni jwine jwangakulupicika

⁴⁵ “Ana nduni jwali jwamasengo jwakulupicika ni jwalunda, jwele ambuje ŵakwe ŵamsagwile kuti ŵaloleleje ŵamasengo ŵakwe wosope, ni ŵagaŵileje yakulya yawo mu ndaŵi jakwe?

⁴⁶ Jwana upile jwamasengo jwele tacimsimana pakuwuja mbujegwe ali mkutenda yeleyi mu ndaŵi jakwe.

⁴⁷ Kusyene ngumsalila kuti mbujegwejo tacimŵika jwalakwejo kuti aŵe jwakulolela yipanje yakwe yosope.

⁴⁸ Nambo naga ali jwamasengo jwangakulupicika, taciti mu mtima mwakwe kuti, ‘Ambuje ŵangu akucelewa.’

⁴⁹ Ni tacitanda kwaputa ŵamasengo acimjakwe, nipo soni kulya ni kumwa pampepe ni ŵandu ŵakolelwa.

⁵⁰ Sambano mbujegwe jwamasengo jula taciyika mwacisisimucisya, pa lisiku lyele jwalakwe ngakumanyilila.

⁵¹ Myoyo tacimwonesya yipwetesi yakogoya kwabasi, nipo tacimjasa ku malo ga ŵandu ŵa unami, kweleko ticilila ni kulumanya meno.