Matayo 23 - Chiyawo Bible

Yesu ŵakalamwisye ŵandu ya aciŵalimu ŵa Malamusi ni ya Afalisi

¹ Kaneko Yesu* ŵaŵecete ni likuga lya ŵandu ŵajinji pampepe ni ŵakulijiganya* ŵakwe.

² Ŵasalile kuti, “Aciŵalimu ŵa Malamusi* ni Afalisi* akwete ukumu wakugopolela malamusi ga Mose.

³ Ni ligongo lyakwe mtendeje ni kuyikuya yosope yakusamjiganya jemanjajo. Nambotu mkasimyikuyaga yitendo yawo, pakuti ngakusayitenda yele yakusajiganyaga.

⁴ Jemanjajo akusataŵaga misigo ja usito ni kwatwikaga ŵandu, nambo kutendaga jemanjajo akakusaka kunyakula atamose kwamba kwayape ni cala cawo.

⁵ Yosope yene yakusatenda akusagambaga kuyitenda kuti ŵandu ŵalole. Akusalitaŵilila tupukutu twatukulungwakulungwa twa maloŵe ga Mlungu pawusyo pawo ni m'makono mwawo. Akusalewuyaga soni nyenje sya yakuwala yawo.

⁶ Akusanonyela malo gakucimbicika pa yindimba nipo soni yitengu ya ucimbicimbi mnope ku nyumba sya mapopelo.*

⁷ Akusanonyela soni kuti ŵandu ŵakomasyeje mwakwacimbicisya m'misika, soni kuti ŵakolanjeje kuti, ‘Cemwalimu.’

⁸ Nambo jemanja mkakundaga kuti ŵandu amkolanjeje ‘Cemwalimu,’ pakuti mkwete mwalimu jumpepe, nipo wosope mli ŵa pa ulongo.

⁹ Kasimumkolangaga soni mundu pasi pano kuti ‘Atati,’ pakuti mkwete Atati ŵamope basi, ni Atati ŵenu ŵakwinani.

¹⁰ Kasimkundaga soni kuti ŵandu amkolanjeje ‘Acambuje,’ pakuti Ambuje ŵenu ali ŵamope, ni Klistu.*

¹¹ Pasikati penupa jwamkulungwa aŵeje jwakutumicila jwenu.

¹² Pakuti jwalijose jwakulikusya, tacimnondiya, nipo jwalijose jwakulinondiya, tacimkusya.

Yesu ŵajamwice aciŵalimu ŵa Malamusi ni Afalisi

¹³ “Mkwete likungu jemanja aciŵalimu ŵa Malamusi ni Afalisi, jemanja mli ŵandu ŵa unami! Ligongo mkusawugalaga pa mlango wa Ucimwene wa kwinani kuti ŵandu akajinjilamo. Jemanja mwacimsyene ngamkwinjilamo nipo mkwasiŵilicisyaga ŵandu ŵakulinjilila kuti ajinjilemo. [

¹⁴ Mkwete likungu aciŵalimu ŵa Malamusi ni Afalisi, jemanja mli ŵandu ŵa unami! Mkusimwalilaga cipanje acakongwe ŵamasije* nambo soni mkasimwalyetaga pakulewuyaga melepe mapopelo genu ga unami. Ligongo lya yeleyi, Mlungu tacimkwapula kwakogoya.]

¹⁵ “Mkwete likungu, aciŵalimu ŵa Malamusi ni Afalisi, jemanja mli ŵa unami! Mkusajenda ma ulendo gamajinji m'nyasa ni pamkuli, kusosasosa mundu atamose jumpepe kuti apitikuce ni kuŵa jwakulijiganya jwenu. Nipo pati mumsimene, mkusimumtendekasyaga kuŵa jwakwenela kupata yisawusyo ku Jahena* kwakumpunda jemanja kaŵili.

¹⁶ “Mkwete likungu ŵakulongolela ŵimli ŵangalola! Jemanja mkusatiji, ‘Naga mundu akulumbila pakolanga Nyumba ja AMBUJE, kulumbila* kwakweko kwangali mate. Nambo naga akulumbila pakolanga golidi* jwali m'Nyumba ja AMBUJE, alitaŵile nipo atendeje yalumbileyo.’

¹⁷ Ŵandu ŵakuloŵela ni ŵangalola! Cacipundile ni capi, golidi jula kapena Nyumba ja AMBUJE jele jajikutendekasya golidijo kuti aŵe jwamswela?

¹⁸ Mkusatiga soni, ‘Naga mundu akulumbila pakolanga pa malo gakupelecela mbopesi, kulumbila kwakweko kwangali mate. Nambo naga akulumbila pakolanga mbopesi jajili pa malo gakupelecela mbopesi, nikuti jwelejo alitaŵile nipo akwenela kutenda yalumbileyo.’

¹⁹ Ŵandu ŵangalola jemanja! Cacipundile ni capi, mbopesi kapena malo gakupelecela mbopesi gagakutendekasya kuti mbopesijo jiŵe jeswela pameso pa Mlungu?

²⁰ Sambanotu mundu jwakusalumbila pakolanga pa malo gakupelecela mbopesigo, akusalumbila soni yosope yele yayili pelepoyo.

²¹ Naga akulumbila soni kuti, pajili Nyumba ja AMBUJE, alumbile soni pa yosope yayili m'Nyumbamo.

²² Nipo naga akulumbila kuti, kwinani nditu, alumbile soni pa citengu ca Ucimwene wa Mlungu,* nipo soni pa jwalakwe jwele jwakusatamaga pacitengupo.

²³ “Mkwete likungu jemanja aciŵalimu ŵa Malamusi ni Afalisi, ŵandu ŵa unami! Mkusapeleka ca likumi ca tumbeju twakununjila, ni tumbeju twakunonyelesya, nambo jemanja mkusimnyosya yindu yayikulungwa ni yakusosekwa yisyesyene pa malamusi ga Mlungu, mpela kulamula kwa cilungamo, kutenda canasa, ni kuŵa ŵakulupicika. Mkaŵajilene kutenda yeleyi, nambo soni ngaleka yineyi.”

²⁴ Acimlongola ŵangalola, mkusakung'undaga cakumwa cenu kuti mtyosyemo kamembe, nambo mkusamilaga ngamila.*

²⁵ “Mkwete likungu, aciŵalimu ŵa Malamusi ni Afalisi, ŵandu ŵa unami! Mkusacapaga kusa kwa mgawo ni mbale, nambo mkati mwakwe muli mwegumbale ni yindu yimpatile mwakwakula nipo soni mwalupuso.

²⁶ Afalisi ŵangalola jemanja! Mtande kucapa mkati mwa mgawo, nipo kusa kwakweko soni tikuswejele.

²⁷ “Mkwete likungu jemanja aciŵalimu ŵa Malamusi ni Afalisi, ŵandu ŵa unami! Mkulandana ni malembe gamapace njelesa, gele gagakuwoneka kusalala kwa kusape, nambo mosopemo mkati mwakwe muli mwamgumbale ni mawupa ga ŵandu ŵawe ni yindu yine yewole.

²⁸ Yalumo soni jemanja, mkusawonekaga kwa ŵandu mpela mli ŵandu ŵakulungama, nambo mkati mwenu mugumbele ni unami ni yakusakala yine.

Yesu ŵaŵecete cilepe ya cilango cawo

²⁹ “Mkwete likungu, aciŵalimu ŵa Malamusi ni Afalisi, ŵandu ŵa unami! Mkusalinganyaga cenene malembe ga ŵakulocesya, nipo mkusasalalisya misati ja ŵandu ŵakulungama.

³⁰ Ni mkusatiga, ‘Tukaŵe ni umi mu ndaŵi ja acinangolo ŵetu jila, uweji ngamkanituwulaga nawo ŵakulocesyawo iyayi.’

³¹ Pakutenda myoyopo, mkwiticisya mwacimsyene kuti jemanja mli yisukulu ya ŵandu ŵiŵawuleje ŵakulocesyawo.

³² Sambano, malisyani masengo giŵagatandite acinangolo ŵenu ŵala.

Yesu ŵaŵecete cilepe ya cilango cawo

³³ “Jemanja majoka, ŵanace ŵa mapili, timcikulupuka camtuli cilango ca ku Jahena?

³⁴ Mpikanicisye sambano! Une tinjimtumicisya ŵakulocesya nipo soni ŵandu ŵalunda ni aciŵalimu ŵa Malamusi. Jemanja timcawulaga ni kwakoleka pa msalaba. Ŵane timcaputa m'nyumba syenu sya mapopelo, nipo timcasawusya pakwatoposya kutyocela ku musi wine mpaka ku musi wine.

³⁵ Kwakuti cilango ticicimgwila ligongo lya ŵandu wosope ŵakulungama ŵiŵawulajidwe, kutandila kuwulajidwa kwa Abele, mpaka kuwulajidwa kwa Sakaliya, mwanace jwa Balakiya jwele juŵamwulajile m'Nyumba ja AMBUJE pasikati pa Malo Gamaswela ni malo gakupelecela mbopesi.

³⁶ Nditu ngumsalicisya kuti, cilango ca yosopeyi ticicagwila ŵandu ŵa mpago awuno.

Cinonyelo ca Yesu pa Yelusalemu

³⁷ “Jemanja ŵandu ŵa mu msinda wa Yelusalemu! Jemanja ŵandu ŵa mu msinda wa Yelusalemu! Mkusawulaga ŵakulocesya, ni kwaponya maganga ŵandu ŵele Mlungu akusamtumicisyaga. Ana kalingwa kimbele ndili mkusosa kuti nimsonganye jemanja wosope, mpela mujikusasonganyicisya nguku ŵanace ŵakwe kusi kwa mapapiko gakwe, nambo jemanja mwakanile!

³⁸ Nditu nyumba jenu jekulungwaji tijicigalawuka kuŵa masame.

³⁹ Nipo ngumsalicisya kuti, ngasimumbona soni kose mpaka patimciti, ‘Jwana upile jwele jwakwisa mu lina lya Ambuje.’ ”