Matayo 22 - Chiyawo Bible

Citagu ca cindimba ca ulombela

¹ Yesu* ŵaŵecete soni ni ŵandu ŵala myitagu. Ŵatite,

² “Ya Ucimwene wa kwinani mpaka tuyilandanicisye mwamti myi: Mwenye jwine ŵamlinganicisye mwanagwe cindimba ca ulombela.

³ Ŵatumile ŵamasengo ŵakwe kuti akasalile ŵandu ŵiŵaŵilanjidwe ku cindimba cila kuti akayiceje, nambo ŵanduwo ŵakanile.

⁴ Ŵatumile soni ŵamasengo ŵane acitiji, ‘Mkasalile ŵakuŵilanjidwa ŵala kuti yakulya ninganyisye yili tayale. Mbuleje ng'ombe ni nyama sine syakunakana. Yosope yilinganyidwe, yikani ku cindimba ca ulombela.’

⁵ Nambo ŵakuŵilanjidwawo nganayitendela kose masengo, ŵagambile kutyokangana kuja kukutenda masengo gawo; jwine ku mgunda wakwe, jwine ku masengo gakwe ga malonda.

⁶ Ŵane ŵakusigala ŵala, ŵakamwile ŵamasengo ŵa mwenye ŵala ni ŵasawisye ni kwawulaga.

⁷ Pelepo mwenye jula ŵapile mtima, kwakuti ŵatumile ŵa ngondo ŵakwe kuti akajonanje ŵiŵawuleje acimjawo ŵala, ni kwajocela msinda wawo.

⁸ Kaneko ŵasalile ŵamasengo ŵakwe ŵala kuti, ‘Cindimba ca ulombela ni cili tayale, tumasile kukolosya, nambo ŵakuŵilanjidwa ŵala ŵaliji ŵangaŵajilwa.

⁹ Jawulani sambano m'malekano ga m'misewu, mkamŵilanje jwalijose jutimkasimangane najo, kuti ayice akuno ku cindimba ca ulombela.’

¹⁰ Kaneko ŵamasengo ŵala ŵajawile ku misewo ni kwasonganya wosope ŵiŵasimangene nawo, ŵambone ni ŵangalumbana ŵakwe. Nipo nyumba jakutendela cindimba jagumbalene ŵandu.

¹¹ “Mwenye jula piŵajinjile m'nyumba mula kukwalola ŵakuŵilanjidwa ŵala, ŵamsimene jwine ali jwangawala cakuwala ca ulombela.

¹² Ni ŵamwusisye kuti, ‘Ana m'mwe mjangu, mjinjile uli amuno mkanimkola cakuwala ca ulombela?’ Jwalakwe jula ŵagambile kuti jii, kusoŵa cakwanga.

¹³ Papopo mwenye jula ŵasalile acacanda ŵakwe kuti, ‘Mumtaŵe makono ni ngongolo syakwe ni mkaponye kusa ku cipi. Kweleko takalile ni kulumanya meno.’ ”

¹⁴ Sambano Yesu ŵatite, “Pakuti ŵakuŵilanjidwa apali ŵajinji, nambotu ŵakusagulidwa ni ŵakuŵalanjika.”

Ya kukoma msongo

¹⁵ Ndaŵi jine Afalisi* ŵapite kukutenda mtemela ni ŵataŵile yakwisa kukumsapula Yesu pakamwa.

¹⁶ Ŵatumile ŵakulijiganya* ŵawo ŵane pamo ni ŵane ŵa mcipani ca Helodi* kwa Yesu. Jemanjaji ŵamsalile Yesu kuti, “Cemwalimu, tukumanyilila kuti ŵalakwe akusaŵecetaga yisyesyene, nipo akusajiganya mwakuwona ya malamusi ga Mlungu, soni ŵangamjogopa mundu jwalijose, ligongo ŵalakwe ngakusawona kuti ŵalakwe ali mundu jwamti uli.

¹⁷ Ni tuteje atusalile yakuganisya. Ana Malamusi ga Mlungu gakusatukunda kuti tukomeje msongo kwa Mwenye jwa ku Loma,* kapena iyayi?”

¹⁸ Nambo Yesu pakusimanyilila nganisyo syawo syakusakala, ŵatite, “Jemanja ŵandu ŵa unami, ligongo cici mkulinga une melepe?

¹⁹ Mundosye mbiya ja msongo.” Jemanjajo ŵampele nditu mbiya ja msongojo.

²⁰ Pelepo jwalakwe ŵawusisye kuti, “Ana ngopeji ni linali ya ŵani?”

²¹ Jemanjajo ŵatite, “Yosopeyi yili ya Mwenye jwa ku Loma.” Papopo Yesu ŵasalile kuti, “Yambone, sambano pelekani kwa Mwenye yayili yakwe ya Mwenye, nipo soni mpelece kwa Mlungu yayili yakwe ya Mlungu.”

²² Ŵanduwo piŵapikene yeleyi, lwamasile lunda, nipo ŵamlesile ni ŵatyosilepo.

Ciwusyo cakwayana ni kwimuka ku ŵawe

²³ Lisiku lilyolyo Asaduki* ŵane ŵayice kwa Yesu. (Jemanjajo ŵatiji kuti ŵandu ŵakuwa ngasajimuka ku ŵawe.) Ŵamwusisye Yesu kuti,

²⁴ “Cemwalimu, Mose* ŵatite, ‘Naga jwamlume akuwa ni kumleka jwamkongwe jwakwe ali jwangali ŵanace, mlongo mjakwe jwa jwakuwajo amlombe jwamkongwejo kuti amŵelecele ŵanace mlongo mjakwe jula.’

²⁵ Sambano ŵapali acalume msano ni ŵaŵili ŵa pa ulongo akuno. Jwandanda ŵamlombile jwamkongwe, nambo ŵawile mkinamŵelecele jwamkongwejo ŵanace, myoyo ŵamlecele mlongo mjakwe ŵamkwakwe ŵala.

²⁶ Yeleyi yatendekwe soni kwa jwamlume jwaŵili, jwatatu mpaka msano ni ŵaŵili wosope.

²⁷ Nipo pambesi pakwe nombe najo jwamkongwe jula jwawile.

²⁸ Nambi sambano pa lisiku lyakwimuka ŵandu ku ŵawe, ana msyene jwamkongwejo taciŵa jwapi, pakuti ŵandu msano ni ŵaŵili ŵa pa ulongo ŵala, wosopewo ŵamlombile jwamkongwejo?”

²⁹ Yesu ŵajanjile kuti, “Mkulemwa ligongo ngamkumanyilila Malemba, atamose soni macili ga Mlungu.

³⁰ Pakuŵatu pakwimuka ŵakuwa, pangali soni yakulombela kapena kulombedwa. Wosope taciŵa mpela malayika* kwinani.

³¹ Sambano yakuti ŵandu tacijimuka ku ŵawe, ana nganimŵalanga yiŵasasile Mlungu? Jwalakwejo jwatite kuti,

³² ‘Une ndili Mlungu jwa Abulahamu,* Isaki, ni Yakobo?’* Nikutitu jwalakwe nganaŵa Mlungu jwa ŵandu ŵawe, nambo jwa ŵandu ŵa cijumi.”

³³ Ŵandu ŵajinji ŵiŵaliji pelepo piŵapikene yeleyi, ŵasimonjile mnope ni yiŵaliji mkwiganya Yesu.

Ya lilamusi lyekulungwa

³⁴ Afalisi piŵapikene kuti Yesu ŵasisisye Asaduki, jemanjajo ŵasongene pampepe.

³⁵ Nipo jumo mwa jemanjajo, mwalimu jwa Malamusi, ŵamwusisye Yesu ciwusyo kuti ampale mkamwa.

³⁶ Ŵatite, “Cemwalimu, ana mwa malamusi gosope ga Mlungu, lyekulungwa ni lyapi?”

³⁷ Yesu ŵamjanjile kuti, “Mwanonyele Ambuje, Mlungu jwenu ni mtima wenu wosope, ni umi wenu wosope ni macili genu gosope.

³⁸ Lyeleli ni lilamusi lyekulungwa soni lyandanda nditu.

³⁹ Lyaŵili lyakwe lyakulandana nalyo ni ali: Mumnonyeleje mjenu mpela mwamkulinonyelela m'mwe mwasyene.

⁴⁰ Malamusi gosope ga Mose soni yosope yiŵajiganyisye ŵakulocesya, yikusasimanikwa pa malamusi gaŵiliga.”

Ya Mkulupusyo jwakulocesedwa jula

⁴¹ Afalisi piŵasongangene pampepe, Yesu ŵawusisye kuti,

⁴² “Mkuganisya cici ya Mkulupusyo jwakulocesedwa jula? Mkusatiga ali mwanace jwa ŵani?” Jemanjajo ŵajanjile kuti, “Jwalakwejo ali mwanace jwa Daudi.”*

⁴³ Jwalakwe ŵawusisye kuti, “Nambi uli sambano kuti Daudiwo ni lunda lwakutyocela kwa Msimu Ŵaswela, akumkolanga Mkulupusyo jwakulocesedwa jula kuti ‘Ambuje?’ Daudi ŵatite,

⁴⁴ ‘Ambuje ŵasalile Ambuje ŵangu kuti, mtame ku mkono wangu wamlyo, mpaka pitinatende amagongo ŵenu kuti aŵe mpela cakuliŵatila sajo syenu.’ ”

⁴⁵ “Naga Daudi akumkolanga Mkulupusyo jwakulocesedwa jula kuti ‘Ambujegwe,’ ana mpaka yikombolece uli kuti aŵe mwanace jwakwe?”

⁴⁶ Paliji pangali atamose jumo jose juŵapakombwele kumjanga atamose liloŵe limo. Sambano kutandila lisiku lyelelyo paliji pangali soni mundu juŵalimbile mtima kuti amwusye yiwusyo.