Matayo 21 - Chiyawo Bible

Yesu ŵajinjile ni ucimbicimbi mu Yelusalemu

¹ Yesu* ni ŵakulijiganya* ŵakwe piŵaŵandicilaga ku Yelusalemu, ni kwika ku Betifagi ku Litumbi lya Olifi, Yesu ŵatumile ŵakulijiganya ŵakwe ŵaŵili,

² ni ŵasalile kuti, “Mjawule m'musi wumkuwuwonawo, patimkagambe kwinjila m'musimo, timkajisimane bulu jili citaŵile, ni mwanace jwakwe ali pampepe najo. Mkasigopole ni kwisa nasyo akuno.

³ Naga jwine akamwusye kandu, jemanja mkajile kuti, ‘Ambuje akwete nasyo masengo, pitagambe kumalana nasyo, tasitumisye ndaŵi jijojo.’ ”

⁴ Yeleyi yaliji myoyo kuti yitendekwe yiŵaŵecete jwakulocesya* Sakaliya kuti,

⁵ “Usalilani msinda wa Siyoni* kuti, ‘Mlole mwenye jwenu akwisa kwenumwe. Ali jwakulinandiya nipo akwesile pa bulu, yisyene nditu akwesile pa mwanace jwa bulu, jwakunyakula katundu.’ ”

⁶ Sambano ŵakulijiganya ŵala ŵajawile nditu ni ŵatesile mpela muŵalamulile Yesu jemanjajo.

⁷ Ŵayice najo bulu ni mwanace jwakwe jula, ni ŵaŵisile yakuwala yawo pa mgongo pa acibuluwo, nipo Yesu ŵakwesilepo.

⁸ Ŵandu ŵajinji ŵatandikaga yakuwala yawo mu msewu, nipo ŵane ŵakatile nyambi sya yitela ni kusijala mumsewo.

⁹ Ŵandu ŵajinji ŵiŵaliji pasogolo, ni ŵane ŵiŵaliji munyuma, ŵatandite gumila acitiji, “Ucimbicimbi kwa Mwanace jwa Daudi.* Jwana upile jwakwisa mu lina lya Ambuje. Ucimbicimbi kwa Mlungu kwinani mnope.”

¹⁰ Yesu piŵajinjile mu Yelusalemu, msinda wosopewo watenganyice, ŵane ŵawusyaga kuti, “Ana nduni jweleju?”

¹¹ Sambano wosope ŵala ŵajanjile kuti, “Jweleju ni jwakulocesya Yesu jwakutyocela ku Nasaleti, cilambo ca Galileya.”

Yesu ŵaswejesye Nyumba ja AMBUJE

¹² Yesu ŵajinjile m'Nyumba ja AMBUJE ni kwakoposya ŵandu wosope ŵaŵaliji mkutenda malonda gakusuma ni kusumisya yindu mwelemo. Ŵapikwisye matebulo giŵatendelaga malonda gakucenganya mbiya, nambo soni yitengu ya ŵakusumisya ngunda.

¹³ Ŵasalile kuti, “Yilembedwe m'Malemba kuti, ‘Nyumba jangu tijicikolanjidwa nyumba jakupopelelamo.’ Nambo jemanja mjitesile mbanga jakuŵamo ŵaciswamba.”

¹⁴ Ŵandu ŵangalola ni ŵalemale ŵayice kwa Yesu m'Nyumba ja AMBUJE mula, nipo jwalakwe ŵaposisye.

¹⁵ Acakulungwa ŵa ŵakutaga mbopesi ni aciŵalimu ŵa Malamusi* ŵapile nayo mtima piŵayiweni yakusimonjesya yiŵatendaga jwalakwejo soni piŵapikene ŵanace ali mgumila m'Nyumba ja AMBUJE kuti, “Ucimbicimbi kwa Mwanagwawo Daudi.”

¹⁶ Myoyo ŵamwusisye Yesu kuti, “Ana mkuyipikana yakuŵecetayi?” Yesu ŵajanjile kuti, “Elo, ana nganimŵalanje kose maloŵe ga Mlungu gala gakuti, ‘Mwajiganyisye ŵanace ni makandi gakonga gakwe kumjimbila nyimbo syakumlumba kwakupundanganya?’ ”

¹⁷ Pelepo Yesu ŵalesile, ni ŵakopwece mu msindamo kwawula ku Betaniya, nipo ŵagonile kukoko.

Yesu ŵawulwesile mkuju

¹⁸ Kundaŵi kwakwe, piŵawujilaga ku Yelusalemu, Yesu jakwete sala.

¹⁹ Piŵawuweni mkuju mungulugulu litala mula, ŵajawile papopo nambo ŵasimene kuti mwangali kandu akaŵe masambape. Yesu ŵacisalile citelaco kuti, “Kutandilila sambano jino mpaka ndaŵi syosope, ngasimsogola kose yisogosi.” Ndaŵi jijojo mkuju wula wajumwile.

²⁰ Ŵakulijiganya ŵala piŵayiweni yeleyi, ŵasimonjile ni ŵamwusisye Yesu kuti, “Ana mkujuwu ujumwile uli ndaŵi jijiji?”

²¹ Yesu ŵatite, “Nditu ngumsalicisya kuti naga mkukulupilila, ngakayika kose, timcitenda yele yinawutesile mkujuwu. Nambo ngaŵa yeleyo peyo iyayi, mli mlisalile litumbi ali kuti, ‘Mnyakuce, mkaliponye m'nyasa,’ tiyicitendekwa nditu.

²² Naga mkukulupilila, timcipocela yosope yitimŵende kwa Mlungu.”

Ŵamwusisye Yesu ya ulamusi wakwe

²³ Yesu piŵajinjile m'Nyumba ja AMBUJE, nipo piŵaliji mkwiganya, acakulungwa ŵa ŵakutaga mbopesi ni acakulungwa ŵa Ayuda* ŵayice kwa jwalakwe nipo ŵamwusisye kuti, “Ana ulamusi wumkutendela yeleyi mwawujigele kwapi? Ana ŵani ŵampele macili gelega?”

²⁴ Yesu ŵajanjile kuti, “None jwakwe longole kumwusya ciwusyo cimope kaje. Naga mkunjanga none jwakwe tinimsalile kunagajigele macili gakuti ndendeleje yindu yeleyi.

²⁵ Ana Yohane kuti abatisyeje, ulamusi wakwe watyocele kwapi, kwa Mlungu kapena kwa ŵandu?” Jemanja jila ŵatandite kuŵecetana acimsyene acitiji kuti, “Ana tujile uli? Naga tukuti ‘ŵagajigele kwa Mlungu,’ jwalakwe jula tajile kuti, ‘Nambi ligongo cici nganimumkulupilila Yohane?’

²⁶ Nambo soni naga tukuti ŵagajigele kwa ŵandu, tukwajogopa ŵanduŵa, ngatuleka myoyo, ligongo jwalijose jwakulupilile mu mtima mwakwe kuti Yohane ŵaliji jwakulocesya jusyesyene.”

²⁷ Ni ŵagambile kumjanga Yesujo kuti, “Kwali, uwe ngatukumanyilila.” Jwalakwe ŵatite, “None jwakwe soni sambano nganimsalila kwele kunajigele macili gakutendela yeleyi.”

Citagu ca ŵanace ŵaŵili

²⁸ “Ana nambi jemanja mkuganisya uli? Mundu jwine ŵakwete ŵanace ŵakwe ŵaŵili. Ŵajawile kwa mwanace jwandanda ni kumsalila kuti, ‘Mwanangu, mjawule mkakamule masengo lelo ku mgunda wa mpeleya.’

²⁹ Nambo jwalakwejo ŵatite, ‘Une ngangusaka.’ Nambo panyuma pakwe ŵapitikwisye nganisyo syakwe ni ŵajawile.

³⁰ Babagwe ŵala ŵajawile kwa mwanace jwine jula, ni ŵamsalile maloŵe galagala. Jwalakwejo ŵatite, ‘Yambone baba,’ nambo nganajawula kose.

³¹ Ana mwa ŵanace ŵaŵiliŵa, nduni juŵatesile lisosa lya babagwe?” Jemanjajo ŵatite, “Jwandanda jula.” Yesu ŵasalile kuti, “Nditu ngumsalicisya kuti, ŵakomesya msongo ni acakongwe ŵa cikululu ali mkwinjila mu Ucimwene wa Mlungu,* ni kumlekaga jemanja munyuma.

³² Pakuti piŵayice Yohane M'batisi kukumlanjisya litala lya kulungama, jemanja nganimumkulupilila. Nambo ŵakomesya msongo ni acakongwe ŵa cikululu ŵamkulupilile. Jemanja atamose pimwayiweni yeleyo, nganimpitikuka mitima ni kumkulupilila jwalakwejo.”

Citagu ca ŵamasengo ŵakulima mu mgunda wa mpeleya

³³ Yesu ŵatite, “Mpikane citagu* cine. Jwapali mundu jwine juŵakwete mgunda wakwe. Mu mgundamo ŵapandilemo mipeleya, ni ŵataŵile uŵigo kusyungulila mgundawo. Ŵasokwele lisimbo lyakuti akamulisyeje masengo gakuminyilamo mpeleya, nipo soni ŵataŵile sanja jakulondela mgundawo. Kaneko mgunda wula ŵawujasimisye kwa ŵakulima, jwalakwe ni ŵapite ku cilambo cine kuŵatemiko yaka yejinji.

³⁴ Pijakwanile ndaŵi jakukaŵa yisogosi, msyene jula ŵatumile ŵamasengo ŵakwe kwa ŵakulima ŵala kuti akajigale mbuwa jakwe ja yisogosi ya mu mgunda mula.

³⁵ Nambo ŵakulima mu mgunda ŵala ŵakamwile ŵamasengo ŵala. Jwine ŵamputile, jwine ŵamwuleje, nipo jwine ŵamsomile maganga.

³⁶ Mundu jula ŵatumile soni ŵamasengo ŵane ŵajinji kupunda ŵandanda ŵala nipo ŵakulima ŵala ŵatendele yilayila soni.

³⁷ Pakumalicisya pasyesyene ŵamtumile mwanace jwakwe pakuti ŵaganisisye kuti, ‘Mwanangu peju takamcimbicisye.’

³⁸ Nambo ŵamasengo ŵakulima ŵala piŵam'weni mwanace jwakwejo, ŵatandite kusalilana kuti, ‘Jweleju ni jutacimlecela cipanjeci. Kwende tumwulaje kuti ticiŵe cetu cipanjeci.’

³⁹ Myoyo ŵamkamwile ni ŵamponyisye kusa kwa mgundawo ni kumwulaga.

⁴⁰ “Yesu ŵawusisye kuti, ana sambano msyene mgunda wa mpeleya ula pitaciyika, tacatenda cici ŵakulima ŵala?”

⁴¹ Jemanjajo ŵatite, “Tacawulaga ŵakulima ŵangalumbanawo, nipo mgunda wula taciwujasimisya kwa wakulima ŵane ŵitacipelekaga yisogosi yakwe mu ndaŵi jakwe.”

⁴² Yesu ŵasalile kuti, “Ana nganimŵalanga Malemba agala gakuti, ‘Liganga liŵalikanile amisili ŵakuŵaka nyumba, lilyolyo lyaŵele liganga lyapandumba, lyakusosekwa mnope. Ambuje ni ŵiŵatesile yeleyi, nipo yili yakutusimonjesya mnope!’

⁴³ “Ni ligongo lyakwe ngumsalicisya jemanja kuti, Mlungu tacimsumula Ucimwene wakwe ni kuwupeleka kwa ŵandu ŵane ŵitacimpikanila ni kupeleka yisogosi yakwe yakwenela.” [

⁴⁴ Jwalijose jutacigwila pa ligangali, tacijonasika. Nipo jutilicimgwila ligangali, tilicimkanyata.]

⁴⁵ Acakulungwa ŵa ŵakutaga mbopesi ni Afalisi* piŵapikene yitagu ya Yesuyi, ŵamanyilile kuti ŵaliji mkwagamba jemanjajo.

⁴⁶ Myoyo jemanjajo ŵalinjilile kuti amkamule, nambo ŵaliji mkwajogopa ŵandu, pakuti ŵandu ŵajinji ŵakulupilile kuti Yesu ali jwakulocesya.