Matayo 20 - Chiyawo Bible

Citagu ca ŵamasengo ŵakulembedwa mu ndaŵi syakulekangana

¹ “Pakuti Ucimwene wa kwinani uli mpela msyene nyumba juŵatyosile kundaŵindaŵipe kukwalemba ŵandu ŵakuja kamula masengo mu mgunda mwakwe wa mpeleya.

² Ŵalangene nawo kuti tacalipila mbiya jimo ja silifa,* pa lisiku, ni ŵatumisye ku mgunda wakwe.

³ Pa ndaŵi ja 9 koloko ŵajawile soni, ni ŵasimene ŵane ali citamile pa msika, akakukamula masengo.

⁴ Ŵasalile kuti, ‘Nombe jemanja mjawule ku mgunda wangu wa mpeleya, tinjimlipila malipilo gambone.’

⁵ Jemanjajo ŵajawile nditu. Mundu jula ŵajawile soni kukutenda yilayila pa ndaŵi ja 12 koloko musi ni pa 3 koloko.

⁶ Nipo ciŵandika 5 koloko ja ligulo, ŵajawile ni ŵasimene ŵane soni ali agambile kutama. Ŵawusisye kuti, ‘Ana uli mkwamba kutama apano lisiku lyosope ngakamula masengo?’

⁷ Jemanjajo ŵajanjile kuti, ‘Ligongo pangali jwatulembile masengo.’ Jwalakwe jula ŵasalile kuti, ‘Cambone, jemanja soni mjawule mkakamule masengo ku mgunda wangu wa mpeleya.’

⁸ “Lyuŵa lili mkukapila, msyene mgunda jula ŵamsalile kapitawo jwakwe kuti, ‘Mkaŵilanje ŵamasengo ŵala, mwalipile. Mtande ni ŵele ŵaŵaliji ŵakumbesi pakulembedwa, ni m'malicisye ŵa ndanda kwalemba ŵala.’

⁹ Piŵayice ŵa ŵalembedwe 5 koloko ja ligulo ŵala, jwalijose ŵapocele mbiya jimo ja silifa.

¹⁰ Sambano piŵayice pa ŵakulembedwa kundanda ŵala, ŵaganisyaga kuti tapocele mbiya syakupundanganya pelepo. Nambo nombe nawo ŵagambile kupocela jwalijose mbiya jimo ja silifa.

¹¹ Ni jemanjajo pakupocela ŵatandite kudandawula.

¹² Ŵatite, ‘Aa! Acimjetu ŵamalicisyeŵa agambile kamula masengo ndaŵi jamnono, uli mwapele malipilo gakulandana ni getu, kutendaga uweji tulasile nago masengo lisiku lyosope, nipo lyuŵa lyosope lila limalile mcilumu?’

¹³ Nambo msyene mgunda jula ŵamjanjile jumo jwa jemanjajo kuti, ‘Mpikanicisye mjangu, unetu nganinamjiŵila iyayi. Ana ngati twalangene mbiya jimo ja silifa?

¹⁴ Mjigale malipilo genu, mjawuleje. Msyene mgundane sacile kuti nampe jwakumbesi kulembedwaju mwakulingana ni m'mwejo.

¹⁵ Ana yindu yangu ngatenda nayo mpela mungusacila? Kapenatu mkutenda litima ligongo lya umbone wangu eti?’ ”

¹⁶ Sambano Yesu* ŵatite, “Myoyo ŵele ŵali ŵakundanda taciŵa ŵakumalicisya. Nipo ŵele ŵali ŵakumalicisya taciŵa ŵakundanda.”

Yesu ŵaŵecete katatu ya kuwa ni kwimuka ku ŵawe

¹⁷ Yesu piŵajawulaga ku Yelusalemu, ŵajigalile pambali ŵakulijiganya* ŵakwe likumi ni ŵaŵili ŵala. Mwitala ŵasalile kuti,

¹⁸ “Tuli pa ulendo wakuja ku Yelusalemu. Kweleko Mwanace jwa Mundu* akuja kupelecedwa kwa acakulungwa ŵa ŵakutaga mbopesi ni aciŵalimu ŵa Malamusi.* Jemanjajo takamjimbe magambo ni kumlamula kuti awulajidwe,

¹⁹ nipo takampelece kwa ŵandu ŵa mitundu jine.* Jemanjajo takamtende cipongwe, takamkwapule, ni kumkomela pa msalaba, nambo gali gamasile masiku gatatu jwalakwejo tacijimuka ku ŵawe.”

Ya kuŵenda ya mama ŵawo ŵa Yakobo ni Yohane

²⁰ Kaneko mamagwe ŵanace ŵa Sebedayo ŵayice ni ŵanace ŵakwe kwa Yesu, ni ŵatindiŵele kuti amŵende kandu.

²¹ Yesu ŵamwusisye kuti, “Ana mkusaka cici?” Jwalakwe ŵajanjile kuti, “Mlamule kuti mu Ucimwene wenu ŵanace ŵangu ŵaŵiliŵa catame jwine ku mkono wenu wamlyo, jwine ku mkono wenu wamciji.”

²² Nambo Yesu ŵajanjile kuti, “Ngamkumanyilila yimkuŵenda. Ana jemanja mpaka mpakombole kum'mwela nawo mgawo wa yipwetesi unguŵajilwa kum'mwela une?” Jemanjajo ŵajanjile kuti, “Elo, mpaka tukombole.”

²³ Pelepo Yesu ŵatite, “Yambone, timcimwela nawo mgawo wanguwo, nambo une jwangali ulamusi wakumsagula mundu jwakuti atame ku mkono wangu wamlyo kapena wamciji. Atati ni ŵitacipeleka malo gelega kwa ŵandu wele jwalakwe msyene ŵiŵakolocesye.”

²⁴ Piŵapikene yeleyi ŵakulijiganya ŵane likumi ŵala, ŵapilile mtima acimjawo ŵaŵili ŵala.

²⁵ Nambo Yesu ŵaŵilasile ŵakulijiganya ŵakwewo ni ŵasalile kuti, “Mkumanyilila kuti, ŵakulamulila ŵandu ŵa mitundu jine akusiŵalila ŵandu ŵawo masuku pa mtwe. Acakulungwakulungwa ŵawo soni akusalosyaga macili gawo pa ŵandu ŵawo.

²⁶ Nambo pasikati penu, yindu yikaŵaga myoyo. Jwalijose jwakusosa kuŵa jwamkulungwa pasikati penu, aŵeje jwakutumicila jwenu.

²⁷ Jwalijose jwakusaka kuŵa jwakulongolela pasikati penu, aŵeje kapolo jwa wosope.

²⁸ Mtendeje mpela muŵatendele Mwanace jwa Mundu, jwalakwejo jwayice ngaŵa kuti ŵane amtumicile, nambo kuti jwalakwejo ŵatumicile ŵandu, ni kupeleka umi wakwe kuti ŵawombole ŵandu ŵajinji.”

Yesu ŵaposisye ŵandu ŵaŵili ŵangalola

²⁹ Yesu ni ŵakulijiganya ŵakwe piŵakopokaga mu msinda wa Yeliko, ŵandu ŵajinji ŵamkuyisye.

³⁰ Ŵapali ŵandu ŵaŵili ŵangalola ŵiŵatemi pasi mungulugulu litala. Jemanjajo piŵapikene kuti Yesu akupita mwitalamo, ŵatandite gumila kuti, “Ŵalakwe Mwanace jwa Daudi,* atutendele canasa.”

³¹ Ŵandu ŵala ŵajamwice ŵangalolawo kuti atulale. Nambo jemanjajo ŵajendelecele gumila acitiji, “Ŵalakwe Ambuje, Mwanagwawo Daudi, atutendele canasa.”

³² Yesu ŵajimi ni ŵaŵilasile jemanjajo ni kwawusya kuti, “Ana mkusosa kuti nimtendele cici?”

³³ Jemanjajo ŵajanjile kuti, “Ambuje, tukusosa kuti tupakombole kulola.”

³⁴ Yesu ŵatendele canasa ni ŵakwayiye meso ga jemanjajo. Mwa ndaŵi jijojo papopo, ŵatandite kulola, kaneko ni ŵamkuyaga jwalakwejo.