Matayo 19 - Chiyawo Bible

Yesu ŵaŵecete yakulekangana ulombela

¹ Yesu* piŵamasile kuŵeceta gele maloŵega, ŵatyosile ku Galileya, ni ŵayice ku upande wa Yudeya pesi pa Lusulo lwa Yolodani.

² Ŵandu ŵajinji ŵamkuyisye, nipo jwalakwe ŵaliji mkwaposya ŵandu kweleko.

³ Afalisi* ŵane ŵayice kwa jwalakwe. Sambano pakusaka kumpatila ligongo, ŵamwusisye kuti, “Ana Malamusi getu gakutukunda kuti jwamlume alekangane ulombela ni ŵamkwakwe pa ligongo lililyose?”

⁴ Yesu ŵajanjile kuti, “Ana nganimŵalanga kuti pandanda Mlungu juŵapanganyisye ŵandu, ŵapanganyisye jwamlume ni jwamkongwe?

⁵ Nipo Mlungu jwatite, ‘Pa ligongo lyeleli jwamlume tacaleka babagwe ni mamagwe, ni tacilumbikana ni ŵamkwakwe, nipo ŵaŵiliwo taciŵa cilu cimpepe.’

⁶ Myoyo, sambano nganaŵa soni ŵaŵili nambo cilu cimpepe. Sambano yindu yele Mlungu yayilumbikenye pampepe, mundu jwine akayilekanganya.”

⁷ Afalisi ŵala ŵamwusisye Yesu kuti, “Ana ligongo cici Mose* ŵakundile kuti jwamlume ampeje jwamkwakwe cikalata cakulekanganila ulombela kaneko ni kuja kukwatula kumangwawo?”

⁸ Yesu ŵajanjile kuti, “Mose ŵamlembele lyele lilamusili ligongo lyakumula mitima jenu ni ungajiganyicika wenu, nambo kutyocela pandanda nganimŵa myoyo.

⁹ Sambano ngumsalicisya kuti, jwamlume jwalijose jwakwaleka ŵamkwakwe ulombela ngaŵaga ligongo lya cikululu, ni kulombela ŵakongwe ŵane, akutenda cikululu.”

¹⁰ Ŵakulijiganya* ŵakwe ŵamsalile kuti, “Nikutitu naga yili myoyo pasikati pa jwamlume ni jwamkongwe, kuli kwambone sambano ngalombela.”

¹¹ Yesu ŵasalile kuti, “Ngaŵa kuti ŵandu wosope mpaka akamulane nayo yeleyi iyayi, nambo ŵelepewo ŵapegwile ni Mlungu.

¹² Pakuŵa pana ŵandu ŵane ngaŵa mkupakombola kulombela ligongo cipagwile ŵapali myoyo. Ni pana ŵane ŵampaka ngaŵa mkupakombola kulombela ligongo lyakuceledwa ni ŵandu. Ni pana ŵane ŵele ŵaŵasacile kulitenda acimsyenepe kuŵa ŵangalombela kuti atumicileje cenene Mlungu. Jwele jwampaka apakombole kupikanicisya, apikanicisye.”

Yesu ŵapele upile ŵanace

¹³ Ŵandu ŵane ŵayice ni ŵanace ŵawo kwa Yesu kuti jwalakwejo ŵasajice magasa ni kwapopelela, nambo ŵakulijiganya ŵakwe ŵala ŵakalipile ŵanduwo.

¹⁴ Nambo Yesu ŵatite, “Mwaleceni ŵanaceŵa ayice kwa une, mkasimwalekasya, pakuti Ucimwene wa kwinani uli wa jemanjaji.”

¹⁵ Piŵamasile kuŵeceta gele maloŵega, ŵasajice magasa kaneko ŵatyosile.

Ya mcanda jwine jwakusicila

¹⁶ Sambano Mundu jwine jwacicanda ŵayice kwa Yesu ni ŵamwusisye kuti, “Cemwalimu, ana ngwenela kutenda cici cambone kuti ngapocele umi wangamala?”*

¹⁷ Yesu ŵamjanjile kuti, “Ana ligongo cici mkumbusya ya cele cicili cambone? Jwambone ni jumpepe basi. Naga mkusaka kuti mkajinjile ku umi, mgapikanileje Malamusi.”

¹⁸ Jwalakwe ŵawusisye soni kuti, “Malamusi gakwe gapi?” Yesu ŵajanjile kuti, “Mkawulaga, mkatenda cikululu, mkajiŵa, mkamlambucisya mjenu,

¹⁹ mwacimbicisyeje baba ni mama ŵenu, nambo soni mumnonyeleje mjenu mpela yimkuti pakulinonyela mwasyene.”

²⁰ Mcanda jula ŵatite, “Malamusi gosopega mbele ndili mkugakuya, nambi cicisigalile soni ni cici?”

²¹ Yesu ŵamsalile kuti, “Naga mkusaka kuŵa jwambone jwam'malilwe kusyesyene, mjawule mkasumisye yindu yosope yimkwete, nipo mbiya syakwe mkasipelece kwa ŵandu ŵakulaga, nipo cipanje timkacisimane kwinani, ni myice munguyeje.”

²² Mundu jula pijwapikene gele maloŵega, jwatengwice ni jwagambile kutyokapo yili yimpwetece mu mtima, ligongo jwaliji jwakusicila mnope.

²³ Yesu ŵasalile ŵakulijiganya ŵakwe kuti, “Nditu ngumsalicisya kuti cili cindu cakusawusya kuti mundu jwakusicila akajinjile mu Ucimwene wa kwinani.

²⁴ Nipo ngumsalicisya soni kuti, cili cindu cakusawusya kuti mundu jwakusicila akajinjile mu Ucimwene wa Mlungu* kulekangana ni kuti ngamila* jijinjile pebowo lya singano.”

²⁵ Ŵakulijiganya ŵala piŵapikene yeleyi, ŵasimonjile mnope ni ŵawusisye kuti, “Nambi ŵani ŵitakakulupuce?”

²⁶ Yesu ŵalolecesye jemanjajo ni ŵasalile kuti, “Yeleyi yili yangakomboleka ni ŵandu, nambo ni Mlungu yindu yosope yili yakomboleka.”

²⁷ Kaneko Petulo* ŵajanjile kuti, “Alole, uwetu twalesile yosope ni kwakuya ŵalakwe. Ana sambano nikuti tucipocela cici?”

²⁸ Yesu ŵasalile kuti, “Nditu ngumsalicisya kuti Mlungu pitacilinganya soni yindu yosope, Mwanace jwa Mundu* tacitama pa citengu cakwe ca ucimwene ni ca lumbili. Sambano jemanja ŵimwanguyisye, timcitama myitengu ya ucimwene likumi ni yiŵili kulamula ngosyo likumi ni siŵili sya Aisalaeli.

²⁹ Nipo jwalijose jwalesile mangwakwe, acalongo acimjakwe, kapena babagwe, kapena mamagwe, kapena ŵanace ŵakwe, kapena migunda ligongo lya une, jwalakwejo tacikola yosopeyo yejinji kupunda yiŵalesile kala yila, kaneko tacipocela umi wangamala.

³⁰ Nambo ŵajinji ŵali ŵandanda sambano jino taciŵa ŵakumbesi, nipo ŵali ŵakumbesi sambano jino taciŵa ŵandanda.”