Matayo 18 - Chiyawo Bible

Jwamkulungwa nduni?

¹ Ndaŵi jijojo ŵakulijiganya* ŵala ŵamwusisye Yesu* kuti, “Ana mu Ucimwene wa kwinani jwamkulungwa kupunda wosope nduni?”

² Papopo Yesu ŵamŵilasile mwanace ni ŵamjimice pasikati pawo,

³ nipo ŵatite, “Kusyene ngumsalila kuti, naga ngamkugalawuka ni kuŵa mpela ŵanace, ngasimjinjila kose mu Ucimwene wa kwinani.

⁴ Ni ligongo lyakwe mundu jwakulinandiya mpela mwanaceju, jwelejo ni jwamkulungwa mu Ucimwene wa kwinani.

⁵ Nipo jwalijose jwakumpocela cenene mwanace jumo jwamti mpela aju ligongo lya une, ni kuti akumbocela une.”

Kulinjikwa ku ulemwa

⁶ Nambo jwalijose jutamlemwekasye atamose jumo jwa ŵanace ŵakungulupilila unejiŵa, jwelejo kukaliji kwambone kuti amtaŵilile liganga lyekulungwa lya lisyago mlukosi ni kumtitimisya pakusokoka m'nyasa.

⁷ Akwete likungu ŵandu ŵa pasi pano ligongo lya yindu yakwalemwekasya. Yakwalemwekasyayo ngaŵa mkulepela kuwoneka, nambo akwete likungu mundu jwakwika nayo yindu yakulemwekasyayo.

⁸ “Sambano naga mkono wenu pane lusajo lwenu lukumlemwekasya, mlukate ni kulujasa. Kuli kwambone kuti mkajinjile ku umi wangamala* mli ŵakatice kapena ŵalemale mkono kapena lusajo kulekangana ni kuti mkaponyedwe ku moto wangamala mli mkwete makono kapena sajo siŵili syosope.

⁹ Nipo naga liso lyenu likumlemwekasya, mlikolotole ni kulijasa. Kuli kwambone kuti mkajinjile ku umi mli mkwete liso limope, kulekangana ni kuti mkaponyedwe ku moto wangamala ku Jahena* mli mkwete meso gosope gaŵili.”

Citagu ca ngondolo jakusokonecela

¹⁰ Mlolecesye kuti mkasimumnyosya atamose jumo jwa ŵele ŵanaceŵa. Pakuti ngumsalicisya kuti malayika* gawo kwinani gakusaŵa ndaŵi syosope pameso pa Atati ŵangu ŵali kwinaniko. [

¹¹ Pakuŵa Mwanace jwa Mundu* ŵayice kukulupusya cele cicasokonecele.]

¹² “Sambano mkuganisya uli? Mundu naga akwete ngondolo makumi likumi, nipo jimo jikusokonecela, ana ngasileka ngondolo makumi msano ni mcece kwisa msano ni mcece sila mwitumbi ni kuja kusosasosa jimo jijasokonecele jila?

¹³ Nditu ngumsalicisya kuti, naga ajisimene, kusangalala kwakwe kwakujisangalalila jele ngondolojo, kukusapundanganya kusangalala kwakusisangalalila sine syanganisisokonecela sila.

¹⁴ Myoyo soni Atati ŵenu ŵali kwinani ngakusaka kose kuti atamose jumo jwa ŵanaceŵa ajonasice.

Yakuŵajilwa kutenda mlongo mjakwe ali alemwisye

¹⁵ “Naga mlongo mjenu amlemwecesye, mjawule mkajamuce mli ŵaŵilipe. Naga akumpikanila, mumkamucisye mlongo mjenujo.

¹⁶ Nambo naga ngakumpikanila, mjigale mundu jumo pane ŵaŵili, kuti maloŵe gosope gasimicisidwe ni mboni siŵili pane sitatu.

¹⁷ Naga jwalakwejo akukana kwapikanila jemanjajo, mkawusalile mpingo,* nipo naga akukana soni kuwupikanila ni mpingo wakwe, mumtende kuŵa mpela mundu jwakusa pane mpela jwakomesya msongo.*

¹⁸ “Nditu ngumsalicisya kuti, cilicose citimtaŵe pasi pano, ticicitaŵidwa ni kwinani kwakwe, nipo cilicose citimgopole pasi pano, ticicigopoledwa ni kwinani kwakwe.

¹⁹ “Ngumsalicisya soni kuti, naga ŵaŵili mwa jemanja mkwiticisyana pasi pano kuŵenda kandu kalikose, Atati ŵangu ŵakwinani tacimpa.

²⁰ Pakuti pasongangene ŵandu ŵaŵili kapena ŵatatu mu lina lyangu, une ndili nawo papopo.”

Citagu ca jwamasengo jwangakululucila mjakwe

²¹ Pelepo Petulo* ŵayice kwa Yesu ni ŵamwusisye kuti, “Ambuje, ana mlongo mjangu pati andemwecesye mpaka namkululucile kalingwa? Ana mpaka kasano ni kaŵili?”

²² Yesu ŵamjanjile kuti, “Ngaŵa kasano ni kaŵilipe basi, nambo mpaka kasano ni kaŵili kuculuya ni makumi msano ni gaŵili,

²³ ligongo Ucimwene wa kwinani mpaka tuwulandanye ni aji nganiji: Ŵapali mwenye jwine juŵaŵilasisye ŵamasengo ŵakwe kuti alole soni cenene ngongole syawo.

²⁴ Piŵagambile kutanda kuŵalanjila, ŵayice najo jwamasengo jwine juŵakwete ngongole ja mbiya syapawinji.

²⁵ Nipo pakuti nganakola cakulipa ku ngongolejo, mbujegwe jula ŵalamwile kuti amsumisye jwamasengojo pampepe ni ŵamkwakwe ni ŵanace ŵakwe ni yakwe yosope, kuti alipile ngongole jila.

²⁶ Pelepo jwamasengo jula ŵamtindiŵalile acitiji, ‘Pepani, ngumŵenda kuti munjembeceye panandi, mungululucile, tinjimlipila nditu yosope.’

²⁷ Mbujegwe jula ŵamtendele canasa, nipo ŵamkululucile ngongole jila ni kumkunda kuti ajawuleje.

²⁸ “Nambo jwamasengo jula piŵakopwece, ŵasimene najo jumo jwa ŵamasengo acimjakwe, jwalakwejo ŵamkongwesye mbiya syapanandi. Ŵamkamwile pa lukosi mwa ukali acimsalilaga kuti, ‘Mumbucisye ngongole jenu jila.’

²⁹ Pelepo jwamasengo mjakwe jula ŵaligwisisye pasi acitiji, ‘Pepani, mungululucile, ngumŵenda kuti munjembeceye panandi, tinjimlipila.’

³⁰ Nambo jwalakwejo ŵakanile, mpaka ŵamtaŵisye ni kumponya m'nyumba ja ukayidi kuti mpaka alipile basi ngongolejo.

³¹ Ŵamasengo acimjakwe ŵala piŵayiweni yeleyi, ŵakamwilwe ni canasa kwabasi. Nipo ŵajile kukumsalila mbujegwawo jula yosope yeneyo.

³² Sambano mbujegwawo jula ŵamŵilasile ni kumsalila kuti, ‘M'mwe mli jwamasengo jwangalumbana! Une namkululucile ngongole josope jila pimwandandawulile.

³³ Ana nganimŵajilwa kuti nombe m'mwejo soni mu mtendele canasa jwamasengo mjenu mpela yinatite une pakumtendela canasa m'mwejo?’

³⁴ Mbujegwe jula ŵatumbile kwabasi, ni ŵampelece nombe najo kuti akataŵidwe ni kuponyedwa m'nyumba ja ukayidi mpaka ali amasile kulipila ngongole josope jila.”

³⁵ “Atati ŵangu ŵakwinani tacimtendela myoyo soni jwalijose jwa jemanja naga ngamkwakululucila acimjenu ni mtima wosope.”