Matayo 17 - Chiyawo Bible

Uwonece wa ngope ja Yesu petumbi

¹ Gali gapite masiku msano ni limo, Yesu* ŵamjigele Petulo,* Yakobo* ni Yohane,* mpwakwe Yakobojo, ni ŵakwesile nawo petumbi lyelewu, ku ŵatemi nawo kwajika.

² Papopo uwonece wa ngope ja Yesu wasindile, jemanjajo acilolaga. Ngope jakwe jaŵasile mpela lyuŵa, soni yakuwala yakwe yagambile kuti mbee, kuswejela.

³ Ndaŵi jijojo ŵakulijiganya* ŵala ŵam'weni Mose* ni Eliya* ali mkuŵecetana ni Yesu.

⁴ Petulo ŵamsalile Yesu kuti, “Ambuje, yili cenene kuti uweji tuli nawo apano. Naga ŵalakwe akusaka tindaŵe yisakasa yitatu pepano, cimo ca ŵalakwe, cimo ca Mose, ni cine ca Eliya.”

⁵ Piŵaliji mkuŵeceta myoyo, lyayice liwunde lyakuŵala ni lyawunicile. Mwiwundemo mwapikanice maloŵe gakuti, “Aju ni Mwanangu jungusinamnonyela, nipo ngusasangalala najo mnope. Mumpikanileje.”

⁶ Ŵakulijiganya ŵala piŵapikene yeleyi, ŵakamwilwe woga kwabasi ni ŵaligwisisye camakuku.

⁷ Nambo Yesu ŵayice ni kwakwaya acitiji, “Jimukani, kasimtenda woga.”

⁸ Jemanja jila piŵajinamukwice, ŵagambile kuwona kuti pangali mundu jwine soni, nambo Yesu jikape.

⁹ Piŵatulukaga mwitumbi mula, Yesu ŵalamwile kuti, “Yimyiweni m'mesomkulola yila, kasimumsalila mundu jwalijose mpaka Mwanace jwa Mundu* ali ajimwice ku ŵawe.”

¹⁰ Ŵakulijiganya ŵala ŵamwusisye Yesu kuti, “Nambi ligongo cici aciŵalimu ŵa Malamusi* akusatiga kuti Eliya akwenela kutanda kwika?”

¹¹ Yesu ŵatite, “Elo, Eliya ni ŵitatande kwika nipo tacikolosya cile yosope.

¹² Nambo ngumsalicisya kuti Eliya ŵayice kala, nipo ŵandu nganam'manyilila, nambo ŵamtesile yosope yiŵasakaga jemanjajo. Myoyo soni Mwanace jwa Mundu tacimlagasya.”

¹³ Pelepo ŵakulijiganya ŵala ŵamanyilile kuti ŵaliji mkwasalila ya Yohane M'batisi.

Yesu ŵaposisye mcanda juŵakamwilwe ni misimu jakusakala

¹⁴ Yesu ni ŵakulijiganya ŵakwe piŵayice kulyaliji likuga lya ŵandu kula, mundu jwine jwayice ni ŵamtindiŵalile Yesu.

¹⁵ Ŵatite, “Ambuje, mumtendele canasa mwanangu, akulwala mjilinjili nipo akulaga kwakogoya. Kaŵilikaŵili akusagwaga pamoto pane soni m'mesi.

¹⁶ Nayice najo kwa ŵakulijiganya ŵawoŵa, nambo alepele kumposya.”

¹⁷ Yesu ŵatite, “Aa! Ŵandu ŵa mpago awuno ŵangali cikulupi soni ŵa nganisyo syagulupanya! Ana nguŵajilwa kutama namwepe mpaka cakaci? Ana tinjipimilila namwe mpaka cakaci? Myice najo akuno mwanacejo.”

¹⁸ Kaneka, Yesu ŵawulamwile msimu wakusakalawo, nipo wakopwece mwa mcandajo, ni ŵaposile ndaŵi jijojo.

¹⁹ Kaneko ŵakulijiganya ŵala ŵayice kwa Yesu pacisyepela ni ŵambusisye kuti, “Ana uweji twalepele uli kuwukoposya msimu wakusakala wula?”

²⁰ Yesu ŵajanjile kuti, “Ligongo lyakwe ni lyakunandipa kwa cikulupi cenu. Nditu ngumsalicisya kuti naga mkwete cikulupi mpela kambeju ka mcele, timcilisalila ali litumbili kuti, ‘Mtukuce apano, mjawule ako,’ lyalakwe ni kutukuka nditu. Kwakuti ngakasikapagwa kandu kakumlema. [

²¹ Nambo msimu wa mtundu welewu wangakopoka akaŵe mli mtandite ni mapopelo ni kulijima yakulya, ni mpaka mwukoposye.]”

Yesu ŵaŵecete soni ya kuwa ni kwimuka kwakwe

²² Lisiku line ŵakulijiganya piŵasongene wosope pampepe ku Galileya, Yesu ŵasalile kuti, “Mwanace jwa Mundu tacipelecedwa myala mwa ŵandu kuti amwulaje.

²³ Nambo pitacimwulagapo, jwalakwejo tacijimuka ku ŵawe gali gamasile masiku gatatu.” Ŵakulijiganya ŵala piŵapikene yeleyi, ŵadandawile mnope.

Yesu ŵakomile msongo wa ku Nyumba ja AMBUJE

²⁴ Yesu ni ŵakulijiganya ŵakwe piŵayice ku Kapelenaumu, ŵakukomesya msongo ŵa ku Nyumba ja AMBUJE ŵayice ni ŵamwusisye Petulo kuti, “Ana mwalimu jwenuju ngakusakoma msongo wa ku Nyumba ja AMBUJE?”

²⁵ Jwalakwe ŵatite, “Akusakomaga.” Sambano Petulo piŵajinjile m'nyumba, mkanaŵecete cilicose, Yesu ŵamwusisye kuti, “M'mwe Simoni,* mkuganisya uli? Ana acayimwene ŵa pasi pano akusapocela msongo kwaceni? Kwa ŵandu ŵa lukosyo lwawo, pane kwa acalendo?”

²⁶ Petulo ŵatite, “Akusapocela kwa acalendo.” Yesu ŵamsalile kuti, “Sambano ni kutitu alukosyo ngakuŵajilwa koma msongo.

²⁷ Nambo ngatukusaka jemanjaji aŵe ŵakutenguka ligongo lya uwe, myoyo mjawule mkaloposye somba ku nyasa. Somba jatimkatande kuloposyajo, mkajikanganukule kukamwa, nipo timkasimanemo mbiya. Mkajigale mbiyajo ni mkakome msongo wangu ni wenu wakwe.”