Matayo 16 - Chiyawo Bible

Afalisi ni Asaduki ŵasacile cimanyisyo cakusimonjesya

¹ Lisiku line, Afalisi* ni Asaduki* ŵane ŵayice kwa Yesu* ni ŵasakaga kumlinga jwalakwejo, myoyo ŵamŵendile kuti ŵalosye cimanyisyo cakumasya lunda cakutyocela kwinani.

² Nambo Yesu ŵasalile kuti, “Palikukapila lyuŵa mkusatiji, ‘Tikuce cenene malaŵi, pakuti kwinani kucejele.’

³ Soni kundaŵi mkusatiji, ‘Nambo lelo tijigwe ula ja mbungo, pakuti kwinani kutesile mawunde gamti bii.’ Mkusakombola gopolela uwonece wa kwinani, nambo ngamkupakombola gopolela yimanyisyo ya ndaŵi ajino.

⁴ Ŵandu ŵa mpago awuno ŵangalumbana ni ŵangakulupicika, akusasaka kuciwona cimanyisyo cakumasya lunda. Nambope ngasaciwona cimanyisyo cine, akaŵe cilacila ca jwakulocesya* Yona.” Pele Yesu ŵalesile ni ŵatyosilepo.

Ya cakusasaŵilisya mikate ca Afalisi ni ca Asaduki

⁵ Ŵakulijiganya* ŵala piŵajile kwika lisi line lya nyasa, ŵaliŵalile kujigala mikate.

⁶ Yesu ŵasalile jemanjajo kuti, “Mkalamuce ni cakusasaŵilisya* mikate ca Afalisi ni Asaduki.”

⁷ Pelepo ŵakulijiganyawo ŵatandite kuŵecetana acitiji kuti, “Akuŵeceta yeleyitu ligongo lyakuti nganitujigala mikate.”

⁸ Yesu ŵamanyilile yiŵaliji mkuŵeceta yila. Ni ŵawusisye kuti, “Ana ligongo cici mkuŵecetana mwacimsyene yakuti nganimkola mikate, jemanja ŵacikulupi cacinandi?

⁹ Ana mpaka sambano jino nganimpikanicisyepe? Ana ngamkukumbucila kuti ni mikate msano, nalisisye ŵandu 5,000? Nambi mwagumbesye ngalala silingwa sya makombo?

¹⁰ Ngati soni ni mikate msano ni jiŵili nalisisye ŵandu 4,000? Nambi mwagumbesye ngalala silingwa sya sigasiga?

¹¹ Nambi uli ngamkumanyilila kuti nganimbecetaga namwe ya mikate? Mkalamuce naco cakusasaŵilisya mikate ca Afalisi ni Asaduki.”

¹² Papopo jemanjajo ŵamanyilile kuti Yesu nganiŵasalilaga kuti akalamuce naco cakusasaŵilisya mikate, nambo kuti akalamuce ni yakwiganya ya Afalisi ni Asaduki.

Yiŵaŵecete Petulo ya Yesu

¹³ Yesu Piŵayice kumbali ja Kaisaleya Filipi,* ŵawusisye ŵakulijiganya ŵakwe kuti, “Ana ŵandu akusatiji Mwanace jwa Mundune ŵani?”

¹⁴ Jemanjajo ŵatite, “Ŵane akusatiga Yohane M'batisi, ŵane akusatiga, jwakulocesya* Eliya,* soni ŵane akusati Yelemiya pane jwakulocesya jwine.”

¹⁵ Papopo Yesu ŵawusisye kuti, “Nambi jemanja mkusati une ŵani?”

¹⁶ Simoni* Petulo* ŵajanjile kuti, “Ŵalakwe ali Mkulupusyo, Mwanace jwa Mlungu jwacijumi.”

¹⁷ Yesu ŵasalile kuti, “Mkwete upile m'mwejo Simoni, mwanace jwa Yona, pakuti ngaŵa mundu jwamjuwulile yeleyi, nambo Atati ŵangu ŵakwinani.

¹⁸ Sambano ngumsalila kuti, m'mwe mli Petulo, nipo pa lwala lwelelu tinjitaŵa mpingo* wangu. Nipo atamose macili ga ciwa ngasigawupunda.

¹⁹ Tinjimpa makiyi ga Ucimwene wa kwinani, kwakuti yosope yatimcitaŵa pasi pano, tiyicitaŵidwa ni kwinani kwakwe, nipo yitimcigopola pasi pano, tiyicigopoledwa ni kwinani kwakwe.”

²⁰ Yesu piŵaŵecete yeleyi, ŵalamwile ŵakulijiganya ŵala kuti akamsalila mundu jwalijose kuti jwalakwe ali Mkulupusyo jwakulocesedwa jula.

Yesu ŵaŵecetele cilepe ya kuwa ni kwimuka kwakwe

²¹ Kutyocela ndaŵi jelejo, Yesu ŵatandite kwasalila ŵakulijiganya ŵakwe kuti, “Ngwenela kwawula ku Yelusalemu, kweleko acakulungwa ŵa Ayuda* ni acakulungwa ŵa ŵakutaga mbopesi ni aciŵalimu ŵa Malamusi,* takandagasye. Tinjiwulajidwa nambo gali gapite masiku gatatu tinjijimuka soni ku ŵawe.”

²² Papopo Petulo ŵamjigalile Yesu pambali ni ŵatandite kumjamuka acitiji, “Pepani Ambuje, yikaŵa myoyo. Mlungu ngasakunda yeleyi.”

²³ Nambo Yesu ŵagalawice ni ŵamsalile Petulo kuti, “Mtyoce apa, m'mwe Satana!* Mkusaka kundemwekasya. Pakuŵa nganisyo syenusi nganisiŵa nganisyo sya Mlungu, nambo nganisyo sya ŵandu wamba.”

Ya kutwicila msalaba ni kumkuya Yesu

²⁴ Papopo Yesu ŵasalile ŵakulijiganya ŵakwe kuti, “Mundu jwakusaka kunguya une, akuŵajilwa kuliliŵalila msyene, nipo atwicile msalaba wakwe ni kunguya.

²⁵ Ligongo jwakusaka kuwukulupusya umi wakwe, taciwujasa, nambo jwalijose jwakuwujasa umi wakwe ligongo lya une, taciwusimana.

²⁶ Ana mundu tapindule cici naga akwete yindu yosope ya pa cilambo capasi pano, nambo pambesi pakwe ni kuwujasa umi wakwe? Ana mundu mpaka alipile cici cakuti awombolele umi wakwe?

²⁷ Pakuŵa Mwanace jwa Mundu* taciyika ni malayika* gakwe mu lumbili lwa Atatigwe. Pelepo tacimlipila jwalijose mwakulingana ni yitendo yakwe.

²⁸ Nditu ngumsalicisya jemanja kuti apali ŵandu ŵane panopano ŵele ngasawa mkinamwone Mwanace jwa Mundu ali mkwisa mu lumbili lwa ucimwene.”