Matayo 15 - Chiyawo Bible

Ya misyungu ja acinangolo ŵa Ayuda

¹ Kaneko Afalisi* ŵane ni aciŵalimu ŵa Malamusi,* ŵayice kwa Yesu acityocelaga ku Yelusalemu. Nipo ŵamwusisye kuti,

² “Ligongo cici ŵakulijiganya* ŵenu ngakusunga msyungu wa acinangolo ŵetu? Ŵanganaŵa m'myala mwawo mwakolosya cenene pakulya yakulya.”

³ Yesu ŵajanjile kuti, “Nambi uli jemanja, ligongo lyakusacilila mnope gosa misyungu jenu, ngamkugosa soni Lilamusi lya Mlungu?

⁴ Pakuti Mlungu ŵalamwile kuti, ‘Mwacimbicisye baba ŵenu ni mama ŵenu,’ ŵatite soni, ‘Jwakwanyosya babagwe pane mamagwe, jwalakwejo awulajidwe basi.’

⁵ Nambo jemanja mkusajiganya kuti naga mundu akwete kandu kakuti akamulisye masengo pakwakamucisya nako babagwe ni mamagwe, nambo ni kuŵeceta kuti ‘Ayi yili ya Mlungu,’

⁶ jwalakwejo ngakuŵajilwa soni kwacimbicisya babagwe. Pakutenda myoyo, mkugacembulusya maloŵe ga Mlungu ligongo lya msyungu wenuwo.

⁷ Jemanja ŵandu ŵa unami, nditu jwakulocesya* Yesaya ŵaŵecete yisyene piŵatiga pala kuti,

⁸ ‘Ŵandu ŵeleŵa akwamba kunjimbicisya ni pakamwape, nambo mitima jawo jili kwakutalikangana ni une.

⁹ Pangali soni kusosekwa kwakuti alambileje une, ligongo akwiganya tumalamusi twakupanganya ŵandu wamba, ni mpela kuti gali malamusi ga Mlungu.’ ”

Yindu yayikusamsakasya mundu

¹⁰ Kaneko Yesu ŵaŵilasile ŵandu ŵala ni ŵasalile kuti, “Mpikane nipo mpikanicisye cenene.

¹¹ Pangali cindu cakutyocela kusa ni kwinjila mkati mwa mundu campaka cimsakasye. Nambo yakopoka mkati mwa mundu ni yikomboleka kumsakasya.”

¹² Pelepo ŵakulijiganya ŵakwe ŵayice kwa jwalakwe ni ŵamwusisye kuti, “Ana mkumanyilila kuti Afalisi ŵala ŵatengwice nago maloŵe genu gala?”

¹³ Yesu ŵatite, “M'mela uliwose umkiniwupandidwa ni Atati ŵangu ŵakwinani, tiwucitupulidwa.”

¹⁴ “Mwaleceni, jemanjaji ali ŵakulongolela ŵandu ŵangalola. Naga mundu jwangalola akumlongolela jwangalola mjakwe, wosopewo tacigwila mwisimbo.”

¹⁵ Pelepo Petulo* ŵaŵendile kuti, “Atugopolele citaguci.”

¹⁶ Yesu ŵatite, “Ana atamose jemanja ngamkupikanicisya?

¹⁷ Ana jemanja ngamkumanyilila kuti yosope yayikwinjila mkamwa mwa mundu yikusajinjila mcitumbo mwakwe, nipo kaneko yikusajasidwa ku citutu?

¹⁸ Nambo yayikukopoka mkamwa mwa mundu, yikusatyocela mu mtima, nipo yeleyi ni yikusamsakasya.

¹⁹ Pakuti mkati mwa mitima ja ŵandu mukusakopoka nganisyo syakusakala, syakuwulaga ŵandu, syacikululu, syacisembwele, syawiyi, sya umboni wa unami, soni kusinjilila.

²⁰ Yeleyi ni yayikusamsakasya mundu. Nambo kulya cakulya myala mwanganaŵa mpela mwakusasalilaga jemanjajo, ngayikusamsakasya mundu.”

Ya cikulupi ca jwamkongwe jwine

²¹ Yesu ŵatyosile kweleko, ni ŵajile ku mbali jakuŵandicila misinda ja Taya ni Sidoni.

²² Nipo jwamkongwe jwine jwa Cikenani jwayice kwa Yesu. Jwagumisile kuti, “Mundendele canasa, Ambuje ŵangu, Mwanagwawo Daudi.* Mwanangu jwamkongwe akamwilwe ni msimu wakusakala.”

²³ Nambo Yesu nganamjanga kose jwalakwejo atamose liloŵe limo. Ŵakulijiganya ŵakwe ŵayice ni ŵamŵendile jwalakwe kuti, “Mumsalile ajawuleje, mlole akutukuya ni kutusingangaga.”

²⁴ Yesu ŵajanjile kuti, “Unetu Mlungu andumile kwa ŵandu ŵa ku Isalaeli ŵali mpela ngondolo syakusokonecela.”

²⁵ Nambo jwamkongwe jula ŵayice ni ŵamtindiŵalile pasi pa sajo syakwe acitiji, “Ambuje, conde angamusye.”

²⁶ Yesu ŵamsalile kuti, “Ngaŵa yambone kujigala cakulya ca ŵanace ni kusiponyela m'mbwa.”

²⁷ Jwamkongwejo ŵatite, “Elo, yisyene yeleyo, nombe nasyo m'mbwa sikusalyaga yinyenyeswa yayikusagwila pasi kutyocela pa tebulo ja mbujegwe.”

²⁸ Pelepo Yesu ŵatite, “M'mwe ŵakongwe, cikulupi cenu cili cacikulungwa, yitendekwe kusyene yimkusakayo.” Ndaŵi jijojo mwanace jwakwe jwamkongwe jula ŵaposile.

Yesu ŵaposisye ŵandu ŵajinji

²⁹ Kaneko Yesu ŵatyosile kweleko, ni ŵajesile mungulugulu Nyasa ja Galileya. Kaneko ŵakwesile mwitumbi ni ŵatemi pasi kweleko.

³⁰ Ŵandu ŵajinji ŵayice kwa jwalakwe ali ŵajigele ŵandu ŵalemale ngongolo, ŵangalola, ŵalemale, ŵangaŵeceta, nipo soni ŵakulwala ŵane ŵajinji. Ŵatamice mwakuŵandikana ni Yesu, nipo jwalakwe ŵaposisye.

³¹ Sambano ŵandu wosope ŵasimonjile piŵayiweni kuti ŵangaŵeceta ŵala akuŵeceta, ŵapunduce ŵala aposile, ŵalemale ngongolo ŵala akwenda, nipo ŵangalola ŵala akulola. Myoyo ŵamlumbile Mlungu jwa Isalaeli.

Yesu ŵalisisye ŵandu 4,000

³² Yesu ŵaŵilasile ŵakulijiganya ŵakwe, ni ŵasalile kuti, “Akundesya canasa ŵanduŵa, pakuti alonjele ni une kwa masiku gatatu sambano, nipo nganakola cakulya. Ngangusaka kwajawusya kumangwawo jili jakwete sala, kogopela kuti takomocele mwitala.”

³³ Ŵakulijiganya ŵala ŵamwusisye Yesu kuti, “Ana mwatupile ŵandumu, uwe tukasosele kwapi yakulya yakuti yakwanila kwalisya jemanjaji mcipululu mpela amuno?”

³⁴ Yesu ŵawusisye kuti, “Ana mkwete mikate jilingwa?” Jemanjajo ŵatite, “Msano ni jiŵili, ni tusomba panandi.”

³⁵ Pelepo Yesu ŵalamwile ŵandu ŵala kuti atame pasi.

³⁶ Kaneka ŵajigele mikate msano ni jiŵili jila, ni tusomba tula, ŵamtogolele Mlungu, ni ŵayigaŵenyegaŵenye ni kuyipeleka kwa ŵakulijiganya ŵakwe, nipo jemanjajo ni ŵajile kwapeleganya ŵandu ŵala.

³⁷ Ŵandu wosopewo ŵalile mpaka kwikuta. Ŵalokotenye sigasiga mwakuti ŵagumbesye ngalala msano ni siŵili.

³⁸ Ciŵalanjilo ca ŵandu ŵiŵalilewo, cakwanile 4,000 acalumepe, ngaŵalanjila acakongwe ni ŵanace.

³⁹ Kaneko Yesu ŵasalile ŵandu ŵala kuti ajawulanganeje msimangwawo, kaneka jwalakwe ŵajinjile mwiboti ni ŵajile ku upande wa Magadani.