Matayo 14 - Chiyawo Bible

Ciwa ca Yohane M'batisi

¹ Pa ndaŵi jelejo Helodi,* mwenye jwa ku Galileya, ŵapikene yiŵaŵecetaga ŵandu kwambaga ya Yesu.*

² Sambano ŵasisalile nduna syakwe kuti, “Jweleju ni Yohane M'batisi jula, jwajimwice soni ku ŵawe, ni ligongo lyakwe akutenda yamacili yosopeyi.”

³ Pakuti Helodi kala ŵatumile asilikali ŵakwe kuti akamkamule Yohane, akamtaŵe ni kumponya m'nyumba ja akayidi. Ŵatesile yeleyi ligongo lya Helodiyasi,* ŵamkwakwe Filipi, mpwakwe jwa Helodi.

⁴ Pakuŵa Yohane M'batisi ŵamsalile Helodi kuti, “Kuli kugalemwecesya malamusi kulombela jwamkongwe jwa mpwenu.”

⁵ Ali ni ligongo lyakwe Helodi ŵasosaga kumwulaga Yohane, nambo ŵaliji mkwajogopa Ayuda uŵatiji kuti Yohane ali jwakulocesya.*

⁶ Pa lisiku lyakumbucila kupagwa kwa Helodi, mwanace jwamkongwe jwa Helodiyasi ŵaŵinile pameso pa ŵandu ŵakuŵilanjidwa ku cindimba, mwakuti ŵamnonyelesye Helodi.

⁷ Papopo Helodi ŵalumbile kuti, “Cilicose citimumbende tinampe.”

⁸ Sambano mamagwe ali amsalile cakuti aŵende, mwanace jwamkongwe jula ŵatite, “Ambe panopano mtwe wa Yohane M'batisi mu mbalemu!”

⁹ Pelepo Mwenye Helodi ŵala ŵadandawile mnope mu mtima mwawo, nambo ligongo lyakuti ŵalumbile pameso pa ŵandu wosope uŵaŵilanjidwe ku cindimba ŵala, ŵalamwile kuti ampe mtwe uŵaŵendilewo.

¹⁰ Sambano ŵamtumile mundu kuti akamkate mtwe Yohanejo m'nyumba ja akayidi.

¹¹ Mtwewo ŵawujigalile mu mbale ni ŵajile kukuwupeleka kwa mwali jula, mwalijo ŵapocele ni kuja kukuwupeleka kwa mamagwe.

¹² Kaneko ŵakulijiganya* ŵa Yohane ŵayice kukujigala mtembo wakwe ni kuja kukuwusika mwilembe, kaneka ŵajile kukumsalila Yesu.

Yesu ŵalisisye ŵandu 5,000

¹³ Yesu piŵapikene yeleyi, ŵatyosile kweleko mwiboti, nipo ŵajile kumalo gangapitapita ŵandu. Nambo nombe ŵandu piŵapikene, ŵajesile pamkuli ni ŵamkuyisye kutyocela ku misinda jawo.

¹⁴ Yesu ŵakopwece mwibotimo, nipo piŵaliweni likuga lya ŵanduwo, ŵatendele canasa ni ŵatandite kwaposya ŵiŵalwalagawo.

¹⁵ Ndaŵi jegulo, ŵakulijiganya ŵakwe ŵayice kukumsalila kuti, “Akunotu kwitinji, soni alino ligulo. Ŵasalile ŵanduŵa kuti ajawulanganeje kumisi kuti akalisumile acimsyene yakulya.”

¹⁶ Nambo Yesu ŵajanjile kuti, “Pangali kose ligongo lyakuti atyocele. Jemanja mwape yakulya.”

¹⁷ Jemanjajo ŵatite kuti, “Yitukwete apano yili mikate msano ni somba siŵilipe.”

¹⁸ Yesu ŵatite, “Myice nasyo akuno.”

¹⁹ Nipo ŵalamwile kuti ŵandu ŵala atame pasi pa manyasi. Sambano ŵajigele mikate msano jila ni somba siŵili sila, ŵalolite kwinani, ni ŵamtogolele Mlungu. Kaneka ali agaŵenyegaŵenye mikatejo, ŵayipelece kwa ŵakulijiganya ŵakwe, ŵakulijiganya ŵala ni ŵapelegenye ŵanduwo.

²⁰ Ŵandu wosope ŵala ŵalile mpaka kwikuta. Kaneko ŵakulijiganya ŵala ŵalokotenye sigasiga mpaka gumbasya ngalala likumi ni siŵili.

²¹ Ciŵalanjilo ca acalume uŵalile cakwanile 5,000, ngaŵalanjila acakongwe ni ŵanace.

Yesu ŵajesile pacanya pa mesi

²² Ndaŵi jijojo, Yesu ŵalamwile ŵakulijiganya ŵakwe kuti ajinjile mwiboti, alongolele kwawula lisi line lya nyasa, jwalakwejo ali mkwasalila ŵandu ŵala kuti ajawuleje msimangwawo.

²³ Sambano piŵamasile kwasalila ŵandu ŵala kuti ajawuleje, jwalakwe ŵakwesile litumbi jikape kuja kukupopela. Pikwatandaga kuswa, ŵaliji ciŵela kukoko jikape.

²⁴ Pa ndaŵi jeleji, liboti lila lyaliji kwakutalicila ni mkuli. Lyaliji mkulaga ni matumbela ligongo lya mbungo jijapujilaga kuŵatyocelaga jemanjajo.

²⁵ Kundaŵindaŵipe, Yesu ŵayice kwa ŵakulijiganya ŵakwe ali mkwenda pacanya pa nyasa.

²⁶ Nambo ŵakulijiganya ŵala piŵam'weni jwalakwe ali mkwenda pacanya pa mesi, ŵajogwepe, ni ŵatite, “Alole cilengwalengwa!” Nipo ŵagumisile ligongo lya woga.

²⁷ Nambo ndaŵi jijojo Yesu ŵasalile kuti, “Mwusimane mtima, ndili une, mkajogopa!”

²⁸ Nipo Petulo* ŵatite, “Ambuje naga ali ŵalakwe, andamule kuti mbice kwali ŵalakwe pa mesipo.”

²⁹ Yesu ŵatite, “Yambone, yikani.” Sambano Petulo ŵakopwece mwiboti ni ŵatandite kwenda pamesi kwawula kuŵaliji Yesu.

³⁰ Nambo piŵalolite mujapujilaga mbungo, ŵatesile woga, ni ŵatandite kutitimila, nipo ŵagumisile kuti, “Ambuje angulupusye!”

³¹ Papopo Yesu ŵatambasukwile mkono wakwe, ni ŵamkamwile acitiji, “M'mwe ŵa cikulupi camnono, ligongo cici mkayicileje?”

³² Kaneko ŵaŵiliwo ŵajinjile mwiboti mula, nipo mbungo jalesile.

³³ Pelepo ŵandu ŵiŵaliji mwibotimo ŵamlambile Yesu acitiji, “Nditu, ŵalakwe ni mwanace jwa Mlungu.”

Yesu ŵaposisye ŵakulwala ku Genesaleti

³⁴ Sambano wosope ŵajombwece nyasa nipo ŵayice ku cilambo ca Genesaleti.

³⁵ Ŵandu ŵa kweleko ŵam'manyilile Yesu, nipo ŵamanyisye ŵandu ŵambali josope jakusyungulila pelepo. Mwakuti ŵayice kwa Yesu ni ŵandu wosope ŵakulwala.

³⁶ Ŵamŵendile kuti ŵakunde ŵakulwalawo kuti agambe kwaya atamose lujenje lwa cakuwala cakwe. Wosope ŵiŵakwayiye lujenje lwa cakuwala cakwe, ŵaposile.