Matayo 13 - Chiyawo Bible

Citagu ca mkumisa mbeju

¹ Lisiku lilyolyo Yesu* ŵakopwece m'nyumba ni ŵajile kutama pasi mungulugulu nyasa.

² Ŵandu ŵajinji ŵasongangene kuŵaliji jwalakweko. Nipo Yesu ŵajinjile mwiboti ni kutama pasi, ŵandu wosope ŵala ali ajimi pamkuli.

³ Yesu ŵaŵecete nawo yejinji myitagu. Ŵatite, “Mundu jwine ŵapite kukumisa mbeju syakwe.

⁴ Piŵaliji mkumisa yilayila, mbeju sine syagwilile mwitala, ni yijuni yayice ni kusilya.

⁵ Mbeju sine syagwilile petaka lya maganga, pilyaliji litaka lyamnono. Mbejusyo syamesile mwa citema pakuti litaka lyakwe nganilija kwika pasi mwakusokoka mnope.

⁶ Nambo pilyaŵasile lyuŵa, mbejusyo syatinice kaneko syajumwile, ligongo lyakuti miciga jakwe nganijijinjila pasi mnope.

⁷ Mbeju sine syagwilile pa mawukutu gamiŵa, mawukutugo pigakulaga, ganyolwesye mbeju sila.

⁸ Nambo mbeju sine syagwilile petaka lya cajila, nipo syasogwele. Masace gane gakwete songolo makumi likumi, sine songolo makumi msano ni limo, nipo songolo sine makumi gatatu.”

⁹ Sambano Yesu ŵatite, “Jwakwete mapikanilo, apikane!”

Cakulinga ca yitagu

¹⁰ Kaneko ŵakulijiganya* ŵa Yesu ŵala ŵayice kwa jwalakwe kukumwusya kuti, “Ana ligongo cici akusaŵecetaga ni ŵanduŵa myitagu?”

¹¹ Yesu ŵajanjile kuti, “Mlungu am'manyisye jemanja yakusisika ya mu Ucimwene wa kwinani. Nambo ŵaneŵa nganiŵajuwulila.

¹² Pakuti mundu jwakwete kandu kane, tacimpa soni yine, kuti akole yejinji. Nambo jumkinakola kandu, tacimsumula atamose kamnono kose kakweteko.

¹³ Ni ligongo lyakwe ngusaŵecetaga ni ŵanduŵa myitagu, pakuti atamose akulola, nambo ngakulolecesya, soni atamose akupikana, nambo ngakupikanicisya.

¹⁴ Mwa jemanjaji yikutendekwa yiŵaŵecete jwakulocesya* Yesaya kuti, ‘Kupikana timcipikana nditu, nambo ngasimpikanicisya cenene, kulola timcilola, nambo ngasimlolecesya cenene,

¹⁵ ligongo lunda lwa ŵele ŵanduŵa luli lwakuloŵela m'mapikanilo mwawo ngakupikana cenene, nipo meso gawo asisinile, kogopela kuti atakulola ni meso gawogo, ni kupikana ni mapikanilo gawo, soni atakumanyilila ni lunda lwawolo, ni kupitikuka mtima, unejo ni kwaposya.’

¹⁶ “Nambo jemanja ŵana upile, pakuti meso genu gakulola cenene, nipo mapikanilo genu gakupikana cenene.

¹⁷ Nditu, ngumsalila yisyene kuti ŵakulocesya ni ŵandu ŵajinji ŵakulungama, ŵasacilile mnope kuyiwona cenene yimkuyiwona jemanjayi, nambo nganayiwona kose, soni ŵasacile kuyipikana cenene yimkuyipikana jemanjayi, nambo nganayipikana kose.

Gopolela kwa citagu ca jwakumisa mbeju

¹⁸ “Sambano jemanja mpikanicisye cenene gopolela kwa citagu* ca mundu jwa kumisa mbeju cila.

¹⁹ Mundu jwalijose jwakupikana maloŵe gagakusala ya Ucimwene wa kwinani, nambo ni ngagapikanicisya, jwakusakala jula akusayikaga ni kwakula yiyapandidwe mu mtima mwakwe. Syelesi ni mbeju sisyagwilile mwitala sila.

²⁰ Mbeju sisyagwilile petaka lya pacanya pa lwala sila, ali ŵandu ŵakusapikanaga maloŵe ga Mlungu, ndaŵi jijojo ni kugapocela ni lukondwa.

²¹ Nambo pakuŵa jwalakwejo jwangali miciga jakwendelecela, maloŵego ngagakusatamilicikaga. Mwakuti naga ndaŵi jakulaga pane yisawusyo yimsimene ligongo lya maloŵe gala, ndaŵi jijojo mundujo akusajasa mtima.

²² Mbeju sisyagwilile pa mawukutu ga miŵa sila, sili mpela mundu jwakusapikana maloŵe ga Mlungu, nambo akusatanda kudandawula ni yakusosekwa ya umi awuno, soni kunonyela mnope yipanje mwakuti pambesi pakwe yeleyi yikusanyolosya maloŵe gala, ni ngasogosya cisogosi cilicose.

²³ Nambo mbeju sisyagwilile petaka lya cajila sila, sili mpela mundu jwele jwakusapikana maloŵe ga Mlungu ni kugapikanicisya. Mundu jwamti myiyi akusasogola yisogosi, mwine makumi likumi, mwine makumi msano ni limo, mwine makumi gatatu.”

Citagu ca namsongole pasikati ja tiligu

²⁴ Yesu ŵasalile jemanjajo citagu cine soni. Ŵatite, “Ucimwene wa kwinani mpaka tuwulandanicisye ni mundu jwine juŵapandile mbeju syambone mu mgunda mwakwe.

²⁵ Nambo ŵandu wosope piŵaliji mlugono, m'magongo jwakwe ŵayice ni kupanda litinji pasikati ja tiligu, ni kutyokapo.

²⁶ Sambano piwakusile m'mela ni kutanda kusogola yisogosi, yikoko yila nombe nayo yatandite kuwonecela.

²⁷ Ŵamasengo ŵa msyene mgunda jula ŵayice kwa jwalakwe ni ŵamwusisye kuti, ‘Ambuje, ana ngati mwapandile mbeju syambone mu mgunda mwenumu? Nambi uli mukuwoneka soni litinji?’

²⁸ Jwalakwe ŵajanjile kuti, ‘M'magongo jwangu ni jwatesile yeleyi.’ Ŵamasengo ŵala ŵamwusisye soni kuti, ‘Uli tujawule tukalitupule?’

²⁹ Nambo jwalakwe ŵatite, ‘Iyayi, mwine timkatupulile pampepe ni tiligu pakutupula litinjilyo.

³⁰ Yilekani yikulile pampepe mpaka ndaŵi jagungula. Pa jele ndaŵijo tinjasalila ŵakututa kuti, mkatande kutupula litinji ni kulitaŵa matita kuti mkalijoce, nambo tiligu mumsonganye ni kumtaga mu ngokwe jangu.’ ”

Citagu ca lusongolo lwa mcele ni cakusasaŵilisya mikate

³¹ Yesu ŵasalile citagu cine soni. Ŵatite, “Ucimwene wa kwinani uli mpela lusongolo lwa mbeju ja kacele jiŵajigele mundu ni kuja kukupanda mu mgunda mwakwe.

³² Jili jajinandi mnope kusipunda songolo sine syosope. Nambotu mbeju jakwe naga jikusile, jikusapundaga mawukutu gane gosope. Jikusaŵa citela cekulungwa, nipo yijuni yikusayikaga ni kutaŵa yisusi mu nyambi syakwe.”

Citagu ca cakusasaŵilisya mkate

³³ Yesu ŵasalile citagu cine soni. Ŵatite, “Ucimwene wa kwinani uli soni mpela cakusasaŵilisya mikate,* ciŵacijigele jwamkongwe jwine ni kuciwanganya ni utandi wakwana mipimo jitatu, mpaka mtanda wosope wasasaŵile.”

Ligongo lyakwiganyicisya myitagu

³⁴ Yesu ŵaŵecete yosopeyi ni ŵandu ŵajinji ŵala mu yitagu. Nganaŵecetaga nawo kandu pangakamulisya masengo citagu.

³⁵ Yaliji myoyo kuti yitendekwe yiŵaŵecete jwakulocesya kuti, “Tinjiŵeceta nawo myitagu, tinjijuwula yindu yele yiyaliji yakusisika citandilile kupanganyidwa kwa cilambo capasi.”

Gopolela kwa citagu ca litinji pasikati ja tiligu

³⁶ Kaneko Yesu ŵalesile ŵandu ŵajinji ŵala ni ŵajile kwinjila m'nyumba. Sambano ŵakulijiganya ŵakwe ŵala ŵamŵendile kuti, “Atugopolele citagu ca litinji lya mu mgunda cila.”

³⁷ Yesu ŵatite, “Jwakupanda mbeju jambone jula ni Mwanace jwa Mundu.*

³⁸ Mgunda wula ni cilambo capasi. Mbeju syambone sila ni ŵandu ŵali mu Ucimwene wa kwinani; nansongole jula ni ŵandu ŵali ŵa jwakusakala jula.

³⁹ M'magongo juŵapandile nansongole jula ni Satana.* Kata kula ni kumala kwa cilambo capasi cino, soni ŵakukata ŵala ni malayika.*

⁴⁰ Mpela muŵatendele pakutupula nansongole jula ni kumjoca pa moto, tiyiciŵa soni myoyo pakumala kwa cilambo capasi cino.

⁴¹ Mwanace jwa Mundu tacigatuma malayika gakwe kwisa kukwatyosya mu ucimwene wakwe ŵandu wosope ŵakwalemwekasya acimjawo, ni ŵandu wosope ŵakutenda yakusakala,

⁴² nipo tacaponya mwilamba lya moto. Kweleko tacililaga ni kulumanya meno.

⁴³ Sambano ŵandu ŵakulungama taciŵala mpela lyuŵa mu ucimwene wa Atati ŵawo. Jwakwete mapikanilo, apikane!

Citagu ca cipanje cakusisika ni cuma ca mtengo mnope

⁴⁴ “Ucimwene wa kwinani uli mpela cipanje cakusisika mu mgunda. Mundu jwine ali acisimene, akusacisisa soni. Kaneko mwakusangalala akusatyoka kuja kusumisya yosope yiŵakwete ni kuja kusuma mgunda wula.

⁴⁵ “Nipo soni Ucimwene wa kwinani uli mpela mundu jwa malonda jwakusosasosa cuma cakusalala ca mtengo mnope.

⁴⁶ Nipo naga acisimene cuma cimo ca mtengo wakupunda mnope, akusaja kusumisya yosope yene yiŵakwete, ni kuja kusuma cuma cila.

Citagu ca likoka

⁴⁷ “Soni Ucimwene wa kwinani uli mpela likoka lyakusaliponya ŵandu m'nyasa, nipo likusatanjisya somba sya mitundu josope.

⁴⁸ Naga sigumbele, ŵandu akusaliwutilaga ku mkuli. Sambano akusatamaga pasi, somba syambone akusasitaga mu ngalala, nambo syacabe akusagamba kusijasa.

⁴⁹ Tiyiciŵa soni myoyo pakumala kwa cilambo capasi cino. Malayika tigaciyika ni kwatyosya ŵandu ŵakusakala pasikati pa ŵandu ŵakulungama,

⁵⁰ nipo tacaponya mwilamba lya moto. Kweleko tacililaga ni kulumanya meno.”

Ya cipanje casambano ni cakala

⁵¹ Yesu ŵawusisye ŵandu ŵala kuti, “Ana myipikanicisye cenene yosopeyi?” Jemanjajo ni ŵajanjile kuti, “Elo, tupikanicisye.”

⁵² Pelepo jwalakwe ni ŵasalile ŵanduwo kuti, “Ni ligongo lyakwe mwalimu jwalijose jwa Malamusi, juŵalijiganyisye ya Ucimwene wa kwinani, ali mpela msyene liŵasa jwakusakoposyaga yindu ya sambano ni yindu yakala mu ngokwe ja cipanje cakwe.”

Ŵandu ŵamkanile Yesu ku Nasaleti

⁵³ Yesu piŵamasile kuŵeceta mu yitaguyi, ŵatyosile kumalo kula ni ŵawujilile ku msinda wakumangwawo.

⁵⁴ Piŵayice ku msinda wakumangwawo, ŵatandite kwajiganya ŵandu m'nyumba ja mapopelo, nipo ŵandu ŵiŵaliji kumpikanila ŵasimonjile acitiji, “Ana lunda lwelelu ŵalujigele kwapi?

⁵⁵ Ana jweleju ngaŵaga mwanace jwa m'misili jwa matabwa jula? Ana mamagwe ngaŵaga Maliya, soni acalongo acimjakwe ngaŵaga Yakobo, Yosefe, Simoni ni Yudasi?

⁵⁶ Ana acalumbugwe ngaŵaga tuli nawo panopano? Nambi sambano yosopeyi ŵayijigele kwapi?”

⁵⁷ Myoyo ŵanduwo ŵamkanile jwalakwejo. Nambo Yesu ŵasalile kuti, “Jwakulocesya akusacimbicikwaga kwine kulikose, nambo ngaŵaga kumangwakwe, ni pasikati pa ŵandu ŵa mwiŵasa mwakwe.”

⁵⁸ Nipo Yesu nganatenda yitendo ya macili yejinji kweleko, ligongo lyakuti ŵandu nganakola cikulupi mwa jwalakwejo.