Matayo 12 - Chiyawo Bible

Ya lisiku lyakupumula lya Ayuda

¹ Pa lisiku line lyakupumula lya Ayuda, Yesu* ni ŵakulijiganya* ŵakwe ŵaliji mkwenda kupitila m'migunda ja tiligu. Ŵakulijiganya ŵakwewo jakwete sala nipo ŵatandite kupulula masace ga tiligu ni kulyaga.

² Afalisi* piŵayiweni yeleyi yili mkutendekwa ŵamsalile Yesu kuti, “Mlole ŵakulijiganya ŵenu akutenda yigakukana Malamusi kuyitenda pa lisiku lyakupumula.”*

³ Yesu ŵajanjile kuti, “Ana nganimŵalanga yiŵatesile Daudi* pampepe ni acimjakwe pa ndaŵi jijakwete sala?

⁴ Jwalakwe ŵajinjile m'Nyumba ja AMBUJE ni kuja kulya mkate wakupelecedwa kwa Mlungu pampepe ni acimjakwe ŵiŵaliji nawowo. Nambo Malamusi nganigamkundaga jwalakwe atamose acimjakwe ŵiŵaliji nawowo kulya wele mikatejo akaŵe ŵakutaga mbopesipe.

⁵ Ana nganimŵalanjeje soni m'Malamusi pemo kuti, m'Nyumba ja AMBUJE pa lisiku lililyose lyakupumula lya Ayuda, ŵakutaga mbopesi akusakasaga lilamusi lyakusala ya lisiku lyakupumula, nambotu ngakwatenda ŵakulemwa?

⁶ Nipo ngumsalila kuti pana jwine apano jwakujipunda Nyumba ja AMBUJEJO.

⁷ Mkamanyilile gopolela kwa maloŵe ga Mlungu gala gakuti, ‘Ngusasaka canasa, ngaŵa mbopesi.’ Myoyo ngamkanimwalamula kuti ŵandu ali ŵakulemwa nambo mkanalemwe kose.

⁸ Pakuŵatu Mwanace jwa Mundu* akwete ulamusi wosope wakwayana ni yakwenela kuyitenda pa lisiku lyakupumula.”

Yesu ŵaposisye mundu jwamnyolole mkono

⁹ Yesu ŵatyosile kweleko ni ŵajile kwinjila m'nyumba ja mapopelo.

¹⁰ Mwelemo mwaliji mwana mundu juŵakwete ligasa lyenyolole. Sambano ŵandu ŵane ŵaliji pelepo uŵasosaga kuti amsimanile magongo Yesu, myoyo ŵamwusisye kuti, “Ana Malamusi gakusakunda kuposya mundu pa lisiku lyakupumula?”

¹¹ Yesu ŵajanjile kuti, “Nduni mwa jemanja jwakwete ngondolo jimpepe nipo naga ngondolojo pati jigwilile mwisimbo pa lisiku lyakupumula, mpaka ajilece ngajikamula ni kujikoposya?

¹² Nambi uli mundu, jwele jwali jwakusosekwa mnope kujipunda ngondolo! Nikutitu Malamusi gakusakunda kutenda yambone pa lisiku lyakupumula.”

¹³ Papopo ŵamsalile mundu jwa ligasa lyenyolole jula kuti, “Mtambasukule ligasa lyenu.” Jwalakwe ŵatambasukwile, nipo ligasa lyaŵele cenene mpela lijakwe.

¹⁴ Pelepo Afalisi ŵala ŵakopwece kuja kutenda mtemela kuti apate litala lyakumwulajila Yesu.

Yesu ni jwakutumicila jwakusagulidwa ni Mlungu

¹⁵ Yesu piŵapikene ya mtemelawo, ŵatyosile gele malogo. Ŵandu ŵajinji ŵamkuyiye, nipo jwalakwe ŵaposisye ŵiŵaliji mkulwala.

¹⁶ Nambo jwalakwe ŵalamwile jemanjajo kuti akamjuwula jwalakwejo.

¹⁷ Jwalakwe ŵatesile yeleyi kuti yitendekwe yiŵaŵecete Mlungu kupitila mwa jwakulocesya* Yesaya piŵatite kuti,

¹⁸ “Aju ni jwakutumicila jwangu junamsagwile, ngusinamnonyela, soni mtima wangu ukusasangalalaga najo kwabasi. Tinjimpa jwalakweju Msimu wangu, Nipo tacilalicila ya cilungamo kwa ŵandu mitundu jine.

¹⁹ Jwalakwe ngasatenda makani kapena gumila, pangali mundu jutacipikana liloŵe lyakwe m'misewu ja m'misinda.

²⁰ Jwalakwe ngasamalisya kutemangula litete lyeposokoce, nipo ngasasimisya nyali jakusilala, mpaka cilungamo ciyice ni kupunda.

²¹ Nipo ŵandu ŵa mitundu jine* josope, tacimkulupilila.”

Yesu ni Belesebulu

²² Kaneko ŵandu ŵane ŵayice kwa Yesu ni mundu jwangalola, nambo soni jwangaŵeceta ligongo jwakamwilwe ni msimu wakusakala. Yesu ŵamposisye mundujo kwakuti ŵatandite kuŵeceta ni kulola kwakwe.

²³ Ŵandu wosope ŵasimonjile pa yele yiŵatesile Yesu mwakuti ŵawusisye kuti, “Ana jweleju ngati mwanagwawo Daudi jula?”

²⁴ Nambo Afalisi piŵapikene yeleyi ŵajanjile kuti, “Iyayi, macili gakukopocesya nago misimu jakusakala* ngagakutyocela kwine, nambo kwa Belesebulu,* mcimwene jwa misimu jakusakala.”

²⁵ Yesu pakusimanyilila nganisyo syawo, ŵasalile kuti, “Ŵandu ŵa ucimwene uliwose naga akutanda kwimucilana, ucimwenewo ngawukusalimba. Soni ŵandu ŵa mwiŵasa limpepe naga akutanda kugaŵikana, liŵasa lya mtundu welewo ngakomboleka kulimba.

²⁶ Naga ŵandu ŵa mu ucimwene wa Satana* akukoposyana acimsyene, ni kutitu ajimucilene, nambi Satanajo ucimwene wakwe mpaka ulimbe camtuli?

²⁷ Jemanja mkuti une ngusakoposya misimu jakusakala ni macili ga Belesebulu, nambi ŵakulijiganya ŵenu akusajikoposyaga ni macili ga ŵani? Ni ligongo lyakwe ŵakulijiganya ŵenu pewo ni ŵitacimlamula kuti mli ŵakulemwa.

²⁸ Nambo naga ngusajikoposyaga misimu jakusakala ni macili ga Msimu wa Mlungu, ni kuti yikulosya kuti Mlungu atandite kala kuwutamilisya Ucimwene wakwe pasikati penu.

²⁹ “Pangali mundu jwampaka apakombole kwinjila m'nyumba ja mundu jwamacili ni kumsumula cipanje cakwe, mkanatande kaje kumtaŵa mundu jwamacilijo. Pati amtaŵile, ni pitapakombole kumsumula ya m'nyumbamo.

³⁰ “Mundu jwangakwiticisyana ni une, ni kuti akusisyana ni une. Nipo jwakakungamucisya kusonganya pampepe, ni kuti jwelejo akusamwasanya.

³¹ Ni ligongo lyakwe ngumsalicisya kuti Mlungu tacakululucila ŵandu ulemwa* uliwose atamose maloŵe ga cipongwe gakumnyosya jwalakwejo. Nambo naga mundu akutendela cipongwe Msimu Ŵaswela, Mlungu ngasamkululucila.

³² Yalumope soni kuti mundu jwalijose jwakumŵecetela maloŵe gakusakala Mwanace jwa Mundu, Mlungu tacimkululucila. Nambo jwalijose jwakumŵecetela maloŵe gakusakala Msimu Ŵaswela, Mlungu ngasamkululucila kose ndaŵi ajino, atamose soni ndaŵi jajikwisajo.”

Ya citela ni yisogosi yakwe

³³ “Pamkuŵeceta kuti, ‘Citela aci cambone,’ ni kuti yisogosi yakwe soni yili yambone. Nambo naga mkuŵeceta kuti, ‘Citela aci cacabe,’ ni kuti yisogosi yakwe soni yili yacabe. Pakuti citela cikusamanyika ni yisogosi yakwe.

³⁴ Ŵanace ŵa majokamwe, mpaka mpakombole uli kuŵeceta yambone kutendaga mli ŵakusakala? Pakuti pakamwa pa mundu pakusaŵeceta yayigumbele mu mtima mwakwe.

³⁵ Mundu jwambone akusakoposya yambone kutyocela mcipanje cakwe ca yindu yambone mu mtima mwakwe, nambo mundu jwakusakala akusakoposya yakusakala kutyocela mcipanje cakusakala ca mu mtima mwakwe.

³⁶ Ngumsalicisya kuti pa lisiku lyakulamula, ŵandu tacijimbidwa magambo ligongo lya maloŵe galigose gangalumbana gimwaŵecete.

³⁷ Mwakuti ligongo lya maloŵe genu gagogo pego, magambo tigacimsalalila kapena kumsakalila.”

Ŵandu ŵasacile cimanyisyo cakumasya lunda

³⁸ Pelepo aciŵalimu ŵane ŵa Malamusi ni Afalisi ŵane ŵamsalile Yesu kuti, “Cemwalimu, tukusaka kuti atulosye cimanyisyo cakumasya lunda.”

³⁹ Nambo Yesu ŵatite, “Ŵandu ŵa mpago awuno ali ŵangalumbana soni ŵangakulupicika, akusasaka kuciwona cimanyisyo cakumasya lunda. Nambope ngasaciwona cimanyisyoco, akaŵe cilacila ca jwakulocesya Yona.

⁴⁰ Pakuti mpela muŵaŵelele Yona mlutumbo mwa cinsomba cila kwa masiku gatatu, musi ni cilo, myoyo soni Mwanace jwa Mundu tacitama mkati mwa litaka masiku gatatu, musi ni cilo.

⁴¹ Pa lisiku lyakulamula, ŵandu ŵa ku Ninefe tacijimuka ni kwima pampepe ni ŵandu ŵa mpago awuno, ni taciŵaga mkwasisya. Pakuti jemanjajo ŵapitikwice mitima jawo ali apikene yiŵalalicile Yona. Sonitu apano apali jwakumpunda Yona jwenejo.

⁴² Pa lisiku lyakulamula, mwenye jwamkongwe jwa ku cilambo ca Sheba, tacijima pampepe ni ŵandu ŵa mpago awuno ni taciŵaga mkwasisya, ligongo ŵajesile kutyocela kumbesi kwa cilambo kuja kupikanila yakuŵeceta ya lunda ya Mwenye Solomoni. Mlole sambano, apanotu pana jwakumpunda Solomoni.”

Ya msimu wakusakala wakuwujilila mwa mundu

⁴³ “Msimu wakusakala naga ukopwece mwa mundu ukusaja kukwendajenda kumalo kukuli kwangali mesi, kukusosasosa malo gakupumulila. Naga msimuwo ulepele kugasimana malogo ukasatiji kuti,

⁴⁴ ‘Timbujile ku nyumba jangu kunakopwece kula.’ Nipo pati uyice, ukusasimanaga m'nyumba mula muli mwekolosye cenene.

⁴⁵ Pelepo ukusajaga kujijigala misimu jine msano ni jiŵili jakusakala kuwupunda winewo, josopejo jikusajinjila ni kutamilicika m'momo. Myoyo ndamo syakuyicisya sya mundu jula sikusaŵaga syakusakala kupunda ndamo syakwe sya pandanda sila. Tiyiciŵa soni myoyo kwa ŵandu ŵakusakala ŵa mpago awuno.”

Mamagwe ni acalongo ajakwe Yesu

⁴⁶ Yesu piŵaŵecetaga ni ŵandu ŵajinji ŵala, ndaŵi jijojo mamagwe ni acalongo acimjakwe ŵayice ku nyumba jila ni ŵajimi pasa. Ŵasosaga lipesa lyakuti aŵecete najo.

⁴⁷ Sambano mundu jwine ŵamsalile Yesu kuti, “Mama ŵenu ni acalongo acimjenu ali pasapa, akusosa kuŵecetana namwe.”

⁴⁸ Yesu ŵajanjile kuti, “Ana mama ŵangu, ni acalongo acimjangu ni ŵani?”

⁴⁹ Kaneko ŵalanjile ni cala ŵakulijiganya ŵakwe acitiji, “Unetu mama ŵangu ni acalongo acimjangu ni aŵa.

⁵⁰ Pakuti mundu jwalijose jwakutenda lisosa lya Atati ŵangu ŵakwinani, jwelejo ni mlongo mjangu, mlumbu gwangu ni mama ŵangu.”