Matayo 11 - Chiyawo Bible

Yohane M'batisi ŵatumile ŵakulijiganya ŵakwe kwa Yesu

¹ Yesu* piŵamasile kwasalila yakuti atende ŵakulijiganya* ŵakwe 12 ŵala, jwalakwe ŵatyosile kweleko kuti akajiganye ni kulalicila m'misinda jakuŵandicila kweleko.

² Nombe najo Yohane M'batisi piŵaliji m'nyumba ja ukayidi, ŵapikene ya masengo giŵatendaga Klistu* jula, ŵatumile ŵane ŵa ŵakulijiganya ŵakwe kwa jwalakwe kuja kukumwusya kuti,

³ “Ana ŵalakwe ni ŵiŵatiga ŵala kuti taciyika, kapena tujembeceleje ŵane?”

⁴ Yesu ŵajanjile kuti, “Mjawule, mkasalile Yohane yosope yimkuyipikana ni kuyiwona.

⁵ Ŵangalola akupakombola kulola, ŵalemale ngongolo akupakombola kwenda, ŵamatana akupola, ŵangapikana akupakombola kupikana, ŵane akwimusidwa kutyocela ku ŵawe, soni Ngani Syambone* syakwamba Yesu sikulalicidwa kwa ŵakulaga.

⁶ Jwana upile mundu jwangakusimana cakusawusya mwa une!”

⁷ Piŵatyokaga ŵakulijiganya ŵa Yohane ŵala, Yesu ŵatandite kugawusya makuga ga ŵandu ŵala kwambaga ya Yohane kuti, “Ana pimwajawulaga kuŵaliji Yohane ku cipululu, mwatiji mkuja mkaciwone cici? Ana litete lyakutenganyika ni mbungo?

⁸ Nambi mwatiji mkalole cici? Ana mundu jwawete yakuwala yakutependala? Iyayi, ŵandu ŵakusawala mwamti myoyo akusatama mu umi wangasoŵa cilicose soni akusatamaga m'majumba ga ucimwene.

⁹ Musaliletu, ana mwajile kukulola cici? Ana jwakulocesya?* Yisyene nditu, nambo soni ngumsalila kuti mwajile kukumlola jwakumpunda jwakulocesya.

¹⁰ Pakuti Yohane ni jwejula jwele Malemba gakuŵeceta ya jwalakweju kuti, ‘Mlole, ngumtuma jwamtenga jwangu pasogolo penu, kuti akakolosye cile litala litimcipita m'mwejo.’

¹¹ Ngumsalicisya kuti, mwa ŵandu wosope ŵapagwile pacilambo capasi pano, pangali ni jumo jose jwakumpunda Yohane M'batisi. Nambo mundu jwali jwamnondi mu Ucimwene wa Kwinani ali jwamkulungwa kumpunda Yohane.

¹² Kutandila pa ndaŵi ja Yohane M'batisi mpaka sambano jino, Ucimwene wa kwinani ulasile ni ciwawa nipo ŵandu ŵaciwawa akulinga kuwusumula mwakanganicisya.

¹³ Ŵakulocesya wosope soni Malamusi ga Mose* gaŵecete cile ya Ucimwene welewu mpaka ndaŵi ja Yohane M'batisi.

¹⁴ Nipo naga mkusaka kulupilila yeleyi, Yohanejo nijo Eliya* juŵatiga kuti taciyika jula.

¹⁵ Jwakwete mapikanilo, apikane!

¹⁶ “Ana ŵandu ŵa sambano jinoŵa, tinalandanicisye ni cici? Ali mpela ŵanace ŵakutama pa msika, ni kusalilanaga mwakwesya maloŵe kuti,

¹⁷ ‘Twamjimbile nyimbo ja pa ulombela, nambo nganimŵina? Twajimbile nyimbo sya pa malilo, nambo nganimlila?’

¹⁸ Piŵayice Yohane M'batisi, ŵalijimaga yakulya soni nganamwaga finyo, nipo jwalijose jwatiji kuti, ‘Akamwilwe ni msimu wakusakala.’

¹⁹ Mwanace jwa Mundu* jwayice, jwalyaga ni kumwa kwakwe, nambo ŵandu ŵatiji, ‘Mumlole, mundu jwakutunduka ni jwakolelwa, m'mbusanga jwa ŵakomesya msongo ni ŵandu ŵa ulemwa.’* Lunda lwa Mlungu lukusawoneka kuti luli lwakuwona malinga ni yitendo yakwe.”

Ya misinda jangakulupilila

²⁰ Kaneko Yesu ŵatandite kujijamuka misinda jiŵajitendele jwalakwe yindu yamacili yayijinji. Ŵajijamwice ligongo ŵandu wakwe ŵaliji ŵangapitikuka kose mitima jawo.

²¹ Jwalakwe ŵatite, “Mkwete likungu jemanja ŵandu ŵimkutama mu msinda wa Kolasini! Mkwete likungu jemanja ŵandu ŵimkutama mu msinda wa Betisaida! Ligongo yindu yamacili yiyatendecele jemanja yikaŵe kuti yatendekwele misinda ja Taya ni Sidoni, ŵandu ŵakwe akaliji ali awete kalape yiguduli ni kulipakasya liwu.

²² Nambo ngumsalicisya kuti pa lisiku lyakulamula, Mlungu tacitendela Taya ni Sidoni canasa kumpunda jemanja.

²³ Nipo m'mwe Kapelenaumu, ana mkuganisya kuti tacimkwesya mpaka kwinani? Iyayi, tacimponyela ku malo ga ŵandu ŵawe.* Ligongo yindu yamacili yiyatendekwe mwa m'mwejo, yikaŵe kuti yatendecele mu Sodomu, msindawo ukaliji ciŵela mpaka lelo jino.

²⁴ Nambo ngumsalicisya kuti pa lisiku lyakulamula, Mlungu tacitendela Sodomu canasa kulekangana ni m'mwejo.”

Yesu ni jwakupeleka cipumulisi

²⁵ Pa ndaŵi jelejo Yesu ŵatite, “Atati, Ambuje ŵakwinani ni cilambo capasi. Ngumtogolela kuti mwasalile ŵandu ŵangalijiganyaŵa yindu yiyaliji yakusisika kwa ŵandu ŵalunda ni ŵamlijiganye.

²⁶ Elo, Atati, pakuti amu ni muŵasacile ŵalakwe kuti yitendekwele.

²⁷ “Atati ŵangu ambele yindu yosope yene, ŵelewo ni ŵakum'manyilila Mwanace. Ŵane soni ŵakwamanyilila Atati ali Mwanace. Nambo mwanace akusaka kwasalila ŵandu ŵane kwambaga ya Atati, kuti nombe nawo jemanjajo ŵamanyilile ŵelewo.

²⁸ “Myice kwangune, jemanja wosope ŵakupela ni ŵakusitopelwa, nipo tinampumusye.

²⁹ Twicilani likongwa lyangu nipo mlijiganye kwa une, pakuti ndili jwakutulala mtima ni jwakulinandiya; naga mkutenda yingumsalilayi, timcisimana cipumulisi ca umi wenu.

³⁰ Pakuti likongwa lingusakoleka une lili lyangasawusya, nipo msigo wungumtwika uli wangasitopa.”