Matayo 10 - Chiyawo Bible

Ya ŵandumetume likumi ni ŵaŵili ŵa Yesu

¹ Yesu* ŵaŵilasile ŵakulijiganya* ŵakwe likumi ni ŵaŵili pampepe, ni ŵapele macili gakopocesya misimu jakusakala, soni gakuposya yilwele yosope ya ŵandu ni kulembuka kwa myilu yawo.

² Aga gali mena ga ndumetume likumi ni siŵili: Jwandanda ni Simoni,* jwakolanjidwa Petulo, ni Andileya,* mpwakwe; Yakobo,* mwanace jwa Sebedayo, ni Yohane* mpwakwe;

³ Filipi* ni Batolomeyo; Tomasi* ni Mateyu,* jwakomesya msongo jula; Yakobo,* mwanace jwa Alifeyo ni Tadeyo;*

⁴ Simoni,* jwa mcipani ca ndale ca Aseloti;* nipo soni Yudasi Isikaliyoti,* juŵatesile malindi gakumpeleka Yesu kwa amagongo ŵakwe.

Yesu ŵatumile likumi ni ŵaŵili ŵala

⁵ Yesu ŵatumile ŵandu likumi ni ŵaŵili ŵala ni ŵalamwile kuti, “Mkajawula kwa ŵandu ŵa mitundu jine* kapena kuja kwinjila mu msinda uliwose wa Asamaliya.*

⁶ Nambo kusyesyene mjawule kwa Aisalaeli ŵali mpela ngondolo syakusokonecela.

⁷ Mjawule, mkalalicileje kuti, ‘Ucimwene wa kwinani uŵandicile.’

⁸ Mkaposyeje ŵakulwala, mkajimusyeje ŵawe, mkatyosyeje ŵandu matana, mkakoposyeje misimu jakusakala. Mwapocele mwalulele, myoyo kapeleceni soni mwalulele.

⁹ Mkajigala myikwama mwenu mbiya sya golidi,* sya silifa,* atamose sya cisyano cilicose.

¹⁰ Mkajigala msaku wa pa ulendo, kapena malaja gapadela, kapena sapato, kapena simbo, pakuti jwamasengo akwenela kupocela yakusosekwa pa umi wakwe.

¹¹ “Pimkwinjila mu msinda kapena m'musi uliwose, mkawucisye cenene ya mundu jwakuŵajilwa kumpocela. Mtame najo ku nyumba jakwe mpaka ndaŵi jitimtyoce malo gelego.

¹² Pakwinjila m'nyumba, mkajileje kuti, ‘Mtendele uŵe ni jemanja.’

¹³ Naga ŵandu ŵali m'nyumbamo ampocele cenene, mtendele wenuwo, uŵe ni jemanjajo nditu. Nambo naga ŵandu ŵali m'nyumbamo akukana kumpocela, mtendele wenuwo, uwujile kwa mwacimsyene.

¹⁴ Mundu jwalijose naga akukana kumpocela kapena kugapikanila maloŵe genu, tyokani mwalecele nyumba jawojo, pane mu msinda mwawomo, nipo pakutyoka pa gele malogo, mwakung'undile luwundu lwa ku sajo syenu.

¹⁵ Nditu ngumsalicisya kuti pa lisiku lyele litacilamula cilambo capasi, jwalakwejo tacatendela canasa cejinji ŵandu ŵakutama mu msinda wa Sodomu ni Gomola kulekangana ni ŵa mu msinda welewo.

Yakuti ŵandumetume tacilagasidwa

¹⁶ “Mpikanicisye cenene yingumsalilayi! Ngumtuma mpela ngondolo sikati ja masogo.* Ni jemanja mtameje ŵakalamuka mpela majoka, ni ŵakuwusimana mtima mpela ngunda.

¹⁷ Mkalamuce nawo ŵandu. Ligongo tacimjigalila ku nganya kukumjimba magambo, soni tacimkwapula m'nyumba syawo sya mapopelo.

¹⁸ Tacimjigalila kwa ŵakulamula ni kwa acayimwene kukumjimba magambo ligongo lya une, mwakuti timcindendela umboni pameso pawo, ni pameso pa ŵandu ŵa mitundu jine.

¹⁹ Pitacimjigalila ku magambo, mkaja kudandawula ni kuganisya kuti, ‘Ana tukaŵecete camtuli?’ Kapena kuti, ‘Ana tukaŵecete cici?’ Pakuti timcipegwa ndaŵi jijojo maloŵe gakuti mŵecete.

²⁰ Pakuti ŵitaciŵecetaga, ngasimŵa jemanja, nambo Msimu wa Atati ŵenu ŵakwinani ni ŵitaciŵecetaga kupitila mwenumwe.

²¹ “Mundu tacimpeleka mlongo mjakwe jwene kuti awulajidwe, nipo mtati tacimpeleka mwanagwe. Ŵanace tacajimucila acinangolo ŵawo mpaka kwawulaga.

²² Ŵandu wosope tacimŵenga jemanja ligongo lyakunguya une. Nambo mundu jutacipilila mpaka pa mbesi, jwelejo ni jutacikulupuka.

²³ Sambano pitacimsawusyaga mu msinda wine, m'mwe cimtilile ku msinda wine soni. Ngumsalicisya kuti mkanim'malisye kwendela misi josope ja Aisalaeli, Mwanace jwa Mundu* taciŵa ali ayice.

²⁴ “Jwakulijiganya jwangampunda mwalimu jwakwe, nipo jwamasengo jwangampunda mbujegwe.

²⁵ Yikuŵajilwa kuti jwakulijiganya alandane ni mwalimu jwakwe, soni kuti jwamasengo alandane ni mbujegwe. Naga ŵandu ŵamkolasile msyene liŵasa kuti Belesebulu,* nambi kuli uli ŵa mwiŵasa lyakwe, ana ngaŵa mkwakolanga mena gakusakala kupunda pelepa?

Jwakuŵajilwa kumjogopa

²⁶ “Myoyo kasimwajogopaga jemanjajo. Cindu cilicose cili cakusisika ticicimanyika, soni ya asili yiliyose tiyicimanyika.

²⁷ Yingumsalila pacisyepela, jemanja mkayisalicisyeje pakulanguka, soni yimyipikene mwakusongona, jemanja mkayijenesyeje kwa jwalijose.

²⁸ Mkasimwajogopaga ŵele ŵakusawulaga cilu, nambo ngaŵa mkupakombola kuwulaga msimu. Kusyesyene mumjogopeje Mlungu jwampaka apakombole konanga cilu ni msimu wakwe ku Jahena.*

²⁹ Ana ngati akusasumisya tujuni tuŵili twa timba ni kambiya kamope? Kutendaga pangali atamose kamo ka tujunito kampaka kagwile pasi akakumanyilila Atati ŵenu.

³⁰ Jemanjatu atamose umbo syosope sya mu mtwe wenu ŵasiŵalasile syosope.

³¹ Myoyo mkajogopaga. Jemanja mli ŵamtengo mnope kupunda yijuni ya timba yejinji.

Kwambaga ya kwiticisya Klistu pameso pa ŵandu

³² “Jwalijose jwakunjiticisya une pameso pa ŵandu, nombe une tinjimjiticisya pameso pa Atati ŵangu ŵakwinani.

³³ Nambo jwalijose jwakungana une pameso pa ŵandu kuti ngakumanyilila, nombe une tinjimkana pameso pa Atati ŵangu ŵakwinani kuti Ngingum'manyilila.

Ya kugaŵikangana kwa ŵandu ligongo lya Yesu

³⁴ “Mkaganisya kuti yice kukupeleka mtendele pa cilambo capasi pano. Nganiyika kupeleka mtendele, nambo ngondo.

³⁵ Unetu nayice kukulekanganya mwanace jwamlume ni babagwe, mwanace jwamkongwe ni mamagwe, jwamkongwe ni akwegwegwe.

³⁶ Mwakuti amagongo ŵa mundu taciŵa ŵa mwiŵasa lyakwe pemo.

³⁷ “Mundu jwakwanonyela babagwe kapena mamagwe kupunda une, ngakuŵajilwa kuŵa jwakulijiganya jwangu. Nipo jwakumnonyela mwanagwe jwamlume kapena jwamkongwe kupunda une, ngakuŵajilwa kuŵa jwakulijiganya jwangu.

³⁸ Mundu jwangakutwicila msalaba wakwe ni kunguyaga une, ngakuŵajilwa kuŵa jwakulijiganya jwangu.

³⁹ Mundu jwakulinga mwajika kuwusunga umi wakwe, taciwujasa, nipo jwakwasa umi wakwe ligongo lya une, taciwusimana soni.

Ŵitacipocela mbote

⁴⁰ “Mundu jwakumpocela jemanja, akumbocela une. Nipo jwakumbocela une, akasiŵapocela soni Atati ŵiŵandumile une.

⁴¹ Mundu jwakumpocela jwakulocesya* ligongo lyakuti ali jwakulocesya, nombe najo tacipocela mbote ja jwakulocesya. Nipo jwele jwakumpocela mundu jwakulungama ligongo lyakuti ali jwakulungama, tacipocela mbote ja mundu jwakulungama.

⁴² Nipo jwalijose jwakupeleka mgawo wa mesi gakusisima kwa jumo jwa ŵakulijiganya ŵanguŵa, ligongo lyakuti ali jwakulijiganya jwangu, nditu ngumsalicisya kuti jwelejo ngasalepela kose kupocela mbote jakwe.”