Masengo 9 - Chiyawo Bible

Saulo akupitikuka mtima

¹ Saulo* jula jwaliji mkwajogoyape ŵakulijiganya* ŵa Ambuje ni ŵasosaga kwawulaga. Ŵapite kwa jwamkulungwa jwa ŵakutaga mbopesi.*

² Kukuŵenda yikalata yakuti ajawule nayo ku nyumba syakupopelela sya ku Damasiko. Ŵasakaga kuti naga akasimane ŵane ŵakukuya litala* lya Ambuje, acalume kapena acakongwe akataŵe ni kwawula nawo ku Yelusalemu.

³ Piŵaliji pa ulendo ŵakwewo, ali aŵandicile msinda wa Damasiko wula, mwacisisimucisya, lilanguka lyakutyocela kwinani lyamsyungulile.

⁴ Jwagwile pasi ni ŵapikene maloŵe gakuti, “Saulo, Saulo, mkusawucisya cici une?”

⁵ Jwalakwe ŵawusisye kuti, “Ana ŵalakwe ŵani, Ambuje?” Ni ŵajanjile kuti, “Une Yesu* jumkusawusya!

⁶ Nambo jimukani, mjinjile mu msindamo ni takamsalile yakutenda.”

⁷ Ŵandu ŵiŵaliji najo pa ulendo ŵala ŵagambile kwima jii ngaŵeceta kandu kalikose. Ŵapikanaga maloŵe nambo ngamwona kose mundu.

⁸ Saulo ŵajimwice, nambo piŵawunukwile m'meso mwakwe, nganakombola kulola kandu kalikose. Sambano acimjakwe ŵala ŵamkamwile pa mkono ni ŵajinjile najo mu Damasiko.

⁹ Kwa masiku gatatu, ŵatemi ali ngakulola nipo soni ngalya kapena kumwa kandu kalikose.

¹⁰ Ku Damasikoko kwapali jwakulijiganya jwine lina lyakwe Ananiya. Jweleju ŵaweni Ambuje kupitila m'mesomkulola ali mkumŵilanga kuti, “Ananiya!” Ni jwajanjile kuti, “Ndili apano Ambuje.”

¹¹ Ambuje ŵamsalile kuti, “Mjawule litala lya mu msindamo, likuŵilanjidwa, ‘Litala lya Goloka.’ Nipo ku nyumba ja Yudasi mkawusye mundu jwa ku Talisasi lina lyakwe Saulo, akupopela pa ndaŵi jinojino.

¹² Pakuŵa am'weni m'mesomkulola mundu jwine, lina lyakwe Ananiya ali mkwinjila kukumsajika magasa kuti alole soni.”

¹³ Ananiya ŵatite, “Ambuje, ŵandu ŵajinji asalile ya mundu jweleju, kuti ŵatendele ŵandu ŵenu yakusakala yejinji ku Yelusalemu.

¹⁴ Soni ayice akuno ni ulamusi wakutyocela kwa acakulungwa ŵa ŵakutaga mbopesi kuti ŵataŵe ŵandu wosope ŵakulumba lina lyenu.”

¹⁵ Nambo Ambuje ŵamsalile kuti, “Mjawule, pakuti jweleju sambano ali jwakutumicila jwangu, junamsagwile kuti akalalicile ya lina lyangu kwa ŵandu ŵa mitundu jine,* ayimwene, nipo soni Aisalaeli.

¹⁶ Une namsyene tinjimlosya jwalakwejo yipwetesi yosope yikwenela kuti ayipikane ligongo lya une.”

¹⁷ Pelepo Ananiya ŵajimwice ni ŵapite kwinjila m'nyumbamo. Ni ŵamsajice magasa gakwe pa mtwe pa Saulo acitiji, “Mlongo mjangu Saulo, Ambuje Yesu ŵele ŵiŵamwonecele petala limwapitile lila, andumile kuti mlole soni, nipo kuti mpocele ni gumbalidwa ni Msimu Ŵaswela.”

¹⁸ Papopo m'meso mwakwe mwagwile yindu yamti mpela maŵamba ga somba, nipo ŵatandite kulola soni. Ŵajimi ni ŵabatisidwe;

¹⁹ piŵamasile kulya ŵapatile soni macili. Saulo ŵatemi masiku gakuŵalanjika pamo ni ŵakulijiganya ŵa ku Damasiko.

Saulo ŵalalicile ku Damasiko

²⁰ Nipo mwangakaŵilisya ŵatandite kulalicila m'nyumba sya mapopelo* sya Ayuda acitiji, Yesu ni Mwanace jwa Mlungu.

²¹ Ŵandu wosope ŵiŵapikene maloŵe gakwe ŵasimonjile, ni ŵawusyene kuti, “Ana jweleju ngaŵa julajula juŵaliji mkuwulaga ŵandu ŵakulumba lina lyeleli ku Yelusalemu? Ana jweleju ngaŵa ayice akuno kuti ŵataŵe ŵandu mpela ŵeleŵa ni kuja kwapeleka kwa acakulungwa ŵa ŵakutaga mbopesi?”

²² Nambo macili ga Saulo galiji mkulilakulila, nipo ŵamasisye lunda Ayuda ŵiŵatamaga ku Damasiko pakwasimicisya kuti Yesu kweli ni Mkulupusyo nditu.

Saulo ŵatisile Ayuda

²³ Gali gapite masiku gejinji, Ayuda ŵapangene kuti amwulaje Saulo,

²⁴ nambo ŵandu ŵane ŵamsalile Saulo ya ciswambaco. Ŵandu ŵaciswambawo ŵaliji mkulondela yipata ya mu msindawo musi ni cilo kuti amwulaje.

²⁵ Nambo ŵakulijiganya ŵakwe ŵamjigele cilo ni kumtulucisya kusa kupitila pa mpata wa malo gakuciga ni lipupa mlukalala.

Saulo ku Yelusalemu

²⁶ Saulo piŵayice ku Yelusalemu, ŵalinjile kwinjila mu mpingo* wa ŵakulijiganya ŵala. Nambo wosope ŵatesile najo woga, nganakulupililaga kuti nombe najo soni ali jumo jwa ŵakulijiganya.

²⁷ Nambo Banaba ŵamjigele ni ŵapite najo kwa ŵandumetume. Jwalakwe ŵasalile jemanjajo yiŵatite Ambuje pakumwonecela Saulo petala pala, nipo kuti Ambuje ŵaŵecete najo. Ŵasalile soni yiŵatesile Saulo pakulalicila mwakulimba mtima ku Damasiko mu lina lya Yesu.

²⁸ Sambano Saulo ŵatemi nawo, nipo ŵapite palipose mu Yelusalemumo acilalicilaga mwakulimba mtima mu lina lya Ambuje.

²⁹ Ŵaŵacete soni mwangajogopa pakusisyana nawo Ayuda ŵakuŵeceta Cigiliki,* nombe nawo soni ŵasakaga kuti amwulaje.

³⁰ Piŵapikene acalongo acimjakwe yeleyi, ŵapite najo ku Kaisaleya nipo ŵamtumisye ku Talisasi.

³¹ Pelepo mpingo wa ku Yudeya, ku Galileya ni ku Samaliya waliji pa mtendele. Ŵatamilicice, nipo ŵandu ŵajinji ŵajinjile mu mpingomo ligongo ŵandu ŵakwe ŵajendaga mwakwajogopa Ambuje, nipo Msimu Ŵaswela walimbikasyaga.

Petulo ŵamposisye Aineasi

³² Ndaŵi jele Petulo* ŵajendelaga ŵandu ŵa Mlungu, ŵayice kwa ŵele ŵiŵatamaga ku Lida.

³³ Kweleko ŵamsimene mundu jwine, lina lyakwe Aineasi juŵagonile pa ugono yaka msano ni yitatu ali ŵawe yiŵalo yakwe.

³⁴ Sambano Petulo ŵamsalile kuti, “Aineasi, Yesu Klistu* akumposya m'mwejo. Mjimuce, mtandukule ugono wenu.” Papopo jwalakwejo jwajimwice.

³⁵ Ŵandu wosope ŵakutama ku Lida ni ku Shaloni ŵam'weni, ni ŵakulupilile Ambuje.

Petulo ŵamjimwisye Dolika ku ŵawe

³⁶ Ku Yopa kwapali jwakulijiganya jwamkongwe lina lyakwe Tabita (pa Cigiliki akusati Dolika). Ndaŵi josope masengo gakwe galiji kutenda yambone ni kwakamucisya ŵandu ŵakulaga.

³⁷ Masiku gelego jwamkongwejo jwalwalaga ni jwawile, ŵandu ŵajojesye mtembo wakwe ni wawugonece mcipinda m'nyumba ja mwinani.

³⁸ Ku Yopa kwaliji kwakuŵandikana ni ku Lida, ŵatumile ŵandu ŵaŵili kuti akamsalile kuti, “Conde ajanguye, ayice kumangwetu kuno.”

³⁹ Pelepo Petulo ŵalongene nawo pampepe. Piŵayice, ŵampecesye ku cipinda ca mwinani cila. Acakongwe ŵamasije* wosope, ŵamsyungulile acililaga ni mkulosyaga malaja ni yakuwala yine yiŵatotile Dolika ali cijumi.

⁴⁰ Petulo ŵatesile ŵanduwo kuti atame pasa, nipo ŵatindiŵele ni ŵapopesile. Kaneka ŵawugalawucile mtembowo ni ŵatite, “Tabita, mjimuce!” Pelepo Tabita ŵawunikwile meso gakwe, nipo ali am'weni Petulo ŵatemi njoo.

⁴¹ Petulo ŵamkamwile mkono ni kumjimika. Nipo ŵaŵilasile wosope ŵandu ŵa Mlungu ni acakongwe ŵamasije ŵala, ni kumpeleka Dolika jula kwa jemanjajo ali jwacijumi.

⁴² Ngani jeleji japikanice ku Yopa nipo ŵandu ŵajinji ŵakulupilile Ambuje.

⁴³ Petulo ŵatemi ku Yopa masiku gejinji kwa mundu jwinepe lina lyakwe Simoni,* m'misili jwa mapende.