Masengo 7 - Chiyawo Bible

Maloŵe ga Sitefano

¹ Jwamkulungwa jwaŵakutaga mbopesi, ŵamwusisye Sitefano kuti, “Ana yakuŵeceta ŵanduyi yakuwona?”

² Sitefano ŵajanjile kuti, “Acalongo acimjangu ni acatati wosope, mumbikanile une. Mlungu jwa lumbili ŵamwonecele nangolo jwetu Abulahamu* piŵaliji ku Mesopotamiya mkanajawule kukutama ku Halani.

³ Ni ŵamsalile kuti, ‘Mtyoce mcilambo cenu nipo soni mwalece acalongo acimjenu, mjawule ku cilambo cicinamlanjileco.’

⁴ Pelepo ŵakopwece mcilambo ca Akalideya ni ŵatemi ku Halani. Piŵawile babawo, Mlungu ŵatyosisye kweleko, ni ŵaŵisile mcilambo acino cele cimkutamaci.

⁵ Mlungu nganampa Abulahamu kadela kakanandi mcilambomo kuti kaŵe kakwekakwepe. Nambo ŵatesile cilanga* kuti tacimpa cilamboco kuti ciŵe cakwecakwepe kwika soni yisukulu yakwe, atamose kuti pa ndaŵi jelejo ŵaliji ŵangali mwanace.

⁶ Mlungu ŵaŵecete kuti, ‘Yisukulu yenu tiyicija kutama ku cilambo ca cilendo, kweleko taciŵa acikapolo nipo tacasawusya kwa yaka 400.’

⁷ Mlungu ŵatite, ‘Tinjipeleka cilango ku mtundu wele wutaciwutumicilaga. Panyuma pakwe tacikopoka mcilambomo ni kwisa kukulambila une pa malo aganogano.’

⁸ Sambano Mlungu ŵatesile cilanga ni Abulahamu, nipo cimanyisyo cakwe caliji kuwumbala.* Abulahamu ŵawumbesye Isaki ali ni masiku msano ni gatatu gakupagwa. Isaki ŵawumbesye Yakobo,* nipo Yakobo ŵawumbesye ŵanace ŵakwe 12 ŵala, ŵali acinangolo ŵetu.

⁹ “Acinangolo ŵetuwo ŵamtendele wiwu Yosefe mpwawojo nipo ŵamsumisye kuti akaŵe kapolo ku Iguputo. Nambo Mlungu ŵaliji najo,

¹⁰ mwakuti ŵamkopwesye myisawusyo yakwe yosope. Ŵampele lunda ni ndamo syambone pameso pa Mwenye jwa ku Iguputo,* Mwenye jwa ku Iguputo, mwakuti mwenyejo ŵamŵisile Yosefejo kuti aŵe bwanamkubwa* jwa cilambo cosope ca Iguputo nipo soni nyumba jwakwe ja ucimwene josope.

¹¹ Sambano jayice sala mcilambo cosope ca Iguputo nipo soni ku Kenani, kwakuti ŵandu ŵaliji mkulaga mnope. Nombe nawo acinangolo ŵetu nganakombolaga kupata yakulya.

¹² Nipo piŵapikene Yakobo kuti ku Iguputo kwana tiligu, ŵatumile acinangolo ŵetu ŵala nipo welewu waliji ulendo wandanda.

¹³ Pa ulendo wawo waŵili, Yosefe ŵalilosisye kwa acakulugwe nipo ŵamanyisye Mwenye jwa ku Iguputo ya liŵasa lyosope.

¹⁴ Nipo Yosefe ŵatumisye utenga kwa Yakobo babagwe, kwasalila ŵelewo pamo ni liŵasa lyawo lyosope, kuti ayice ku Iguputo. Wosope pampepe ŵaliji ŵandu ŵakwana 75.

¹⁵ Nipo Yakobo ŵajawile ku Iguputo, kweleko ni kuŵawilile pampepe ni acinangolo ŵetu.

¹⁶ Mitembo jawo ŵapite najo ku Shekemu, kweleko ni kuŵasicile mwilembe liŵasumile Abulahamu ni mbiya, kutyocela kwa ŵanace ŵa Hamoli ku Shekemu.

¹⁷ “Pijaŵandicile ndaŵi jele Mlungu jiŵatesile cilanga ni Abulahamu, mtundu ŵetu ŵatupile ku Iguputo.

¹⁸ Pambesi pakwe mwenye jwangam'manyilila Yosefe ŵatandite kulamulila ku Iguputo.

¹⁹ Mwenyejo jwakalamucile ŵandu ŵa mtundu ŵetu ni kutanda kwalagasya acinangolo wetu, nipo ŵakanganicisye kuti ŵaleceje kusa ŵanace ŵawo ŵamakandi kuti amale kuwa.

²⁰ Ndaŵi jeleji ni jiŵapagwile Mose,* soni jwaliji mwanace jwakusalala mnope. Ŵamlelite miesi jitatu acinangolo ŵakwe,

²¹ ni ŵapite kuja kumjasa, mwanace jwamkongwe jwa Mwenye jwa ku Iguputo ŵamlokwete ni ŵamlelite mpelaga mwanace jwakwe.

²² Mose ŵalijiganyisye lunda losope lwa ŵandu ŵa ku Iguputo nipo maloŵe gakwe ni masengo gakwe yaliji yamacili.

²³ “Piŵaliji ni yaka 40 yakupagwa, ŵaganisisye yakwajendela acalongo cimjakwe, Aisalaeli.

²⁴ Lisiku line ŵam'weni jumo jwa ŵandu ŵa ku Iguputoko ali mkulagasya m'Isalaeli, nipo Mosejo ŵamcenjele m'Isalaelijo ni kumwucisya m'Iguputojo pakumwulaga.

²⁵ Nambotu Mose ŵaganisyaga kuti ŵandu ŵa lukosyo lwakwe tacimanyilila kuti Mlungu ŵamsagwile jwalakwe kuti ayice kukwakulupusya, nambo jemanjajo nganamanyilila kose.

²⁶ Kundaŵi kwakwe Mose ŵaweni Aisalaeli ŵaŵili ali mkumenyana acimsyenepe. Ŵalinjile kwajilanya pakwasalila kuti, ‘Jemanja mli ŵa lukosyo lumpepe lwa Aisalaeli, ligongo cici mkulagasyana?’

²⁷ Nambo jwawukolekojo jwamtutile Mose kumbali acitiji, ‘Ana ŵani ŵamŵisile kuti mŵe jwakutulamula ni jwakutujamuka jwetu?

²⁸ Ana mkusaka kumbulaga mpela yimwatesile pakumwulaga m'Iguputo jula liso?’

²⁹ Nambo Mose piŵapikene maloŵega, ŵatisile kutyoka ku Iguputo ni ŵajawile kutama ku cilendo ku cilambo ca Midiyani. Kweleko ŵaŵeleceleko ŵanace ŵaŵili ŵacalume.

³⁰ “Sambano yili yimasile yaka 40, lilayika lyamwonecele Mose mu lilamba lya moto lili mkolela pewukutu, mcipululu cicaliji pakuŵandikana ni Litumbi lya Sinayi.

³¹ Mose ŵasimonjile ni yiŵayiweniyo nipo ŵaŵandicile liwukutulyo kuti alolecesye. Pelepo ŵapikene liloŵe lya Ambuje licitiji,

³² ‘Une ndili Mlungu jwa acinangolo ŵenu. Mlungu jwa Abulahamu, Isaki ni Yakobo.’ Mose ŵatetemele ligongo lya woga mwakuti nganalimba soni mtima kuti akalolecesye.

³³ Apo Ambuje ŵamsalile kuti, ‘Mwule sapato syenu, ligongo malo gimkupondago gali gamaswela.

³⁴ Nakuweni nditu kulaga kwa ŵandu ŵangu ŵali ku Iguputo. Mbikene kulila kwawo, nipo yice kuti nakulupusye. Kwende sambano, namtume ku Iguputo.’

³⁵ “Mosejo ni julajula jwele Aisalaeli ŵala ŵamkanile acitiji kuti, ‘Ana ŵani ŵamŵisile kuti mŵe jwamkulungwa ni jwakutujamuka jwetu?’ Jujojo Mlungu ŵamtumile kuti aŵe jwamkulungwa ni Mkulupusyo kupitila mwa lilayika lilyawonecele pewukutu lila.

³⁶ Ŵalongolele ŵandu kutyocela ku Iguputo. Ŵatendaga yindu yakusimonjesya ni yimanyisyo ku Iguputo, pa Nyasa Jecejewu,* kwisa soni mcipululu kwa yaka 40.

³⁷ Mose pejo ŵasalile Aisalaeli kuti, ‘Mlungu tacimtumicisya mundu jwine kutyocela kwa acalongo acimjenu kuti taŵe jwakulocesya* mpela yiŵatite pakunduma une.’

³⁸ Mosejo ni julajula jwele juŵaliji nawo pa msongano wa Aisalaeli mcipululu. Ŵajimi pasikati pa acinangolo ŵetu ni lilayika lilyaŵecete najo Kwitumbi lya Sinayi. Ŵelewo ni uŵapocele maloŵe gakupeleka umi kuti atupe uwe.

³⁹ “Nambo acinangolo ŵetu ŵakanile kumpikanila jwalakwe, ni ŵamtutile kumbali ligongo mitima jawo jasacile kuwujila ku Iguputo.

⁴⁰ Myoyo ŵatesile Aloni* kuti, ‘Mtupanganyicisye milungu kuti jitulongoleleje, ligongo ngatukumanyilila cacimwonecele Mose jula juŵatukopwesye ku Iguputo.’

⁴¹ Nipo ŵapanganyisye cindu mpela mwanace jwa ng'ombe. Ŵacipelecele mbopesi, ni kusangalalila masengo giŵapanganyisye acimsyene ni makono gawo.

⁴² Nipo Mlungu ŵatumbile ni ŵapele kuti asilambileje ndondwa mpela yayitite pakulembedwa m'buku ja ŵakulocesya; ‘Jemanja Aisalaeli, mkupela kuti mwapelekaga kwangune nyama syele simwawulagaga ni kusipeleka mpela mbopesi kwa yaka 40 yila mcipululu.

⁴³ Mwatwicilaga tenti ja Moloki ni ndondwa ja mlungu jwenu Lefani, milungu jawo jele jiŵajipanganyisye kuti mjilambileje. Tinjimtyosya ni kuja kumleka kwakutalika, kupunda ku Babiloni.’

⁴⁴ “Acinangolo ŵetu ŵakwete tenti ja umboni wakuti Mlungu ŵaliji nawo pampepe mcipululu mula. Ŵapanganyisye mpela yiŵatite Mlungu pakumsalila Mose, mwakulandana ni cindu ciŵaciweni Mose.

⁴⁵ Tentijo jele acinangolo ŵetu ŵajipocele kutyocela kwa acinangolo ŵawo ŵala, ŵayice najo pampepe ni Yoswa katema kiŵasumwile cilambo ca ngosyo sya ŵandu ŵele Mlungu ŵatopwele jemanjajo ali mkwisa. Jatemi pasikati pawo mpaka ndaŵi ja Daudi.*

⁴⁶ Mlungu ŵamsalalile mtima Daudijo, mpaka jwaŵendile Mlungu kuti amkunde kuti ataŵe Nyumba jakutama Mlungu jwa Yakobo.

⁴⁷ Nambo Solomoni ni ŵele ŵiŵamtaŵile Mlungu nyumbajo.

⁴⁸ “Atamose yaliji myoyo, nambo Mlungu jwakupunda yosope jwangatama m'nyumba jakutaŵidwa ni makono, mpela mwakuŵecetela jwakulocesya kuti,

⁴⁹ ‘Kwinani ni citengu cangu ca Ucimwene, akuti Ambuje, cilambo capasi ni pakuŵika sajo syangu. Ana tacindaŵila nyumba jamtuli? Nambi malo gakupumulila une gali kwapi?

⁵⁰ Ana yosopeyi nganimbanganya ni makono gangu?’ ”

⁵¹ Sitefano ŵatite soni kuti, “Jemanja ŵandu ŵangakomboleka, mitima jenu jili jakusakala, mapikanilo genu galesile kupikana. Ndaŵi syosope mpela muŵatendelaga acinangolo ŵenu, nombe jemanja mkukana kupikanila Msimu Ŵaswela.

⁵² Ana pana jwakulocesya jwamkanamsawusya acinangolo ŵenu? Jemanjajo ŵawuleje ŵandu ŵiŵaliji mkusala yakwisa kwakwe kwa jwakulungama jula. Sambano jemanja mwampelece kwa amagongo ŵakwe ni kumwulaga.

⁵³ Jemanja soni ni ŵimwapocele malamusi ga Mlungu kupitila mwa malayika,* nambope nganimgasunga kose.”

Akumponya maganga Sitefano

⁵⁴ Acakulungwa ŵanganya ŵala piŵapikene maloŵe ga Sitefano gala ŵatumbile mnope ni ŵatesile sinya.

⁵⁵ Nambo Sitefano, jwakulongoleledwa ni Msimu Ŵaswela ŵalolite kwinani ni ŵaluweni lumbili lwa Mlungu ni Yesu,* ali ajimi ku mkono wamlyo wa Mlungu.

⁵⁶ Ni ŵatite, “Alole! Ngukuwona kwinani kwewuguce, nipo Mwanace jwa Mundu* ali ajimi ku mkono wamlyo wa Mlungu.”

⁵⁷ Nambo jemanjajo ŵagumisile mnope, ni ŵasiŵile m'mapikanilo mwawo, ni ŵamgungumucile wosope pamo.

⁵⁸ Ŵamkopocesye kusa kwa msinda, ni ŵamponyisye maganga. Mboni syalesile yakuwala yawo m'makono mwa mcanda jwine lina lyakwe Saulo.*

⁵⁹ Ŵandu ŵala piŵaliji kumponya maganga Sitefano, jwalakwe jwatandite kupopela acitiji, “Ambuje Yesu, pocelani msimu wangu.”

⁶⁰ Nipo ŵatindiŵele pasi ni ŵagumisile kuti, “Ambuje, kasimwasunjila ŵandu ŵeleŵa magambo ga wele ulemwawu.” Piŵaŵecete maloŵe gelega, ŵawile.