Masengo 6 - Chiyawo Bible

Ŵakamucisya msano ni ŵaŵili

¹ Masiku gelego ciŵalanjilo ca ŵakulijiganya* cakulilagakulilaga. Ayuda ŵakuŵeceta Cigiliki* ŵadandawulaga Ayuda ŵakuŵeceta Cihebeli kuti acakongwe ŵawo ŵamasije nganasamalidwaga cenene pagaŵanya yikamucisyo ya canasa ya lisiku ni lisiku.

² Ŵandumetume 12 ŵala ŵaŵilasile likuga lya ŵakulijiganya ŵala, ni ŵasalile kuti, “Ngaŵa cenene kuti uwe tulece kulalicila maloŵe ga Mlungu ni kulondesyaga yakulya.

³ Acimjangu, msagule ŵandu msano ni ŵaŵili pasikati penu ŵali ni mbili jambone, ŵele Msimu Ŵaswela ukwalongolela nipo soni ŵalunda kuti twape masengo gelega.

⁴ Nambo uwe citulipelece ku masengo gakupopela ni kulalicila maloŵe ga Mlungu.”

⁵ Yiŵaŵecete ŵandumetumeyo, ŵandu wosope ŵasangalele nayo, mwakuti ŵasagwile Sitefano, mundu jwagumbalilwe ni cikulupi kwika soni Msimu Ŵaswela. Ŵasagwile soni Filipi, Polokolo, Nikanolo, Timoni, Palimenasi ni Nikolasi juŵajiticisye Ciyuda jwakutyocela kwa Antiokeya.

⁶ Sitefano ni acimjakwe ŵajimice pameso pa ŵandumetume, nipo ŵapopelele ni kwasajika magasa jemanjajo.

⁷ Maloŵe ga Mlungu galiji mkwendelecela posepose, nipo ŵandu ŵakulijiganya ŵaliji mkutupilatupilape ku Yelusalemu. Ŵakutaga mbopesi ŵajinji ŵajiticisye cikulupico.

Ayuda ŵamkamwile Sitefano

⁸ Sitefano ŵaliji mundu jwele Mlungu ŵampele upile ni macili gamajinji, mwakuti ŵatendaga yimanyisyo yakusimonjesya pasikati pa ŵandu.

⁹ Nambo kwayice ŵandu ŵane ŵa ku Kilene ni Alekisandiliya, ŵa ku nyumba jamapopelo jakolanjidwa “Nyumba ja mapopelo ja alukosyo.” Jemanjajo ni Ayuda ŵa ku Kilene, ni ŵane ŵa ku Silisiya ni ŵa ku Asiya* ŵatandite kukangana ni Sitefano.

¹⁰ Nambo ŵalepele kumsimanila ligongo pakuti jwalakwe jwaŵecetaga ni lunda lyakutyocela kwa Msimu Ŵaswela.

¹¹ Nipo ŵanyenjelele ŵandu ŵane kuti aŵeceteje kuti, “Twampikene jweleju ali mkunyosya Mose* mwacipongwe ni Mlungu soni.”

¹² Ligongo lya maloŵe gelego, ŵandu, acakulungwa ŵawo ni aciŵalimu ŵa malamusi* ŵatumbile mnope. Ni ŵamkamwile Sitefano, ŵamjigele ni kwawula najo kwa acakulungwa ŵa nganya.

¹³ Ni ŵajimice mboni sya unami sila ni syatite, “Aju munduju jwatamilaga kuŵeceta maloŵe gakunyosya Nyumba ja AMBUJE nipo soni malamusi ga Mose.

¹⁴ Uwe twampikene ali mkuŵeceta kuti Yesu* jwa ku Nasaleti jula tacijonanga Nyumba ja AMBUJE nipo soni galawusya misyungu josope jiŵatupele Mose.”

¹⁵ Nipo wosope ŵele ŵaliji panganyapo, ŵamlolecesye Sitefanojo ni ŵajiweni ngope ja Sitefano jili mpela ngope ja lilayika.