Masengo 4 - Chiyawo Bible

Petulo ni Yohane ku Nganya ja Ayuda

¹ Petulo* ni Yohane* piŵaliji mkuŵecetana ni ŵandu ŵala, ŵayice ŵakutaga mbopesi ni jwamkulungwa jwa asilikali jwa ku Nyumba ja AMBUJE ni Asaduki.*

² Jemanjaji ŵatumbile ligongo lyakuti ŵandumetume ŵaŵiliwo ŵajiganyaga ŵandu ni kulalicila kuti, “Yesu* ŵajimwice ku ŵawe, ni kuti ŵaŵawile tacijimuka soni.”

³ Papopo ŵakamwile ni ŵaŵisile m'nyumba ja akayidi, kwembecela kuti kuce ligongo kwaliji kuli kuswele.

⁴ Nambo ŵandu ŵajinji ŵakulupilile piŵapikene maloŵe ga ŵandumetumewo, nipo ciŵalanjilo ca acalume cakwesile kwika mpela 5,000.

⁵ Kundaŵi kwakwe ŵakulamulila ŵa Ayuda, acakulungwa ŵawo nipo soni aciŵalimu ŵa malamusi,* wosope ŵasongene pampepe ku Yelusalemu.

⁶ Kwaliji soni Anasi, jwamkulungwa jwa ŵakutaga mbopesi* pamo ni Kayafa, Yohane ni Alekisanda ni wosope ŵa mwiŵasa lya jwamkulungwa jwa ŵakutaga mbopesi jula.

⁷ Ŵajimice ŵandumetumewo pasikati pawo ni ŵawusisye kuti, “Ana yimwayitesile yila, mwayitesile m'macili kapena mu lina lya ŵani?”

⁸ Nipo Petulo pakulongoleledwa ni Msimu Ŵaswela ŵatite kuti, “Jemanja acimlongola ni acakulungwa ŵa ŵandu ŵimli apa:

⁹ naga akutuwusya lelo jino ya masengo gambone gatendekwe kwa mundu jwaliji jwamlemale jula, kuti aposile uli?

¹⁰ Amanyilile sambano jemanja wosope, ni Aisalaeli wosope, kuti mundu aju lelo jino akwima alicenene pameso penu ligongo lya macili ga lina lya Yesu Klistu* jwa ku Nasaleti. Jwele jemanja mwamkomele pa msalaba, nambo Mlungu ŵamjimwisye ku ŵawe.

¹¹ Ya Yesujo, maloŵe ga Mlungu gakuti, ‘Liganga lyele jemanja amisili ŵakutaŵa nyumba mwalikanile, lilyolyo ligalawice kuŵa liganga lyakusosekwa mnope.’

¹² Nipo pangali jwine jwalijose jwele mpaka akombole kulupusya ŵandu, pakuti pa cilambo cosope capasi pangali lina line lyele Mlungu liŵapelece kwa ŵandu kuti tukulupuce nalyo.”

¹³ Ŵapanganya ŵala ŵasimonjile piŵaweni kulimba mtima kwa Petulo ni Yohane nipo soni pakumanyilila kuti ŵaliji ŵandu wamba ni ŵangalijiganya mnope. Pele ni piŵamanyilile kuti ŵaliji mkutama pamo ni Yesu.

¹⁴ Nambo soni pakumwona mundu jwaposile ali ajimi pakuŵandikana ni Petulo ni Yohane, ŵasoŵile maloŵe gakuti ŵasisye nago.

¹⁵ Myoyo piŵalamwile kuti akopoce mu nganya ja magambo mula, ŵanganyawo ŵatandite kuŵecetana.

¹⁶ Acitiji, “Ana twatende cici ŵanduŵa? Pakuti ŵandu wosope ŵakutama mu Yelusalemu akumanyilila kuti jemanjaji atesile cimanyisyo cakuwoneka, nipo uwe ngaŵamkombola kose kana.

¹⁷ Nambo pakogopa kuti mbili jeleji jikajenela posepose, kwende twakalamusye kuti akasaŵeceta soni kwa jwalijose mu lina lya Yesu.”

¹⁸ Kaneko ŵaŵilasile, ni kwalamula kuti akasaŵeceta kose pane kwiganya mu lina lya Yesu.

¹⁹ Nambo Petulo ni Yohane ŵajanjile kuti, “Lamulani mwacimsyene pameso pa Mlungu, naga kuli kwambone kumpikanila jemanja kupunda Mlungu.

²⁰ Uwe ngatuleka kuŵeceta yele yitwayiweni ni kuyipikana.”

²¹ Ŵanganyawo piŵamasile kwajogoya ŵandumetumewo ni ŵagopwele. Nganasimana kose litala lyakwapela cilango, ligongo ŵandu wosope ŵaliji kumlumba Mlungu ligongo lya yosope yiyatendekweyo.

²² Pakuŵa mundu jwaposile mwakusimonjesyajo jwaliji jwa yaka kupunda 40 yakupagwa.

Ŵakulupililawo ŵapopesile pampepe

²³ Petulo ni Yohane ali ŵagopwele, ŵapite kwa acimjawo ni ŵamanyisye yosope yele acakulungwa ŵa ŵakutaga mbopesi ni acakulungwa ŵane ŵa Ayuda yiŵasalile.

²⁴ Piŵapikene yeleyi, wosope ŵapopesile pampepe mwakwesya maloŵe gawo kwa Mlungu acitiji, “AMBUJE Ŵamaciligosope, ŵapanganyisye kwinani ni cilambo capasi, nyasa ni yindu yili mwelemo.

²⁵ Mwa Msimu Ŵaswela ŵaŵecetekasisye nangolo jwetu Daudi,* jwakutumicila jwawo pijwatite kuti, ‘Ligongo cici ŵandu ŵa mitundu jine* akusaka kutenda ciswamba, ana uli ŵandu ŵeleŵa akuganisya yangali mate?

²⁶ Ayimwene ŵa cilambo capasi ŵaliŵicile cile, acakulungwa ŵa Boma ŵasongene pampepe kulimbana ni Ambuje, ni jwakusagulidwa jwakwe jula.’

²⁷ Mwambone, Helodi* ni Pontiyo Pilato ŵasongene mu msinda muno pampepe ni ŵandu ŵa mitundu jine ni ŵandu ŵa ku Isalaeli, kulimbana ni jwakutumicila jwawo jwamswela Yesu, jwele juŵasagulidwe.

²⁸ Myoyo ŵatesile yosope yele yiŵaŵicile cile kala mwamacili gawo ni lunda lwawo kuti yitendekwe.

²⁹ Ni sambano Ambuje, alole akutujogoya, atukunde uwe ŵakutumicila ŵawo kuti tuŵecete maloŵe gawo mwakulimba mtima,

³⁰ atambasukule mkono wawo ni kuposya ŵandu nipo kuti yimanyisyo ni yakusimonjesya yitendekwe mu lina lya jwakutumicila jwawo jwakusagulidwa, Yesu.”

³¹ Piŵamasile kupopela, nyumba jele jiŵasongenejo jatenganyice, wosope ŵapocele macili ga Msimu Ŵaswela ni ŵatandite kuŵeceta maloŵe ga Mlungu mwakulimba mtima.

Ŵakulupilila akugaŵana yindu yawo

³² Likuga lya ŵakulupilila ŵala ŵaliji ni mtima umo, nganapagwa mundu juŵatiga kuti, yingwete yosope yili yanguyangupe, nambo jwalijose ŵaliji mkupeleka yakwe yosope kuti yiŵe ya wosope.

³³ Ŵandumetume ŵaliji mkutenda umboni mwamacili mnope kuti Ambuje Yesu ŵajimwice ku ŵawe, nombe Mlungu ŵaliji mkwapa upile wosope mwakwanila.

³⁴ Paliji pangali mundu juŵaliji mkusoŵa kandu pasikati pawo, ligongo wosope ŵele ŵiŵakwete migunda pane nyumba ŵaliji mkuyisumisya, mbiya syakwesyo ŵapelekaga kwa ŵandumetume.

³⁵ Nipo mbiyasyo ŵaliji mkwagaŵila ŵandu malingana ni kusoŵa kwawo.

³⁶ Paliji pana mundu jwine lina lyakwe Yosefe, jwa lukosyo lwa Lefi, jwakutyocela ku Saipulasi, jwele ŵandumetume ŵala ŵampele lina lyakuti Banaba, gopolela kwakwe “Jwakulimbisya mtima.”

³⁷ Nombe najo ŵasumisye mgunda wakwe, ni ŵajigele mbiya syakwe kuja kusipeleka kwa ŵandumetume.