Masengo 3 - Chiyawo Bible

Petulo ŵamposisye mundu jwamlemale ngongolo

¹ Lisiku line Petulo* ni Yohane* ŵapite ku Nyumba ja AMBUJE ndaŵi ja kupopela ja 3 koloko ligulo.

² Ŵandu ŵane ŵamnyakwile mundu jwine jwamlemale ngongolo cipagwile. Masiku gosope ŵamŵikaga pa mlango wa Nyumba ja AMBUJE, ŵakuŵilanjidwa, “Mlango wakusalala,” kuti jwelejo aŵendeje ŵandu wakwinjila m'Nyumbamo.

³ Piŵaweni Petulo ni Yohane alimkwinjila m'Nyumbamo, ŵaŵendile kuti amgaŵile mbiya.

⁴ Jemanjajo ŵamlolecesye mundujo, nipo Petulo ŵatite, “Mtulole uwe.”

⁵ Nipo jwalakwe ŵalolecesye, alimkwembecela kuti tapocele cindu kutyocela kwa jemanjajo.

⁶ Nambo Petulo ŵatite, “Jwangali mbiya, nambo tinampe aco cingwete, mu lina lya Yesu Klistu* jwa ku Nasaleti, mjende.”

⁷ Ni ŵamkamwile mkono wakwe wamlyo ni ŵamjimice. Pelepo ngongolo syakwe ni yisukusuku yakwe nombe nayo yalimbangene.

⁸ Ŵasumbile, ni ŵajimi, ni ŵatandite kwenda nipo ŵajinjile m'Nyumba ja AMBUJE jila pampepe ni jemanjajo, ŵajendaga kwine alimkusumbasumba, nambo alimkulumba Mlungu.

⁹ Ŵandu wosope ŵam'weni alimkwenda kwine alimkulumba Mlungu.

¹⁰ Ŵam'manyilile mundu jula kuti ni jujojo juŵatamaga pa mlango wakusalala wa Nyumba ja AMBUJE nikuŵendaga, nipo ŵasimonjile mnope ni kulapa ligongo lya yele yiyamtendecele mundujo.

Maloŵe ga Petulo m'Nyumba ja AMBUJE

¹¹ Mundu jula ŵamkanilile Petulo ni Yohane, nipo ŵandu wosope ŵasimonjile, ni ŵawutucile kwipenu lyakuŵilanjidwa, “Lipenu lya Solomoni.”

¹² Piŵayiweni yeleyi Petulo ŵaŵecete nawo ŵanduwo kuti, “Jemanja Aisalaeli, ana mkusimonga yeleyi? Ana uli mkutulolecesya uwe mpela kuti tukombwele kumjendesya munduju ni macili getu? Kapena mkupela kuti ligongo uwe tuli ŵakumlumba Mlungu mnope?

¹³ Mlungu juŵamlambilaga acinangolo ŵetu, Abulahamu,* Isaki ni Yakobo,* ŵapelece lumbili kwa Yesu, jwakutumicila jwakwe. Nambo jemanja mwampelece kwa amagongo ŵakwe ni kumkana pameso pa Pilato,* atamose Pilato ŵalamwile kuti amgopole Yesu.

¹⁴ Yesu ŵaliji ŵaswela mtima ni ŵakulupicika, nambo jemanja mwamkanile, nipo m'malo mwakwe mwaŵendile Pilato kuti amgopolele jwaciswamba.

¹⁵ Jemanja mwamwuleje jwakupeleka umi, nambotu Mlungu ŵamjimwisye ku ŵawe. Uwe ni mboni sya yeleyi.

¹⁶ Mundu aju jukumwona ni kum'manyilila, akulupilile lina lya Yesu, ni lina lilyolyo limlimbisye ngongolo syakwe. Cikulupi cele cakwete mwa Yesu, ni cicoco cimposisye kusyene, mpelaga mwele wosopemwe mukumwonelamu.

¹⁷ “Nipo sambano acimjangu, ngumanyilila kuti jemanja ni acakulungwa ŵenu mwatesile yeleyi ligongo lya ungamanyilila.

¹⁸ Nambo Mlungu ŵaŵecetele cilepe mwa ŵakulocesya wosope kuti Klistu jwakwe akwenela kuti apate yisawusyo, ni yatendekwe m'momo.

¹⁹ Mpitikuce mitima sambano ni kuwujila kwa Mlungu kuti amtyocesye ulemwa* wenu. Myoyo Ambuje tacimpa ndaŵi jakupumula,

²⁰ nipo tacimtumicisya Yesu jula jwele juŵamsagulile cile kuti aŵe Mkulupusyo jwenu.

²¹ Jwalakwe akwenela kutama kwinani mpaka ndaŵi jakulinganya yosope mwa sambano mpela muŵaŵecetele Mlungu kutandila kalakala kupitila mwa ŵakulocesya ŵakwe ŵaswela mtima.

²² Paja Mose* ŵatite, ‘Ambuje Mlungu tacijimusya jwine pasikati pa acalongo acimjenu kuti aŵe jwakulocesya* jwenu mpela une. Timyipikanile yosope yele yitacimsalilaga.

²³ Jwalijose jutaciŵa jwangampikanila jwakulocesyajo, amtyosye mu ŵandu wa Mlungu ni kumjonanga.’

²⁴ Soni ŵakulocesya wosope ŵele ŵaŵaŵecete kutandila Samuele, mpaka wosope ŵele ŵiŵayice panyuma pakwe nombe nawo, ŵalalicilaga ya masiku agano.

²⁵ Jemanja mli ŵanace ŵa jwakulocesya mcilanga ciŵaŵisile Mlungu kwa acinangolo ŵenu. Paja ŵasalile Abulahamu kuti, ‘Mwa cisukulu cenu tinjapa upile ŵandu wosope ŵa pa cilambo capasi.’

²⁶ Mlungu piŵasagwile jwakutumicila jwakwe, ŵatandite kaje kumtumisya kwa jemanja kuti ampe upile pakumwusya jwalijose jwa jemanja ku yangalumbana yakwe.”