Masengo 27 - Chiyawo Bible

Paulo akwawula ku Loma

¹ Piyamanyice kuti tujawule ku Itale pa combo, ŵampelece Paulo pampepe ni akayidi ŵane kwa jwamkulungwa jwa asilikali lina lyakwe Juliyasi, jwa likuga lya asilikali lya bwanamkubwa*

² Twakwesile combo cakutyocela kwa Adilamitiyo cele caliji cilepe kutyoka, kwawula ku yiko ya Asiya,* nipo twatyosile. Alisitaliko, m'Masedoniya jwa mu msinda wa Tesalonika twaliji najo.

³ Kundaŵi kwakwe twayice ku Sidoni, nipo Juliyasi ŵamsalalile mtima Paulo, ni ŵamkundile kwawula kwa acimjakwe kuti akampe yakusoŵa yakwe.

⁴ Kutyocela kweleko twapitile ca kumpoto kwa cilumba ca Saipulasi ligongo mbungo japugaga mwakutulonda uwe.

⁵ Twajombwece Nyasa ja ku Silisiya ni Pamfiliya ni kuja kwika ku Mila mu msinda wa ku Lisiya.

⁶ Kweleko jwamkulungwa jwa asilikali ŵala ŵacisimene combo cakutyocela ku Alekisandiliya cicajawulaga ku Itale, nipo ŵatukwesisye mwelemo.

⁷ Twajesile mwapanandipanandi kwa masiku gamajinji mwakulaga mnope, pambesi pakwe twayice ku msinda wa Kinido. Pakuŵa mbungo jasawisye mnope twalepele kupitilisya ulendo mwagolosya, myoyo twapitile kum'mwela kwa cilumba ca Kilete, tulitupelete kacilumba ka Salimoni.

⁸ Twajesile mwakulaga mnope soni mumbali mwa cilumbaco ni twayice kumalo gane gakolanjidwa kuti Yiko, kwele yombo yasunjidwaga cenene, pakuŵandikana ni msinda wa Laseya.

⁹ Twajonasile ndaŵi jejinji pelepo, atamose soni ndaŵi jakulijima yakulya jamasile. Ndaŵi jelejo ulendo wa pamesi waliji wakogoya. Apo Paulo ŵatetele kuti:

¹⁰ “Acalongo acimjangu, une nguyiwona kuti ulendo wetu tiwuŵe wakogoya pakutyocela apano; kwakuti katundu ni combo tiyijonasice soni tajasice, apo ngayiŵape yelepeyo nambo soni umi wetu.”

¹¹ Nambo jwamkulungwa jwa asilikali jula ŵapikanile yiŵaŵecete jwa kulamulila combo ni msyene comboco, ngaŵa maloŵe ga Paulo gala.

¹² Ni pakuŵa ciko cakwe nganiciŵa cambone kocesya ndaŵi jakusisima, ŵandu ŵajinji ŵasacile kutyoka ni kuganisya kuti takayice ku Finikisi ni kuja kutama kweleko ndaŵi jakusisima. Finikisi caliji ciko ca ku Kilete, cacilolegene ni kum'mwela cakungapilo lyuŵa nambo soni kumpoto cakungapilo lyuŵa.

Mbungo jamacili pa nyasa

¹³ Mbungo ja mwela jatandite kupuga panandipanandi, ni ŵandu ŵala pelepo ŵaganisisye alisimene lipesa liŵalisakaga, ni ŵacuwile nangula ni ŵawutandite ulendo wawo, nipo ŵajendaga mungulugulu cilumba ca Kilete.

¹⁴ Nambo mkanijipite ndaŵi jekulungwa, mbungo jamacili mnope japujile jakolanjidwa Yulakulo kutyocela ku kumkuli kwa cilumba.

¹⁵ Mbungojo japutile comboco, ni pakuti twalepele kongolela comboco mwakulolegana ni mbungojo, twagambile kuleka ni kujigalwa ni mbungojo.

¹⁶ Twayice pa kacilumba lina lyakwe Kauda, mbali jangapuga mbungo. Kweleko mwakulaga twakombwele kaŵika m'malo mwakwe liboti kakuwutidwa ni comboco.

¹⁷ Kaneko ŵakwesisye liboti pa combo, nipo ŵacitaŵile comboco ni ngonji. Pakogopa kuti tacijagunda msanga wa ciko ca ku Libiya, papopo ŵatulwisye matanga ni ŵakundile kujigalwa ni mbungojo.

¹⁸ Pakuŵa twaliji mkulaga najo mbungo jila mnope, kundaŵi kwakwe ŵatandite kwasa katundu m'mesi.

¹⁹ Nipo pa lisiku lyatatu ŵaponyisye m'nyasa yindu yakamulicisya masengo mcombomo ni makono gawo.

²⁰ Nganituliwona lyuŵa kapena ndondwa kwa masiku gejinji, nipo mbungojo japitilile kupuga mnope ni macili mpaka jwalijose jwajasile mtima kuti mpaka kulupuka.

²¹ Ŵandu ŵala ŵatemi ndaŵi jekulungwa ngalya kandu, Paulo ŵajimi sikati jawo ni ŵatite kuti, “Acimjangu, mkapikanile yimbecete une yila, kuti tukatyoka ku Kilete; ngamkaniyijonasika yindu ni kwasa kwamti myiyi.

²² Nambo sambano ngumŵenda kuti mlimbe mtima, pakuti pangali atamose jumo jwa jemanja tacijasika, nambo combopeci ticijonasika.

²³ Pakuti cilo cipiteci lilayika lya Mlungu lyayicilile une jundili jwakwe jwa Mlungu, soni jungusinamlumba.

²⁴ Lilayikalyo lyatite kuti, ‘Mkatenda woga, Paulo. Mkwenela kwima pameso pa Mwenye jwa ku Loma.* Mlungu, mwakusalala mtima kwakwe kwenumwe, akundile kuti acimjenu wosope ŵali ni m'mwejo mcombo aŵe ni umi.’

²⁵ Ni jemanja, limbani mtima, pakuti une ngukulupilila Mlungu kuti yosope tiyitendekwe mpela mwaŵecetele.

²⁶ Nambo tucijakocesya pa cilumba cine.”

²⁷ Lyaliji lisiku lyakwana likumi ni masiku mcece pakati cilo, pelepo mbungo jili mkutututape m'Nyasa ja Mediteleniyani, ŵakamula masengo mcombomo ŵaganisyaga kuti akuŵandicila ku mkuli.

²⁸ Pelepo ŵapimile kusokoka kwakwe nipo ŵasimene kuti pali mamita makumi mcece. Ŵajesile panandi ni ŵapimile soni nipo ŵasimene kuti pali mamita makumi gatatu.

²⁹ Pakogopa kuti comboco cicijagunda maganga m'nyasamo, ŵaponyisye anangula mcece kunyuma kwa comboco ni kupopelaga kuti kuce.

³⁰ Ŵakamula masengo mcombomo ŵasakaga kutila; ni ŵatulucisye liboti lila m'mesi, ni ŵatesile mpela akusaka kutulucisya anangula ŵane m'nyasa kusogolo kwa comboco.

³¹ Nambo Paulo ŵamsalile jwamkulungwa jwa asilikali ni asilikali kuti, “Naga ŵandu aŵa ngakutama mcombo munomuno, ni pangali cikulupi camti timkulupuce.”

³² Myoyo asilikali ŵala ŵakatile ngonji sya liboti lila ni ŵasilesile gwila m'mesi.

³³ Kumasikusiku Paulo ŵaŵendile ŵandu wosope ŵala kuti alye yakulya. Ni ŵasalile kuti, “Jemanja mtemi masiku likumi kwisa mcece sambano, nipo ndaŵi josopeji nganimlyaga kandu kalikose.

³⁴ Ngumŵenda sambano mlye kandu kuti mŵe ni umi. Pangali mundu jutacijasa atamose luwumbo lumo lwa m'mitwe jenu.”

³⁵ Piŵamasile kuŵeceta yeleyi, Paulo ŵajigele mkate, ni ŵamtogolele Mlungu pameso pa wosopewo, ni ŵawugaŵenye ni ŵatandite kulya.

³⁶ Pelepo ŵanduwo ŵalimbile mitima nipo jwalijose jwa jemanjajo ŵalile yakulya.

³⁷ Mcombomo twaliji ŵandu ŵakwana 276.

³⁸ Piŵamasile kulya ni kwikuta wosope ŵala, ŵatandite kutulusya tiligu ni kwasila m'nyasa kuti combo cijalukangane.

Konasika kwa combo

³⁹ Pikwacele ŵakwendesya comboco nganakumanyilila kose ku cikoco, nambo ŵaciweni kuti cikoco cana msanga, ni ŵaganisisye kuti naga yikomboleka akakocesye combo cawoco pelepo.

⁴⁰ Myoyo ŵakatile ngonji sya anangula ŵala ni kwaleka kuti amilwe m'nyasamo, nipo ndaŵi jijojo ŵagopwele ngonji syakutaŵila ngafi syakongolela ni kwesya tanga ja kusogolo kuti mbungo jitute comboco, nipo ŵalungeme ku mkuli.

⁴¹ Nambo combo cila cagundile msanga ni cakanilile; mbali jine ja kusogolo kwa comboco jakanilile nipo calepele kwenda, nipo mbali jine ja kunyuma jakasice ni matumbela ga macili mnope.

⁴² Asilikali ŵala ŵaganisisye kuti ŵawulaje acikayidi wosope ŵala, kogopa kuti ŵane mwa akayidiwo tacikombola ng'ambila mpaka kuja ku mkuli ni kulupuka ni kutila.

⁴³ Nambo jwamkulungwa jwa asilikali ŵala ŵasakaga kumkulupusya Paulo, mwakuti ŵalekasisye kutenda yeleyo. M'malo mwakwe ŵalamwile kuti ŵakombola ng'ambila aŵe ŵandanda kuliponya m'mesi ni kung'ambila kuti ajawule ku mkuli;

⁴⁴ Ŵakusigalawo ŵakuyisye, pakamula matabwa kapena yine ya combo cekasiceco. Mwelemu ni mutwayicile cenene wosope ku mkuli.