Masengo 25 - Chiyawo Bible

Paulo akuŵenda kuti magambo gakwe alamule Mwenye jwa ku Loma

¹ Gali gapite masiku gatatu Fesito* ali ayice ku dela jawo, ŵapite ku Yelusalemu kutyocela ku Kaisaleya.

² Kweleko acakulungwa ŵa ŵakutaga mbopesi nipo soni ŵakulongolela ŵa Ayuda, ŵamsalile ya magambo ga Paulo. Ŵamŵendile Fesito kuti

³ ŵasalalile mtima kuti ajawule najo Paulo ku Yelusalemu, pakuŵa ŵaliŵicile cilepe kuti atende ciswamba ca kumwulaga jwalakwejo mwitala.

⁴ Fesito ŵajanjile kuti, “Paulo akusunjidwa m'nyumba ja akayidi ku Kaisaleya, nipo une tinjawule kweleko pangakaŵa.

⁵ Myoyo acakulungwa ŵenu alongane pampepe ni une kwawula ku Kaisaleya kuti akapelece umboni wa munduju naga ŵalemwisye.”

⁶ Fesito ŵatemi nawo kwa masiku msano kwisa gatatu kapena likumi, kaneko ŵapite ku Kaisaleya. Kundaŵi kwakwe ŵatemi pa citengu cakwe cakulamulila Magambo ni ŵamŵilasile Paulo kuti ayice najo.

⁷ Piŵayice Paulo, Ayuda ŵiŵayice kutyocela ku Yelusalemu ŵala ŵamsyungulile ni ŵatandite kusala yindu yakogoya yejinji yiŵatesile Paulo yakuti acimsyene ŵalepele kupeleka umboni ŵakwe.

⁸ Nambo Paulo ŵalicenjele msyene acitiji, “Une pangali cindesile cakasa Malamusi ga Ayuda kapena Nyumba ja AMBUJE atamose Mwenye jwa ku Loma.”*

⁹ Nambo Fesito ŵasakaga kuti Ayuda amnonyele, ni ligongo lyakwe ŵamwusisye Paulo kuti, “Ana mkusaka kwawula ku Yelusalemu kuti tukaŵecete magambo genu pameso pangu?”

¹⁰ Paulo ŵatite, “Une njimi pameso pa nganya ja Mwenye jwa ku Loma, kweleko ni kutaŵecete magambo gangu. Ayudaŵa une nganinalemwecesya kandu kalikose, mpela mwakumanyilila ŵalakwe cenene.

¹¹ Naga une ndemwisye, kapena kuti ndesile kandu kakwenela kuti une mbulajidwe, une ngangukana kuwulajidwako. Nambo naga yakumbecetelayi nganiyiŵa yakuwona, ni pangali mundu jutakombole kumbeleka kwa jemanjajo. Apo nguŵenda kuti Mwenye jwa ku Loma akalamule magambo gangu.”

¹² Nipo Fesito ŵaŵecetene ni ŵandu ŵa nganya jakwe nipo ŵamjanjile kuti, “Cambone mŵendile kuti akamlamule Mwenye jwa ku Loma, nipo kwa Mwenyeko timjawule.”

Paulo pameso pa Agilipa ni Belenise

¹³ Gali gapite masiku, Mwenye Agilipa pampepe ni Belenise ŵayice ku Kaisaleya kukwakomasya ni kwapocela Fesito.

¹⁴ Piŵatemi kweleko kwa masiku gapanandi, Fesito ŵamsalile mwenyejo magambo ga Paulo. Kwana mundu jwine akuno juŵamlesile Felikisi* m'nyumba ja akayidi.

¹⁵ Pinapite ku Yelusalemu, acakulungwa ŵa ŵakutaga mbopesi ni acakulungwa ŵane ŵa Ayuda ŵasalile ya jwelejo ni ŵambendile kuti mbecete magambo gakwe nipo lamule kuti ŵalemwisye.

¹⁶ Nambo nasalile jemanjajo kuti nganiwuŵa msyungu wa Aloma* kumpeleka mundu jwakwimbidwa magambo mkanawonegane ni ŵakumjimba magambogo kuti alicenjele jika yakumŵecetelayo.

¹⁷ Piŵayice akuno nganinjasa kose ndaŵi, kundaŵi kwakwe natemi pa citengu cakulamulila magambo, nipo nasalile kuti ayice najo mundujo.

¹⁸ Ŵakumjimba magambo ŵala piŵajimi, ŵalepele kupeleka umboni usyesyene ŵele une naliji mkuwuganicisya.

¹⁹ Ŵagambaga kusisyana najo pa ngani ja dini jawo, nipo soni ya mundu jwine juŵawile lina lyakwe Yesu, nambo Paulo akuti aliciŵela umi.

²⁰ Lunda lwamalile lwakuti asimane umboni usyesyene pa ngani jeleji. Myoyo nam'wusisye Paulo kuti naga akusaka kwawula ku Yelusalemu kuti magambo gakwe gakaŵecetedwe kweleko.

²¹ Nambo Paulo ŵaŵendile kuti magambo gakwe tigalamulidwe ni Mwenye jwa ku Loma jwalakwe ali asunjidwe m'nyumba ja akayidi. “Ni nalamwile kuti asunjidweje mpaka ndili namtumisye kwa Mwenye jwa ku Loma.”

²² Agilipa ŵatite kwa Fesito, “None jwakwe ngusaka nampikane namsyene mundu jweleju.” Fesito ŵatite, “Timumpikanile malaŵi.”

²³ Kundaŵi kwakwe Agilipa ni Belenise ŵayice ni ucimbicimbi wawukulungwa. Ŵajinjile mu nganya ja magambo pamo ni acakulungwa ŵa asilikali ni acakulungwa ŵa mu msindamo. Kaneko Fesito ŵalamwile kuti Paulo ajawule najo.

²⁴ Pelepo Fesito ŵatite kuti, “Mwenye Agilipa, ni wosope ŵali apano ni uwe, akumwona aju munduju, jwele Ayuda wosope ŵali apano ni ku Yelusalemu ŵambendile une kuti jweleju ngakwenela kuŵa ni umi soni.

²⁵ Nambo une nganisimana kandu kiŵatesile kakwenela kuti awulajidwe. Nambo pakuti msyeneju jwaŵendile kuti magambo gakwe gakaŵecetedwe ni Mwenye jwa ku Loma, nipo une naganisisye kuti namtumisye.

²⁶ Nambo nganingola kandu kasyesyene kakuti namlembele mwenyejo ya jweleju. Myoyo sambano yice najo pameso pa ŵalakwe Mwenye Agilipa, kuti mumbucisye ya magambo gakwe kuti none ngole yakulemba.

²⁷ Kwa une nguganisya kuti ngaŵa cenene kumtumisya mkayidi pangasala yakulemwa ya magambo gakwe.”