Masengo 24 - Chiyawo Bible

Paulo akwimbidwa magambo ni Ayuda

¹ Galigapite masiku msano jwamkulungwa jwa ŵakutaga mbopesi* lina lyakwe Ananiya ŵajawile ku Kaisaleya ni acakulungwa ŵane pamo ni jwakwimila ŵandu pa magambo lina lyakwe Tetulo. Ŵawonecele pameso pa bwanamkubwa* Felikisi* ni kusala yiŵatesile Paulo.

² Kaneko Paulo ŵamŵilasile kuti ajinjile, nipo Tetulo ŵatandite kuŵeceta magambo acitiji: Ŵakucimbicikwa, ulamusi wawo wambone utupele mtendele kwa ndaŵi jajilewu josopeji, nipo yindu yejinji yiŵele yilimkulinganyikwa kwa umbone wa cilambo cetu.

³ Yosopeyi tukusayipocela kulikose nipo soni ndaŵi josope, soni tukusitwatogolela ŵalakwe.

⁴ Ngangusaka konanga ndaŵi jawo, nambo nguŵenda atutendele canasa ni kupikanila ngani jetu mwakata.

⁵ Uwe tumsimene aju munduju, kuti ali jwakusokonesya mnope. Aŵele ali mkutandisya njojo sikati ja Ayuda pa cilambo cosope capasi nipo jweleju ni jwakulongolela jwa likuga line lyalikuŵilanjidwa Anasaleti.

^6-7 Piŵasakaga kusakasya Nyumba ja AMBUJE, uwe twamkamwile.

⁸ “Naga akumwusya munduju, ŵalakwe tamanyilile jika yosope yele yitukumjimbila magambo jweleju.”

⁹ Ayuda ŵajiticisye ya kumjimba magambo nipo ŵatite kuti yosopeyi yaliji yakuwona.

Paulo akulicenjela pameso pa Felikisi

¹⁰ Bwanamkubwa jula ŵamtesile Paulo kuti aŵecete, nipo Paulo ŵatite: “Ngumanyilila kuti ŵalakwe aŵele ŵakulamulila cilamboci kwa yaka yejinji, ni une ndili jwakusangalala kulicenjela pameso pa ŵalakwe.

¹¹ Wawo asyene jika tasimane umboni wakwe mwangasawusya, nganigamala masiku likumi ni gaŵili cijawulile une ku Yelusalemu kupopela.

¹² Ayuda nganasimana une ndili mkukangana ni jwalijose m'Nyumba ja AMBUJE, kapena kusimana une ndili mkutandisya njojo pasikati pa ŵandu m'nyumba sya mapopelo* kapena palipose mu msindamo.

¹³ Kwali kapena tapelece umboni kwa ŵalakwe wa magambo gakunjimba sambano unega.

¹⁴ Nambo acipeci; ngwiticisya pameso pawo, kuti une ngusinamlambila Mlungu jwa acinangolo ŵetu pakukuya Litala* lyele lyakulitenda jemanjaji kuti lya unami. Nambo soni ngukulupilila cilicose cilembedwe m'Malamusi ga Mose* ni mabuku ga ŵakulocesya.

¹⁵ Ngwete cikulupi cicoco mwa Mlungu cele cakwete ŵanduŵa, cakuti ŵandu wosope, ŵaswela mtima ni ŵakusakala, tacijimuka ku ŵawe.

¹⁶ Myoyo ngutenda mwamacili gangu masiku gosope kuŵa ni nganisyo syambone pameso pa Mlungu ni ŵandu.

¹⁷ “Pinaliji kwine kutyoka ku Yelusalemu kwa yaka yapanandi, napite kweleko kujigala mituka ja ŵandu ŵakulaga nipo soni kukutaga mbopesi.

¹⁸ Jaliji ndaŵi jinatendaga yeleyi, ni pele jemanjaji ŵasimene une m'Nyumba ja AMBUJE ndili masile kutenda msyungu wakuliswejesya. Paliji pangali likuga lya ŵandu kapena njojo.

¹⁹ Nambo Ayuda ŵane ŵakutyocela kwa Asiya* ŵaliji papopo. Jemanjajo akajenele kuŵa apano pameso pawo kuti asale naga akwete cilicose cakwamba une.

²⁰ Kapena ŵakunde aŵa ŵanduŵa ŵali apanoŵa kuti asale naga ŵasimene ni cakulemwa ndaŵi jinaliji mu nganya jawo jajikulungwa ja magambo.

²¹ Cakulemwa cangu mpaka ciŵe aci cakuti, nagumisile pinaliji pa nganya jawo kuti, ‘Akunjimba magambo une lelo ligongo ngukulupilila kuti ŵandu ŵawe tacijimuka ku ŵawe.’ ”

²² Nambo Felikisi, ŵiŵasalilidwe cenene ya Litalali,* ŵawugele magambogo acitiji, “Tinjilamula magambo genu pitayice Lisiasi, jwamkulungwa jwa asilikali.”

²³ Kaneko ŵamlamwile jwamkulungwa jwa asilikali kuti amlondeleje Paulo, nambo ampeje soni ufulu ni kwakunda acimjakwe kumpa yakusoŵa yakwe.

Paulo pameso pa Felikisi ni Dulusila

²⁴ Gali gapite masiku panandi Felikisi ŵayice ni Dulusila* ŵamkwakwe, juŵaliji Myuda. Ŵamŵilasile Paulo ni kumpikanila piŵaŵecetaga ya kulupilila Klistu* Yesu.

²⁵ Nambo Paulo piŵaŵecetaga ya umbone mtima, kulilekasya ni kwika kwa Lisiku Lyakulamula. Felikisi ŵatesile woga ni ŵatite, “Jawulagani sambano. Tinamŵilanje soni naga mbate lipesa.”

²⁶ Nambo soni ŵaganisyaga kuti mwine Paulo tampe mbiya ni kwa ligongo lyeleli ŵaliji mkumŵilanga Paulo kaŵilikaŵili ni kuŵecetanaga najo.

²⁷ Piyamasile yaka yiŵili, Polokiyo Fesito* ŵajinjile m'malo ga Felikisi kuŵa bwanamkubwa. Felikisi ŵasosaga kuti Ayuda amnonyeleje, myoyo ŵamlesile Paulo jula m'nyumba ja akayidi.