Masengo 23 - Chiyawo Bible

¹ Paulo ŵalolecesye ŵandu ŵanganya ŵala ni ŵatite, “Aisalaeli acimjangu, une umi wangu wosope mpaka lelo jino mbele ndili mkutama mu umi wambone pameso pa Mlungu.”

² Jwamkulungwa jwa ŵakutaga mbopesi* lina lyakwe Ananiya, ŵalamwile ŵiŵajimi pakuŵandikana ni Paulo kuti ampute kukamwa.

³ Nipo Paulo ŵatite kwa jwelejo kuti, “Kusyene Mlungu tacimputa m'mwejo, m'mwe ŵa unami. M'mwejo mtemi pelepo kuti mulamule une malingana ni Malamusi ga Mose,* nambo mkasile Malamusi pakwalamula jemanjaji kuti ambute une.”

⁴ Ŵandu ŵaliji pakuŵandikana ni Paulo ŵatite, “Ana uli mkunyosya jwamkulungwa jwakutaga mbopesi jwa Mlungu.”

⁵ Paulo ŵajanjile kuti, “Aisalaeli acimjangu, nganimanyililaga kuti ali jwamkulungwa jwakutaga mbopesi. Pakuti yilembedwe kuti, ‘Kasimumŵecetela yakusakala jwakulamula jwa ŵandu ŵenu.’ ”

⁶ Paulo piŵamanyilile kuti ŵandu ŵane ŵa jemanjajo ŵaliji Asaduki* soni ŵane Afalisi,* ŵagumisile mu nganyamo acitiji, “Acimjangu Aisalaeli, une ndili Mfalisi, mwanace jwa Mfalisi. Une ndili pa magambo amuno ligongo lya kulupilila kuti ŵandu tacijimuka ku ŵawe.”

⁷ Piŵamasile kuŵeceta yeleyi, Afalisi ni Asaduki ŵatandite kangana nipo nganyajo jagaŵanikene.

⁸ (Paja Asaduki akuti ŵandu ngasajimuka ku ŵawe nipo soni kwangali malayika* kapena misimu. Nambo Afalisi akukulupilila yosope yitatu.)

⁹ Kugumila kula kwakusile mnope, nipo aciŵalimu ŵa Malamusi* ŵa mbali ja Afalisi, ŵajimi ni kusisya mnope acitiji, “Uwe ngatukusimana cilicose cakulemwa ni aju munduju. Mwine komboleka kuti msimu kapena lilayika lyaŵecete najo munduju.”

¹⁰ Ŵandu ŵala ŵasisyanile mnope mpaka jwamkulungwa jwa asilikali ŵala ŵajogopaga kuti mwine Paulo tamwulasye. Myoyo ŵalamwile asilikali ŵakwe kuti ajawule kuŵaliji ŵanduko kuti akamtyosye Paulo ni kuja najo m'malo ga asilikaliwo.

¹¹ Cele ciloco Ambuje ŵajimi pambali pa Paulo ni ŵatite, “Kasimjogopa. Mpela mumundendele umboni akuno ku Yelusalemu, soni mkandendele umboni ku Loma.”

Ayuda akumtendela ciswamba Paulo

¹² Kundaŵi kwakwe Ayuda ŵane ŵawonegene pampepe ni kupangana. Ŵatesile cilanga* cakuti ngasalya kapena kumwa kalikose mpaka ali amwuleje Paulo.

¹³ Ŵandu ŵapangene ya ciswamba celeci ŵaliji ŵakupunda 40.

¹⁴ Kaneko ŵapite kwa acakulungwa ŵa ŵakutaga mbopesi ni acakulungwa ŵane acitiji, “Uwe tutesile cilanga pampepe kuti ngatulya kandu mpaka tulitumwuleje Paulo.

¹⁵ Sambano jemanja ni ŵanganya mtumisye utenga kwa jwamkulungwa jwa asilikali ŵa ku Loma kuti ayice najo Paulo kwa jemanja, kutenda mpela kuti mkusaka kusimana umboni usyesyene kwa jwelejo. Nambo uwe tutuŵe cilepe kumwulaga jwalakwejo mkanayice akuno.”

¹⁶ Nambo mwanace jwamlume jwamlumbugwawo Paulo ŵapikene ya malindigo, ŵapite ku malo gakutama asilikali ni ŵamsalile Paulo.

¹⁷ Pelepo Paulo ŵamŵilasile jumo jwa acakulungwa ŵane ŵa asilikali ŵala ni ŵatite kuti, “Mjawule najo aju mcandaju kwa jwamkulungwa jwenu, akwete maloŵe kuti akamsalile jwelejo.”

¹⁸ Jwamkulungwa jwa asilikali jula ŵamjigele mcanda jula kwawula najo kwa jwamkulungwa jwakwe nipo ŵatite, “Mkayidi jula Paulo ŵambilasile une ni kuŵenda kuti mbice najo mcandaju kwa ŵalakwe, ligongo akwete maloŵe kuti ŵasalile ŵalakwe.”

¹⁹ Jwamkulungwa jula ŵamkamwile mcanda jula pa mkono ni ŵapite najo pambali ni kumwusya kuti, “Ana mkusaka kusalila une cici?”

²⁰ Mcanda jula ŵatite, “Ayuda ŵane alangene kuti ŵaŵende ŵalakwe malaŵi kuti ampelece Paulo ku nganya, kuti akatendeje mpela akusaka kusimana umboni usyesyene ŵa jwalakwejo.

²¹ Nambo conde akapikanila, ligongo ali ŵandu ŵakupunda 40 ŵitakamjuŵilile kumjembecela Paulojo. Nipo atesile cilanga kuti ngalya kapena kumwa mpaka ali amwuleje Paulo. Aliŵicile cilepe sambano kutenda yeleyi, apano agamba kwembecela ŵalakwe kuti ajiticisye.”

²² Jwamkulungwa jwa asilikali jula ŵatite, “Kasimumsalila jwalijose kuti mumanyisye une yeleyi.” Nipo ŵamtesile kuti ajawuleje mcandajo.

Paulo akumtumisya kwa bwanamkubwa Felikisi

²³ Jwamkulungwa jwa asilikali jula ŵaŵilasile acakulungwa ŵane ŵaŵili ni ŵatite, “Mwasalile asilikali 200 kuti aliŵicile cile kutandila ndaŵi ja 9 koloko cilo cino, kwawula ku Kaisaleya pampepe ni asilikali 70 ŵakwela mahaci nipo soni 200 ŵakujigala mawupanga.

²⁴ Mumlinganyicisye Paulo haci kuti akwelepo, nipo mkayice najo cenene kwa bwanamkubwa* Felikisi.”*

²⁵ Jwamkulungwa jwa asilikali jula jwalembile cikalata acitiji:

²⁶ “Une Klaudiyo Lisiasi, ngupeleka moni kwa Ŵakucimbicikwa bwanamkubwa Felikisi.

²⁷ Ayuda ŵamkamwile mundujo ni ŵasakaga kumwulaga. Napikene kuti jwalakweju ali mlukosyo jwa Ciloma, napite ni asilikali ŵangu nipo namkulupwisye.

²⁸ Nasakaga kumanyilila ciŵamŵecetelaga, myoyo napite najo ku nganya ja magambo jawo.

²⁹ Nasimene kuti nganatenda kandu kakwenela kuti awulajidwe kapena kutaŵidwa, nambo ŵamjimbaga magambo gakwayana ni malamusi gawo.

³⁰ Nipo panapikene kuti akumtendela malindi, mwacitemape naganisisye yakumtumisya jwalakwejo kwenumwe. Soni nasalile ŵakumjimba magambo ŵakwe kuti amlamule jwalakwejo pameso penu.”

³¹ Pelepo asilikali ŵala ŵatesile mpela muŵalamulile. Ŵamjigele Paulo kwawula najo kwa Antipatili cilopeco.

³² Kundaŵi kwakwe asilikali ŵakwenda pasi ŵala ŵawujile ku malo gawo ni ŵalesile ŵakwela mahaci ni kupelenganya ulendo wawo ni Paulo.

³³ Piŵayice jemanjajo ku Kaisaleya, ŵapelece cikalataco kwa bwanamkubwa, soni ŵamlesile Paulo m'makono mwakwe.

³⁴ Bwanamkubwa jula piŵaŵalasile cikalataco, ŵamwusisye Paulo mbali jiŵatyocele. Piŵapikene kuti akutyocela ku Silisiya,

³⁵ ŵatite, “Tinjipikanila ngani jenu pitayicepo ŵakumjimba magambo.” Nipo ŵamlamwile Paulo kuti alondelejedwe ku nyumba ja Mwenye Helodi.