Masengo 22 - Chiyawo Bible

¹ “Acalongo acimjangu Ayuda, mumbikanile une pangulicenjela pameso penu.”

² Piŵampikene jwalakwejo ali mkuŵeceta Cihebeli, ŵapundile kutama jii mnope; nipo Paulo ŵapitilisye kuŵeceta acitiji:

³ “Une ndili Myuda, napagwile ku Talisasi ku Silisiya, nambo ndeledwe amuno mu Yelusalemu, Gamaliele* ŵaliji mwalimu jwangu jwele juŵanjiganyisye cenene kusunga Malamusi ga acinangolo ŵetu. Nipo naliji jwakulimbicila mnope ya Mlungu, mpela mwele mumkutendela wosope ŵamli apano lelo.

⁴ Naliji mkwalagasya ŵandu mpaka kwawulaga ŵele ŵiŵaliji mkukuya Litala* lya Yesu.* Nakamulaga acalume ni acakongwe ni kwataŵisya.

⁵ Jwamkulungwa jwa ŵakutaga mbopesi* ni wosope ŵanganya ja Ayuda mpaka atendele umboni kuti nguŵeceta yakuwona. Napocele yikalata kutyocela kwa jemanjajo yakwalembela acanasi ŵa Ciyuda ku Damasiko. Myoyo najawile kweleko kukwakamula ŵele ŵanduwo ni kwisa nawo akuno ku Yelusalemu ali ŵataŵidwe ni unyolo kuti apocele cilango.”

Paulo akwasalila yakupitikuka mtima kwakwe

⁶ “Pinaliji pa ulendowo nipo ndili mkuŵandicila ku Damasiko ndaŵi jili mpela 12 koloko musi, mwacisisimucisya lilanguka lyekulungwa lyakuŵala mnope lyakutyocela kwinani lyasyungulile une.

⁷ Nagwile pasi nipo napikene maloŵe gakuti, ‘Saulo,* Saulo! Ligongo cici mkusawusya une?’

⁸ Une nawusisye kuti, ‘Ana ŵani wawo, Ambuje?’ Nipo ŵatite, ‘Une Yesu jwa ku Nasaleti, jumkusawusya.’

⁹ Acimjangu ŵinaliji nawo ŵaliweni lilangukalyo, nambo nganapikana kose maloŵe ga ŵele ŵiŵaŵecetaga ni une.

¹⁰ Nawusisye kuti, ‘Ana ndende cici, Ambuje?’ Nipo Ambuje ŵatite kwa une kuti, ‘Mjimuce nipo mjawule mkati mwa Damasiko, kweleko takamsalile yosope yapanganyisye Mlungu kuti myitende.’

¹¹ Natatele meso ligongo lya lilanguka lyakuŵala mnopelyo, myoyo acimjangu ŵala ŵangamwile pa mkono ni kumbecesya ku Damasiko.

¹² “Kweleko kwapali mundu jwine lina lyakwe Ananiya. Ŵaliji ŵakogopa Mlungu nipo kusamala Malamusi getu nipo Ayuda wosope ŵakweleko ŵampaga ulemu.

¹³ Jwalakwejo ŵayice ni ŵajimi pakuŵandikana ni une, ni ŵatite, ‘Mlongo mjangu Saulo, mtande kulola soni.’ Ndaŵi jijojo natandite soni kulola nipo nam'weni jwalakwejo.

¹⁴ Nipo ŵatite, ‘Mlungu jwa acinangolo ŵetu amsagwile m'mwejo kuti m'manyilile yele yakusaka, ni kumwona Jwakulungama jula nipo mpikane maloŵe gapakamwa pakwe.

¹⁵ Pakuti ticimtendelaga umboni kwa ŵandu wosope, yele yimyiweni ni kupikana.

¹⁶ Nambi sambano mkwembecela cici? Mjimuce ni m'batisidwe, nipo ulemwa* wenu tiwucityoka pakumlumbaga Jwalakwejo.’ ”

Paulo akutumidwa kukulalicila kwa ŵandu ŵa mitundu jine

¹⁷ “Nawujile ku Yelusalemu, nipo pinaliji mkupopela m'Nyumba ja AMBUJE, naweni Ambuje mesomkulola,

¹⁸ ali mkuti kwangune, ‘Mjanguye mtyoce mu Yelusalemu muno mwacitema, ligongo ŵandu ŵakunokunoŵa ngajiticisya kose umboni wenu wamkusala ya Une.’

¹⁹ Nipo natite, ‘Ambuje, acimsyeneŵa akumanyilila cenene kuti najawulaga ku nyumba syakupopelela ni kuja kwataŵa ni kwaputa wosope ŵele ŵiŵakulupilile wawo.

²⁰ Nipo piŵawulajidwaga Sitefano mboni jenu, une naliji papopo. Najiticisye nipo une nasungaga yakuwala ya ŵandu ŵakuwulagawo.’

²¹ Ambuje ŵatite, ‘Tyokani, pakuti tinamtume kwakutalika kwa ŵandu ŵa mitundu jine.’ ”*

²² Ŵanduwo ŵampikanile Paulo cenene nambo piŵaŵecete maloŵe gakumalisyago, ŵandu ŵatandite kugumila kwakulimbika maloŵe gawo acitiji, “Mundu jwamti myiyi awulajidwe, ngakwenela kutama ni umi!”

²³ Ŵaliji mkugumilape ni kupukunyaga yakuwala yawo soni kuponyaga luwundu mwinani.

²⁴ Pelepo jwamkulungwa jwa asilikali ŵa Ciloma jula ŵalamwile kuti Paulo ajinjile najo m'nyumba ja asilikalijo. Ŵasalile kuti amkwapule Paulo kuti asale ligongo lyakwe cici Ayuda ŵaliji kumgumila jwalakwe camti myoyo.

²⁵ Nambo piŵamtaŵile kuti ampute jwalakwejo, Paulo ŵatite kwa jwamkulungwa jwa asilikali juŵajimi pelepo kuti, “Ana malamusi genu gakunda kumkwapula mlukosyo jwa Ciloma mkanajimbidwe magambo?”

²⁶ Jwamkulungwa jwa asilikali jula piŵapikene yeleyi, ŵapite kwa jwamkulungwa jwakwe ni ŵamwusisye kuti, “Ana yimkutendayi ni yapi? Mundu julatu ali mlukosyo jwa Ciloma.”

²⁷ Ni pelepo jwamkulungwa jwa asilikalijo ŵapite kwa Paulo ni ŵamwusisye kuti, “Musalile, ana m'mweji mli mlukosyo jwa Ciloma?” Jwalakwe ŵatite, “Elo.”

²⁸ Sambano jwamkulungwa jula ŵatite, “Une natesile yakusuma ni mbiya ulukosyo wanguwu.” Paulo ŵatite, “Nambo une ndili mlukosyo pakupagwa.”

²⁹ Papopo ŵandu ŵiŵatiga amwusye yiwusyo Paulo ŵawujile panyuma, nombe najo jwamkulungwa jula ŵatesile woga piŵamanyilile kuti ŵamtaŵile mundu jwali mlukosyo jwa Ciloma.

Paulo akwima ku nganya

³⁰ Jwamkulungwa jwa asilikali jula ŵasakaga kusimana cisyesyene ciŵamjimbilaga Ayuda magambo Paulo. Myoyo kundaŵi kwakwe ŵamgopwele Paulo unyolo ni ŵalamwile kuti acakulungwa ŵa ŵakutaga mbopesi ni wosope ŵanganya ja magambo kuti asimane. Kaneko ŵamjigele Paulo ni kumjimika pameso pa wosopewo.