Masengo 20 - Chiyawo Bible

Paulo akwawula ku Masedoniya ni ku Akaya

¹ Pisyamasile njojo sila, Paulo ŵaŵilasile ŵakulijiganya* ŵala, ni ŵasalile maloŵe gakwalimbisya mtima. Kaneko ŵalanjile, nipo ŵatyosile kwawula ku Masedoniya.

² Ŵajendele mbali sya kweleko ni kwalimbisyaga ŵandu ni mautenga gamajinji. Kaneko ŵayice ku Akaya,*

³ kweleko ŵatemi miesi jitatu. Piŵaliji mkuliŵicila cile yakwawula ku Siliya ni combo, ŵapikene kuti Ayuda akupangana ya kumtenda malindi. Ni ŵaganisisye yakuwujila panyuma pakupitila ku Masedoniya.

⁴ Sopate mwanace jwa Pilo jwa ku Beleya, ŵalongene najo, nombe nawo Alisitaliko ni Sekundo jwa ku Tesalonika; Gayo jwa ku Delibe; Tukiko ni Tulofimo ŵambali ja ku Asiya,* ni Timoteo.

⁵ Jemanjajo ŵalongolele ni ŵapite kutulindilila uwe pa Tulowasi.

⁶ Nambo twajesile mcombo kutyocela ku Filipi* panyuma pa cindimba ca mikate jangali cakusasaŵilisya,* nipo pigamasile masiku msano twasimene nawo ku Tulowasi. Kweleko twatemi masiku msano ni gaŵili.

Ulendo ŵambesi wa Paulo ku Tulowasi

⁷ Pa lisiku lya lyakupumula lya Ayuda ligulo, twasongene pampepe kuti tulye cakulya ca ligulo. Paulo ŵaŵecete kwa ŵandu nipo ŵaliji mkuŵecetape mpaka pakati cilo, ligongo ŵasakaga kutyoka kundaŵi kwakwe.

⁸ Nyali syejinji syaliji mkolela mcipinda ca mwinani mwele mutwasongene.

⁹ Mcanda jwine lina lyakwe Yutiko jwatemi pewindo, nipo Paulo piŵaliji mkupitilisya kuŵeceta, Yutiko ŵaliji mkugwesela, mpaka ŵagonile lugono, ni ŵagwile pasi kutyocela pa cipinda catatu ca penani. Nipo ŵamlokwete ali awile.

¹⁰ Nambo Paulo ŵatulwice kuja pasi ni ŵaliponyisye pa Yutiko ni ŵamkumbatile acitiji, “Mkadandawula, jwaciŵela umi.”

¹¹ Kaneko Paulo ŵakwesile soni, ni ŵagaŵenye mkate ni ŵalile ni uwe. Ni ŵaŵecete nawo mpaka kwacele, nipo Paulo ŵatyosile.

¹² Ŵandu ŵala ŵamjigele mcanda jula ali jwa umi, nipo wosope ŵasangalele mnope.

Kutyocela ku Tulowasi kuja ku Mileto

¹³ Uwe twalongolele ni twakwesile combo kwawula ku Aso, kweleko twajawile kukumjigala Paulo mcombo. Jwalakwe ŵatesile yeleyi, ligongo ŵasacile kwenda pa mkuli.

¹⁴ Piŵatusimene uwe pa Aso, ŵakwesile nawo comboco nipo twayice ku Miteleni.

¹⁵ Kutyocela kweleko twajesile mcombo, nipo kundaŵi kwakwe twayice ku Kiyo. Kundaŵi kwakwe soni twayice ku Samo, nipo lisiku linelyo twayice ku Mileto.

¹⁶ Paulo ŵasacile kuti aŵambale kwa Aefeso, ligongo ŵajogopaga kwasa ndaŵi pa cilumba ca Asiya. Ŵaliji mkwanguya kuti naga kuli kwakomboleka akayice ku Yelusalemu pa lisiku lya Pentekosite.*

Paulo akwalanga acakulungwa ŵa mpingo ŵa ku Aefeso

¹⁷ Kutyocela ku Mileto, Paulo ŵatumisye utenga kwa Aefeso, wakwaŵilanga acakulungwa ŵa mpingo* kuti awonegane najo.

¹⁸ Piŵayice ŵanduwo, ŵasalile kuti, “Jemanja mkumanyilila mundamile namwe ndaŵi josopeji, kutandila lisiku lyandanda linayice ku Asiya.”

¹⁹ Namtumicilaga Ambuje mwakulinandiya mnope ni misosi jejinji, nipo nakamwile masengo gangu mpela jwakutumicila jwa Ambuje mu ndaŵi jakusawusya jijangwilile une ligongo lya malindi ga Ayuda.

²⁰ Mkumanyilila kuti pangali kinamsisile kalikose kakuti kamkamucisye jemanja. Namlalicile ni kumjiganya pakulanguka pa luŵala nipo soni m'nyumba syenu.

²¹ Nasalicisye kusyesyene Ayuda ni ŵandu ŵa mitundu jine,* kuti apitikucile kwa Mlungu ni kumkulupilila Ambuje Yesu* Klistu.*

²² Nipo sambano, mlole ngwawula ku Yelusalemu, ligongo ngumpikanila Msimu Ŵaswela, atamose kuti ngangumanyilila yele yikangwile kweleko.

²³ Nambo cingumanyilila ni cakuti Msimu Ŵaswela ŵangalamwisye kuti, ukayidi ni yipwetesi yikunjembecela une mu msinda uliwose.

²⁴ Nambo une, ngangusamala ya umi wangu kose, nambo bola malisye masengo gangu ni utumiki wele ŵambele Ambuje Yesu, ni wakuti lalicile pakulanguka Ngani Syambone* sya umbone mtima wa Mlungu.

²⁵ “Sambano ngumanyilila kuti jemanja ŵanamjendele ni kumlacililaga ya Ucimwene ŵa Mlungu ngasimumbona soni uneji.

²⁶ Myoyo ngumsalila jemanja lelo jino, kuti naga jwalijose mwa jemanja akwasika, yele ni yawo, une ngayingwaya kose.

²⁷ Pajatu nganinamsisila kandu kalikose, nambo namlalicile yosope yakusaka Mlungu.

²⁸ Mlisamaleje mwacimsyene, nipo soni msamale mpingo wosope wele Msimu Ŵaswela ŵampele kuti mwuloleleje. Msamale mpingo wa Mlungu uŵawusumile ni miasi ja mwanagwawo.

²⁹ Ngumanyilila kuti patindyocepo, masogo* ga ukali tigaciyika sikati jenu, nipo tigacijonanga mpingo ni kubalalisya ngondolo.

³⁰ Ndaŵi jiciyika jakuti ŵandu ŵane mwa jemanja taciŵecetaga ya unami kuti ŵandu ŵakulupilila ŵakuye ŵakuŵeceta ya unamiwo.

³¹ Myoyo mkalamuce, mkumbucileje kuti pa yaka yitatu cilo ni musi nganindeka kwiganya jwalijose jwa jemanja ni misosi.

³² “Myoyo sambano ngumŵika m'magasa mwa Mlungu ni m'maloŵe gakwe gakulosya umbone mtima. Maloŵego gali ga macili gakulimbisya mpingo, ni kupeleka upile wosope wele Mlungu uŵasunjile ŵandu ŵakwe.

³³ Nganingumbila silifa,* kapena golidi* kapena soni nguwo sya jwalijose.

³⁴ Paja jemanja mkumanyilila nakamwile masengo ni makono gangu kuti mbate yele yinayisosaga une pampepe ni acimjangu.

³⁵ Pa yosope yinamlosisye, kuti pakamula masengo mwakulimbicila myiyi, tukwenela kwakamucisya ŵandu ŵakwete macili panandi, mkumbucile maloŵe agala ga Ambuje Yesu gakuti, ‘Kupeleka kukusampa upile mundu kulekangana ni kupocela.’ ”

³⁶ Paulo piŵamasile kuŵeceta yeleyi, ŵatindiŵele nawo ni kupopela pampepe.

³⁷ Wosope ŵene ŵamkumbatile Paulojo ali mkulila ni kwayanaga najo ngomo syawo pakulangana najo.

³⁸ Cakwete canasa mnope ligongo, liŵatite kuti ngasamwona soni jwalakwejo. Myoyo ŵampecesye ku combo.