Masengo 2 - Chiyawo Bible

Kuyika kwa Msimu Ŵaswela

¹ Pilyakwanile lisiku lya kusangalalila cindimba ca Pentekosite,* ŵakulupilila wosope ŵaliji pampepe m'nyumba jimo.

² Mwacisisimucisya kwapikanice lisegwe kutyocela kwinani mpela mkokomo wa mbungo jamacili ni jagumbele m'nyumba mosope mwele muŵaliji mkutama mula.

³ Nipo ŵagaweni malulumi mpela malamba ga moto gali mgaŵanyika, ni gagwilaga pa jwalijose jwa jemanjajo.

⁴ Wosope ŵala ŵapocele Msimu Ŵaswela ni ŵatandite kuŵeceta yiŵeceto ya cilendo,* mpela yiŵatite Msimuwo pakwaŵecetekasya.

⁵ Mu Yelusalemu mula mwapali Ayuda ŵane, ŵandu ŵiŵaliji kumlumba Mlungu ŵakutyocela myilambo yakulekanganalekangana pa cilambo cosope capasi.

⁶ Piŵapikene cimkokomo cila, likuga lya ŵandu ŵajinji lyasongene ni lyatojime ligongo jwalijose jwapikene ŵakulupililawo ali mkuŵeceta ciŵeceto cakwe.

⁷ Ŵasimonjile kwakumasya lunda acitiji, “Ana ŵandu wosope ŵakuŵecetaŵa ngaŵa ŵakutyocela ku Galileya?

⁸ Nambi uli jwalijose jwetuwe akwapikana ali mkuŵeceta ciŵeceto ciŵapagwile naco?

⁹ Uwe tukutyocela ku yilambo ya Apati, Amedi ni Elamu, ŵane akutama ku Mesopotamiya, ku Yudeya ni ku Kapadokiya, ku Pontasi ni ku Asiya,*

¹⁰ ku Filijiya ni Pamfiliya, ku Iguputo, ni mbali sya ku Libiya kwakuŵandikana ni ku Kilene. Ŵane ni acalendo ŵakutyocela ku Loma.

¹¹ Ayuda ni ŵandu ŵane ŵiŵakuyaga ya dini ja Ciyuda, nipo ŵane ŵa uwe tukutyocela ku Kilete ni kwa Alebiya, nambope wosopewe tukwapikana alimkuŵeceta myiŵeceto yetu kwamba ya masengo gamakulungwa gatesile Mlungu.”

¹² Wosope ŵasimonjile ni lwamalile lunda, ni ŵawusyene kuti, “Ana yeleyi ni yicici?”

¹³ Nambo ŵane ŵagambaga kuseka acitiji, “Akolelwe finyo jwasambano.”

Utenga wa Petulo

¹⁴ Kaneko Petulo* ŵajimi pampepe ni ŵandumetume likumi ni jumo, nipo Petulo ŵaŵecete mwakwesya maloŵe kuti: “Jemanja Ayuda, ni wosope ŵamkutama ku Yelusalemu kuno, mpikane ni kupikanicisya maloŵe gangu.

¹⁵ Ŵandu aŵa nganakolelwa mpela yimkuti pakuganisya, pakuti ndaŵi jili 9 koloko ja kundaŵi.

¹⁶ Nambo yeleyi ni yiŵaŵecete jwakulocesya* Yoweli kuti,

¹⁷ ‘Mlungu akuti, tiyiciŵa pa masiku gakumalisya, Tinjiŵika Msimu wangu mwa ŵandu wosope. Nipo ŵanace ŵenu ŵacalume ni ŵacakongwe tacilocesya. Acacanda ŵenu taciyiwonaga yindu m'mesomkulola, nipo ngalamba syenu tisicisagamila sagamisi.

¹⁸ Elo, atamose pa ŵakutumicila ŵangu ŵacalume ni ŵacakongwe, tinjiŵika pa jemanjajo Msimu wangu masiku gelego, nipo tacilocesya.

¹⁹ Tinjitenda yakusimonjesya kwinani mnope, nipo yimanyisyo ya pacilambo capasi cino nayi: miasi, moto ni lipundugulu lya lyosi.

²⁰ Lyuŵa tiliciŵa bii mpela cipi, nombe mwesi tiwuciŵa psyu mpela miasi, mkaniliyice lisiku lyalikulungwa lya Ambuje Mlungu lya lumbili.

²¹ Nipo pa ndaŵi jelejo tiyiciŵa kuti jwalijose jutacilumba lina lya Ambuje mwakuŵenda, tacikulupuka.’

²² “Jemanja Aisalaeli, mpikanile maloŵe aga. Yesu* jwa ku Nasaleti ŵaliji mundu jwele juŵamtumile Mlungu kwa jemanja. Mlungu ŵamsimicisye yeleyi ya macili, yakusimonjesya ni yimanyisyo yiŵapanganyisye mwa Yesu pasikati penu, mpela yimkuti pakumanyilila.

²³ Sambano Yesujo ŵapelecedwe mwakusosa ni kumanyilila kwakwe Mlungu, m'makono genu. Ni jemanja mwamwuleje pakumpeleka kwa ŵandu ŵakusakala kuti amkomele pa msalaba.

²⁴ Nambo Mlungu ŵamgopwele ku yipwetesi ya ciwa, ni ŵamjimwisye ku ŵawe, ligongo yaliji yangakomboleka kuti apundidwe ni ciwa.

²⁵ Paja Daudi* ŵaŵecete ya jwelejo kuti, ‘Nawonaga Ambuje ndaŵi syosope pasogolo pangu, pakuti akutama ku mkono wangu wamlyo, kuti ngatenganyika kose.

²⁶ Ni ligongo lyakwe mtima wangu wasangalele, nipo naŵecetaga mwakusangalala, mnopemnope soni cilu cangu cicitama mcembeceyo.

²⁷ Pakuŵa wawo ngasandeka une ku malo ga ŵandu ŵawe,* kapena kumleka jwamswela jwawo kuti awole.

²⁸ Ŵamanyisye une matala ga umi, nipo tacimba lukondwa mnope pitacimbonecelapo.’

²⁹ “Acalongo acimjangu, ngupakombola kuŵeceta mwakumsimicisya jemanja ya nangolo jwetu Daudi. Jwalakwe ŵawile ni ŵasicidwe mwilembe, ni lilembe lyakwe lyaciŵelape mpaka lelo jino.

³⁰ Paja jwaliji jwakulocesya nipo jwamanyililaga yele yiŵaŵecete Mlungu mu cilanga* cakwe, mwakulumbila kuti jumo mwa yisukulu yakwe tacijigala ucimwene wakwe.

³¹ Ni kuti Daudi ŵala ŵayiweni cile, yakuti Klistu* tacijimuka ku ŵawe, ni pelepo ŵaŵecete maloŵe gakuti, ‘Klistu nganaŵicidwa ku malo ga ŵandu ŵawe soni cilu cakwe nganiciwola kose.’

³² “Yesu jujojo, Mlungu juŵamjimwisye ku ŵawe, nipo uwe wosope tuli mboni sya yeleyi.

³³ Jwalakwe ŵamkwesisye ni kuja kutama ku mkono wamlyo wa Mlungu, ni ŵapocele Msimu Ŵaswela mwacilanga ca Atati, ni ŵatumisye yele yakuyiwonayi ni kupikanayi.

³⁴ Paja Daudi nganakwela kwawula kwinani nambo jwele msyene ŵatite, ‘Ambuje ŵasalile Ambuje ŵangu kuti tamani ku mkono wangu wamlyo,

³⁵ mpaka sandusye amagongo ŵenu kuŵa cakuliŵatila sajo syenu.’

³⁶ “Sambano Aisalaeli wosope amanyilile mnope kuti, Yesu jwele jemanja mwamkomele pa msalaba, Mlungu ŵamtesile kuti aŵe Ambuje ni Mkulupusyo.”

³⁷ Piŵapikene yeleyi ŵandu ŵala yasawisye mu mtima, nipo ŵamwusisye Petulo ni ŵandumetume ŵane ŵala kuti, “Jemanja, ana sambano uwe tutende cici?”

³⁸ Petulo ŵasalile kuti, “Mpitikuce mitima, nipo jwalijose jwa jemanja abatisidwe mu lina lya Yesu Klistu. Pelepo yakulemwa yenu tacimkululucila nipo timcipocela mtuka wa Msimu Ŵaswela.

³⁹ Pakuti Mlungu ŵatesile cilanga ni jemanja pampepe ni ŵanace ŵenu kwika soni ŵandu wosope ŵakutama kwakutalika, wosope ŵele Ambuje Mlungu jwetu tacaŵilanga.”

⁴⁰ Petulo ŵajendelecele kuŵeceta maloŵe gane gamajinji, ni ŵaŵendile kuti, “Mtame kwakutalikangana ni cilango cacikwisa ni ŵandu ŵangalumbana aŵa.”

⁴¹ Papopo ŵandu ŵaŵapikene maloŵe gakwego ŵakulupilile ni ŵa ŵabatisidwe, nipo pa lisiku lilyolyo ŵandu ŵakwana mpela 3,000 ŵajonjecesyedwe mwikugalyo.

⁴² Ndaŵi josope ŵaliji mkusongana kuti apikane yele yiŵajiganyaga ŵandumetume ŵala, soni ŵaliji mkusyoŵekana nipo ŵalyaga mkate ni kupopela pampepe.

Ndamo sya aklistu ŵandanda

⁴³ Ŵandu wosope ŵaliji mkutenda woga ligongo lya yakusimonjesya ni yimanyisyo yejinji yele yiŵatendaga ŵandumetume ŵala.

⁴⁴ Wosope ŵakulupililawo ŵaliji pampepe, nipo ŵagaŵanaga yindu yawo yosope.

⁴⁵ Ŵasumisyaga yindu yawo, mbiya syakwe ni ŵagaŵanaga ni ŵandu wosope mwakulingana ni kulaga kwa mundujo.

⁴⁶ Lisiku ni lisiku ŵasonganaga pampepe m'nyumba ja Mlungu jakupopelela, nipo ŵalilaga pamo msimangwawo. Ŵalyaga yakulya yawoyo mwakusangalala ni mwakulitulusya.

⁴⁷ Ŵaliji kumlumba Mlungu, nipo ŵandu wosope ŵatendelaga canasa jemanjajo. Lisiku ni lisiku Ambuje ŵaliji mkwajonjecesya ŵane ŵandu ŵakupocela cikulupusyo.