Masengo 15 - Chiyawo Bible

Ya msongano wa ku Yelusalemu

¹ Ŵandu ŵane ŵakutyocela ku Yudeya ŵayice ku Antiokeya ni ŵatandite kwajiganya ŵakulupilila kuti, “Naga ngimwumbala pakuya msyungu wa Mose,* jemanja ngakomboleka kulupuka.”

² Nambo Paulo ni Banaba ŵasisyanile nawo mnope pa yeleyi. Myoyo ŵakamulene kuti Paulo, Banaba ni ŵakulupilila ŵane, ajawule ku Yelusalemu kukuwonegana ni ŵandumetume ni acakulungwa ŵa mpingo* pa ngani jeleji.

³ Mpingo piwatumile, jemanjajo ŵapitile ku Fenisiya ni Samaliya ali mkusalaga ya ŵandu ŵa mitundu jine* muŵapitikucile mitima jawo. Maloŵe gelega gasangalesye mnope ŵandu wosope ŵakulupilila ŵala.

⁴ Piŵayice ku Yelusalemu ŵapoceledwe ni mpingo, ŵandumetume ni acakulungwa ŵa mpingo. Ni ŵasalile yosope yiŵatesile Mlungu mwa jemanjajo.

⁵ Nambo ŵakulupilila ŵane ŵiŵaliji kala mwikuga lya Afalisi,* ŵajimi ni kuti, “Ŵandu ŵa mitundu jine akwenela kuwumbala,* nipo alamulidwe kusunga Malamusi ga Mose.”

⁶ Ŵandumetume ni acakulungwa ŵa mpingo ŵasongene pampepe kuti ajiganicisye nganiji.

⁷ Ali aŵecete kwa ndaŵi jajilewu, Petulo* ŵajimi ni ŵatite, “Acalongo acimjangu, mkumanyilila kuti masiku gandanda gala Mlungu ŵasagwile une pasikati pa jemanja kuti lalicile Ngani Syambone* kwa ŵandu ŵa mitundu jine, kuti asipikane ni kulupilila.

⁸ Nipo Mlungu jwakumanyilila mitima ja ŵandu, ŵatendele umboni jemanjajo pakwapa Msimu Ŵaswela, mpela muŵatupelele uweji mula.

⁹ Mlungu nganalekanganya kose sikati jetuwe ni jemanjajo, nambo ŵaswejesye mitima jawo ni cikulupi.

¹⁰ Sambano, ligongo cici akumlinga Mlungu pakwatwika likongwa mlukosi ŵakulijiganyawo, lwele atamose acinangolo ŵetu kapena uwe ŵakwe nganitutwicileje citandilile?

¹¹ Nambo tukulupilila kuti tutukakulupuce ligongo lya kusaka kwa Ambuje Yesu* mpela soni jemanja.”

¹² Ŵandu wosope ŵatemi jii ni kwapikanilaga Banaba ni Paulo piŵasalaga yimanyisyo ni yakusimonjesya yiŵatesile Mlungu mwa jemanjajo kwa ŵandu ŵa mitundu jinewo.

¹³ Piŵamasile kuŵeceta, Yakobo* ŵatite kuti, “Mumbikanile, acalongo acimjangu.

¹⁴ Simoni* aŵecete ya mwele Mlungu pandanda pene muŵakumbucilile ŵandu ŵa mitundu jine, pakwasapula ŵane pasikati pawo kuti aŵe ŵandu ŵakweŵakwepe.

¹⁵ Maloŵe ga jwakulocesya* gakwiticisya mnope yeleyi. Paja kwalembedwe kuti,

¹⁶ ‘Yili yimasile yeleyi, tinjiwujila, tinjitaŵa soni nyumba ja Daudi* jijagwile. Tinjitaŵa soni masame gakwe, ni kugakolosya soni.

¹⁷ Myoyo ŵandu ŵane wosope ŵasosesose Ambuje, niko kuti ŵandu ŵa mitundu jine ŵakuŵilanjidwa ni lina lyangu.

¹⁸ Myoyo ni yakuti Ambuje, ŵele ŵiŵamanyisye yeleyi kutandila kalakala.’

¹⁹ “Myoyo nganisyo syangu nguti, tukasawusya ŵandu ŵa mitundu jineŵa ŵele ŵakupitikuka mitima jawo ni kwawula kwa Mlungu.

²⁰ M'malo mwakwe twalembele cikalata cakwasalila kuti akalyaga yindu yangaswejelesya yele yiyapelecedwe kwa milungu ja kupanganyidwa ni ŵandu. Alece ndamo syacigwagwa, nipo akalya nyama syagamba kupopotola, kapena soni miasi.

²¹ Paja kutandila kalakala mu msinda uliwose mwana ŵandu ŵakwiganya Malamusi ga Mose, nipo gaŵalanjidwaga maloŵe gakwe m'nyumba sya kupopelela lisiku lyakupumula* lya Ayuda lili lyose.”

Cikalata kwa ŵandu ŵa mitundu jine ŵakulupilila

²² Pelepo ŵandumetume ni acakulungwa ŵa mpingo, pampepe ni mpingo wosope, ŵaganisisye kusagula ŵandu ŵane pasikati pawo kuti ŵatume ku Antiokeya pampepe ni Paulo ni Banaba. Ŵasagwile Yudasi, jwakolanjidwa Balasabasi, nipo soni Sila, ŵandu ŵa ulemu ni ŵakulupicika pasikati pa acalongo acimjawo,

²³ kuti akapelece cikalata cakusala kuti, “Uwe, ŵandumetume ni acakulungwa ŵa mpingo tukupeleka moni kwa jemanja acalongo acimjetu ŵa mitundu jine ŵa ku Antiokeya, ŵa ku Siliya, ni ŵa ku Silisiya.

²⁴ Tupikene kuti ŵandu ŵane ŵakutyocela mwikuga lyetu ŵaliji kumsawusya ni kumsokonesya nganisyo. Jemanjajo nganitwatuma uwe iyayi.

²⁵ Myoyo twasongene pampepe, ni twakamulene kusagula ŵandu ni kwatuma kwa jemanja pampepe ni ŵakunonyeledwa ŵetu Banaba ni Paulo.

²⁶ Ŵele ŵiŵapelece umi wawo ligongo lya kutumicila Ambuje ŵetu Yesu Klistu.*

²⁷ Ni ligongo lyakwe twatumisye soni Yudasi ni Sila kuti ŵasalile ni pakamwa yele yitulembile mcikalatayo.

²⁸ Pakuti yili yambone kwa Msimu Ŵaswela ni kwetuwe soni kuti tukamtwika msigo wine, nambo yeleyopeyo yili yakusosekwa.

²⁹ Mkasimlya cakulya cacipelecedwe kwa milungu jakupanganyidwa ni ŵandu, mkamlya miasi kapena nyama jakupopotola, nipo mkatenda cikululu. Naga mkuyileka yeleyi, timcitenda cenene. Sigalani cenene.”

³⁰ Sambano ŵiŵatumidwe ŵala ŵapite kwika ku Antiokeya. Kweleko ŵasongenye mpingo wosope ni ŵapelece cikalata cila.

³¹ Piŵaŵalasile cikalataco, ŵasangalele mnope ligongo lya maloŵe gakwalimbisya mtima.

³² Yuda ni Sila ŵiŵaliji ŵakulocesya, ŵalimbisye acimjetu ŵala ni maloŵe gejinji ni kujitamikasya mitima jawo pasi.

³³ Piŵatemi kweleko kwa masiku, acimjetu ŵala ŵakundile mwa mtendele kuti awujile kwa ŵele ŵiŵatumile ŵala. [

³⁴ Nambo Sila ŵasacile kuti asigale.]

³⁵ Nambo Paulo ni Banaba ŵasigele ku Antiokeya, kwiganya ni kulalicila maloŵe ga Ambuje pampepe ni ŵandu ŵane ŵajinji.

Paulo ni Sila akulekangana

³⁶ Gali gapite masiku, Paulo ŵamsalile Banaba kuti, “Kwende tujawule mu msinda uliwose kwele kutwalalicile maloŵe ga Ambuje, twajendele acimjetu kuti tukalole soni yakutenda.”

³⁷ Banaba ŵasacile kuti amjigale Yohane* Maliko* pa ulendowo.

³⁸ Nambo Paulo ŵaganisisye kuti ngayiŵa yambone kumjigala mundu jwele juŵalesile jemanjajo ku Pamfiliya, nipo ngajawula nawo ku masengo.

³⁹ Pelepo nganakamulana, mpaka ŵalekangene. Nipo Banaba ŵamjigele Maliko ni ŵajesile mcombo kwawula ku Saipulasi.

⁴⁰ Nambo Paulo ŵamsagwile Sila ni ŵatyosile, nipo acalongo acimjawo ŵapopelele kuti Ambuje ŵape upile.

⁴¹ Ŵapitile ku Siliya ni ku Silisiya kuti aŵe mkulimbisya mipingo.