Masengo 14 - Chiyawo Bible

Ya ku Ikoniyamu

¹ Sambano ku Ikoniyamu Paulo ni Banaba ŵajinjile m'nyumba jakupopelela ja Ayuda. Ni ŵaŵecete mwamacili, mwakuti ŵandu ŵajinji, Ayuda nipo soni ŵandu ŵa mitundu jine* ŵakulupilile.

² Nambo Ayuda ŵangakulupilila ŵala ŵatendekasisye ŵandu ŵa mitundu jine ŵala kuti aŵengane ni ŵakulupilila ŵala.

³ Paulo ni Banaba ŵatemi kweleko masiku gejinji, ali mkulalicila mwakulimba mtima ya cinonyelo ca Ambuje. Nipo Ambuje ŵatendelaga umboni maloŵe gawo pakwapa macili gakutendela yimanyisyo ni yindu yakusimonjesya.

⁴ Nambo ŵandu ŵa mu msindamo ŵagaŵanikene, ŵane ŵaliji mbali ja Ayuda nipo ŵane mbali ja ŵandumetume.

⁵ Pelepo ŵandu ŵa mitundu jine pampepe ni Ayuda ni acakulungwa ŵawo ŵakamulene ya kwasawusya ŵandumetume ni kwaponya maganga.

⁶ Ŵandumetume ŵala piŵapikene yeleyi, ŵatilile ku Lisitala ni Delibe, m'misinda ja ku Likaoniya ni ku cilambo cakusyungulila misindajo.

⁷ Kweleko ŵalalicile Ngani Syambone.*

Ya ku Lisitala ni ku Delibe

⁸ Ku Lisitala kwapali mundu jwine jwamlume jwamlemale ngongolo. Ŵapagwile ali jwamlemale nipo nganajendeje cipagwile cakwe.

⁹ Jwalakwe jwapikanilaga Paulo piŵaŵecetaga. Paulo ŵamlolecesye nipo ŵam'weni kuti akwete cikulupi cakuti mpaka apole,

¹⁰ ŵaŵecete mwakwesya maloŵe kuti, “Mjime mwakongoka ni sajo syenu.” Papopo mundu jula jwajimi ni kutanda kwendajenda.

¹¹ Ŵandu wosope ŵala ŵayiweni yele Paulo ŵatesile, ŵatandite kuŵeceta mwakwesya maloŵe mu ciŵeceto ca ku Likaoniya kuti, “Milungu jiyice kwetuwe mpela ŵandu.”

¹² Pelepo Banaba ŵampele lina lyakuti Seusi nipo Paulo ŵampele lina lyakuti Helemesi, ligongo ŵalongolelaga pakuŵeceta.

¹³ Jwakutaga mbopesi jwa Seusi, jwele nyumba jakwe jakupopelela jaliji ku meso kwa msindawo, ŵajigele ng'ombe sya mikambako ni maluŵa ni kwika nayo ku yipata ya mu msindawo. Jwalakwe pampepe ni ŵandu wosope ŵasacile kupeleka mbopesi kwa ŵandumetumewo.

¹⁴ Nambo katema kiŵapikene yeleyi Banaba ni Paulo, ŵapapwile yakuwala yawo ni ŵawutucile sikati ja likuga lya ŵanduwo. Ni ŵaŵecete mwakwesya maloŵe kuti,

¹⁵ “Ŵandumwe, ligongo cici mkutenda yeleyi? Uwe nowe tuli ŵandu mpela jemanja soni. Tuli apano kulalicila Ngani Syambone, syakuti alece yindu yacabe ni kupitikucila kwa Mlungu jwa umi juŵapanganyisye kwinani, cilambo capasi, nyasa ni yosope yili mwelemo.

¹⁶ Kalakalako Mlungu ŵakundile ŵandu ŵa mitundu josope kuti akuyeje matala gawogawope.

¹⁷ Nambope nganaleka kulitendela umboni mu yambone yele yakutenda. Kutyocela kwinani akusiŵapa ula ni ndaŵi ja yisogosi. Akusiŵapa yakulya ni yine yejinji ya yagumbala mitima jenu ni cisangalalo.”

¹⁸ Atamose ŵaŵecete maloŵe gelego, ŵandumetumewo ŵalasile kwalekasya ŵandu ŵala kuti akasapeleka mbopesi kwa jemanjajo.

¹⁹ Nambo ŵayice Ayuda ŵane ŵakutyocela ku Antiokeya ni ku Ikoniyamu ni ŵanyenjelele ŵandu ŵala kuŵa mbali jawo. Sambano ŵanduwo ŵamsomile Paulo maganga ni kumwutila kusa kwa msindawo, pakuti ŵapelaga awile.

²⁰ Nambo ŵakulijiganya* ŵala ŵasongene ni ŵamsyungulile, jwalakwe jwajimwice ni kwinjila soni mu msindamo. Kundaŵi kwakwe jwalakwe ni Banaba ŵapite ku Delibe.

Paulo ni Banaba akuwujila ku Antiokeya upande wa Siliya

²¹ Paulo ni Banaba piŵamasile kulalicila Ngani Syambone ku Delibe, ŵandu ŵajinji ŵakulupilile ni kuŵa ŵakulijiganya ŵawo. Ni ŵawujile ku Lisitala, ku Ikoniyamu, ni ku Antiokeya upande wa Pisidiya.

²² Ŵalimbisye mitima ŵakulijiganya ŵala ni ŵasalile kuti akajasa cikulupi cawo. Ŵasalile kuti, “Kuti tukajinjile mu Ucimwene wa Mlungu* tukwenela kupilila yisawusyo yejinji.”

²³ Pa mpingo* uliwose ŵasagwile acakulungwa ŵa mpingo.* Ni mapopelo ni kulijima yakulya, ŵapelece kwa Ambuje ŵele ŵiŵamkulupilile.

²⁴ Kaneko ŵapitile ku Pisidiya nipo ŵayice ku Pamfiliya.

²⁵ Piŵalalicile maloŵe ga Mlungu ku Peliga, ŵapite ku Ataliya.

²⁶ Kutyocela kweleko ŵajesile mcombo kuwujila ku Antiokeya, kwele kuŵapelece jemanjajo kwa Mlungu kuti ŵape upile pa masengo gele sambano ŵaliji ali amalisisye.

²⁷ Piŵayice kweleko, ŵasonganyisye mpingo wosope, ni ŵasalile yosope yele Mlungu ŵatesile mwa jemanjajo, nipo mwele jwalakwe ŵawugulile ŵandu ŵa mitundu jine litala kuti akulupilile.

²⁸ Nipo ŵatemi kweleko ni ŵakulijiganya ŵala kwa ndaŵi jajilewu.