Masengo 12 - Chiyawo Bible

Helodi ŵawuleje Yakobo ni kumŵika Petulo mu ukayidi

¹ Pa ndaŵi jelejo Mwenye Helodi* ŵakamwile ŵane wa mu mpingo* ni kwasawusyaga.

² Ŵalamwile Yakobo,* mkulugwawo Yohane,* kuti awulajidwe ni upanga.

³ Piŵayiweni kuti yikwasangalasya yeleyi Ayuda, ŵapitilisye nipo ŵamtaŵile Petulo.* Yeleyi yatendekwe ndaŵi ja Pasaka,* cisangalalo ca mikate jangali cakusasaŵilisya.*

⁴ Ali amkamwile, ŵamwugalile m'nyumba ja akayidi ni ŵampelece m'myala mwa makuga mcece ga asilikali kuti gamlondeleje, likuga lililyose lyaliji ni asilikali mcece. Helodijo ŵasakaga kuti Petulo amjimbe magambo pameso pa ŵandu wosope, cili cimasile cisangalalo ca Pasaka.

⁵ Myoyo Petulo ŵaliji m'nyumba ja akayidi. Nambo ŵandu ŵa mpingo ŵaliji kumpopelela kwa Mlungu mwangalecesya.

Ŵamkopwesye Petulo m'nyumba ja akayidi

⁶ Cele ciloco, mkanikuce Helodi ŵatiji amjimbe magambo Petulo pameso pa ŵandu wosope, Petulo ŵagonile pasikati pa asilikali ŵaŵili. Ŵaliji ŵataŵidwe mawunyolo gaŵili, nipo alonda ŵane ŵaliji pa mlango.

⁷ Mwacisisimucisya lyayice lilayika lya Ambuje, nipo lyalangwisye m'nyumbamo. Lilayikalyo lyatenganyisye Petulo pekoyo ni ŵajimwice licitiji, “Mjimuce mwakwanguya!” Papopo maunyolo gigaliji m'makono mwa Petulo gagwilile pasi.

⁸ Lilayika lila lyatite, “M'wale yakuwala ni sapato syenu.” Nipo ŵatesile yeleyo. Lilayika lila lyatite soni, “M'wale mkanjo wenu ni munguye une.”

⁹ Apo Petulo ŵakopwece ni ŵalikuyisye lilayika lila, ali ngakumanyilila kuti yele lilayika lyatendaga yaliji yakuwona. Ŵagambaga kupela kuti akusagamila.

¹⁰ Ŵapite pa alonda ŵandanda ni ŵaŵili mpaka ŵayice pa cipata cacisyano cakwinjilila mu msinda, cawugwice cisyenepe ni ŵakopwece. Ŵajesile mumsewo wine wa mu msindawo, nipo mwacisisimucisya lilayika lila lyamlesile Petulo jika.

¹¹ Pelepo Petulo ŵamanyilile msyene ni ŵatite kuti, “Sambano ngumanyilila kuti Ambuje ŵatumisye lilayika lyawo kuti lingulupusye m'myala mwa Helodi ni yosope yele Ayuda yajembeceleje kuti akandesile.”

¹² Piŵamanyilile yiyamtendeceleyo, ŵapite ku nyumba ja Maliya, mamagwe Yohane Maliko.* Ŵandu ŵajinji ŵasongene kweleko nipo ŵapopelaga.

¹³ Petulo ŵapoposisye pa mlango kusa, jwamasengo jwamkongwe lina lyakwe Loda, ŵayice kuti amwugulile.

¹⁴ Pakugamanyilila maloŵe ga Petulo, ŵasangalele mnope, mwakuti nganawugula litangalyo, m'malo mwakwe ŵawutucile mkati kuja kwasalila ŵane ŵala kuti Petulo ali pa mlango.

¹⁵ Ŵanduwo ŵatite kwa jwelejo, “Ana mtesile masoka?” Nambo jwelejo ŵalimbicile kuti yakuwona nditu. Apo ŵanduwo ŵatite kuti, “Lilayika lyakwe lyelelyo.”

¹⁶ Nambo Petulo ŵaliji mkupoposyape. Piŵawugwile, ŵaweni kuti ni jujojo nipo ŵasimonjile mnope.

¹⁷ Petulo ŵanyakwile mkono wakwe kuti ŵanduwo atame jii, ni ŵasalile mwele Ambuje ŵamkopocesye m'nyumba ja acikayidi jila. Nipo ŵatite, “Mumsalile Yakobo* ni acimjetu ŵane ŵala yeleyi.” Kaneko Petulo ŵapite kwine.

¹⁸ Kundaŵi pikwacele, asilikali ŵiŵamlondelaga Petulo ŵala ŵasoŵile yakutenda ni ŵatite, “Ana Petulo apite kwapi?”

¹⁹ Helodi ŵalamwile kuti amsosesose jwalakwejo, nambo nganamsimana. Ni ŵajimbile magambo acilondawo nipo ŵalamwile kuti awulajidwe. Kaneko Helodi ŵatyosile ku Yudeya kwawula kutama ku Kaisaleya.

Ya ciwa ca Helodi

²⁰ Helodi ŵatumbilile ŵandu ŵa ku Taya ni Sidoni. Ŵanduwo ŵayice kwa jwalakwe pamo. Ŵatandite kumnyenjelela Bulasita, jwakutumicila m'nyumba ja mwenye kaneko ni ŵapite kuŵenda mtendele, ligongo yakulya ya cilambo cawo yatyocelaga mcilambo ca mwenyejo.

²¹ Pa lisiku liŵalisagwile, Helodi ŵawete yakuwala ya ucimwene ni kutama pa mpando wakwe wa ucimwene ni ŵatandite kuŵeceta kwa ŵanduwo.

²² Ŵanduwo ŵaŵecete mwakwesya maloŵe kuti, “Gelega ni maloŵe ga Mlungu, ngaŵa ga mundu wamba.”

²³ Papopo lilayika lya Ambuje, lyamputile Helodi ni ŵagwile pasi ligongo nganapeleka ulemu kwa Mlungu. Mbisu syamlile nipo ŵawile.

²⁴ Nambo maloŵe ga Mlungu gapitilile kwendelecela.

²⁵ Sambano Banaba ni Saulo* ŵawusile piŵamasile kwanilisya yele yiŵatumidwe ku Yelusalemu, nipo ŵamjigele Yohane Maliko.