Masengo 11 - Chiyawo Bible

Petulo akuwusalila mpingo wa ku Yelusalemu ngani sisyatendekwe

¹ Ŵandumetume pamo ni acimjawo ŵele ŵiŵaliji ku Yudeya, ŵapikene kuti ŵandu ŵa mitundu jine* apocele maloŵe ga Mlungu.

² Sambano Petulo* piŵayice ku Yelusalemu, ŵandu ŵane ŵiŵanonyelaga ya kuwumbala* ŵatandite kumnyosya Petulo acitiji,

³ “Wawo ŵajinjile m'nyumba sya ŵandu ŵangawumbala mpakana kulya nawo pamo.”

⁴ Nambo Petulo ŵatandite kwasalila yosope muyaŵelele kutyocela pandanda pasyesyene acitiji:

⁵ “Une napopelaga mu msinda wa Yopa, natesile mpela komoka, kaneko naciweni cindu cili mkutuluka camti mpela nguwo jajikulungwa jajitaŵe songa mcece kutyocela kwinani, ni jayice pinaliji unepo.

⁶ Ndili mkucilolecesya celeco, nayiweni yinyama yakulanjidwa ni yamwitinji nipo soni yakwaŵa ni yijuni ya mwinani.

⁷ Nipo napikene maloŵe gakuti, ‘Petulo, mjimuce mwulaje mlye.’

⁸ Nambo natite, ‘Iyayi Ambuje, une nganindyeje wamba cindu cangaswejesya kapena cangalumbana.’

⁹ Nambo maloŵe gakutyocela kwinani gala gatite soni kuti, ‘Yele Mlungu yayiswejesye, mkayitenda yangalumbana.’

¹⁰ Yeleyi yambonecele katatu, nipo yosopeyo yanyakulidwe kwawula kwinani.

¹¹ Ndaŵi jijojo ŵayice ŵandu ŵatatu ŵele ŵiŵatumile kwika ku nyumba kwele kunatamaga. Ŵanduwo ŵatyocele ku Kaisaleya.

¹² Msimu Ŵaswela ŵaliji ali asalile kuti njawule kweleko pangalolela kose mtundu wawo, nipo najawile nawo. Acimjangu msano ni jumo nombe nawo ŵambecesye une, nipo wosopewe twajinjile m'nyumba ja Koneliyo.

¹³ Jwalakwe jwatusalile yijwatite pakuliwona lilayika lili lijimi m'nyumba mwakwe ni kumsalila kuti, ‘Mwatume ŵandu ku Yopa kuti akamŵilanje Simoni* Petulo.

¹⁴ Tamsalile maloŵe gaticimkulupusya pamo ni wosope ŵa mwiŵasa mwenu.’

¹⁵ Pinatandite kuŵeceta, Msimu Ŵaswela ŵayicilile jemanjajo mpela yiŵatite pakutuyicilila uwe pandanda pala.

¹⁶ Nipo nakumbucile maloŵe giŵaŵecete Ambuje gala kuti, ‘Yohane ŵabatisyaga ni mesi, nambo jemanja timcibatisidwa ni Msimu Ŵaswela.’

¹⁷ Sambano naga Mlungu ŵapele mtuka jemanjajo wele wuŵatupele uwe pitwakulupilile Ambuje Yesu* Klistu,* nambi une ndili ŵani kuti mpakana kombola kumlekasya Mlungu?”

¹⁸ Piŵapikene gele maloŵega, ŵalesile ya kumnyosya nipo ŵamlumbile Mlungu acitiji, “Eti soni Mlungu ŵapele ŵandu ŵa mitundu jine upile wakupitikuka mtima ni kupocela umi wangamala.”*

Mpingo wa ku Antiokeya

¹⁹ Ŵandu ŵele ŵiŵapwilingene ŵala ligongo lya yisawusyo yiyabucile katema kele Sitefano kiŵawulajidwe, ŵapite kwika mpaka ku upande wa ku Fenisiya, ku cilumba ca Saipulasi, ni ku msinda wa Antiokeya. Ŵalalicilaga Ngani Syambone* kwa Ayudape.

²⁰ Nambo pasikati pawo papali ŵane ŵakutyocela ku Saipulasi ni ku msinda wa Kilene. Ŵapite kwika kwa Antiokeya nipo ŵalalicilaga Ngani Syambone sya Ambuje Yesu kwa ŵandu ŵa mitundu jine.

²¹ Macili ga Ambuje galiji pa jemanjajo, nipo ŵandu ŵajinji ŵakulupilile ni ŵagalawucile kwa Ambuje.

²² Ngani syapikanice ku mpingo* wa ku Yelusalemu nipo watumisye Banaba ku Antiokeyako.

²³ Piŵayice Banaba ni kulola mwele Mlungu ŵapelele upile, ŵasangalele ni ŵasalicisye wosopewo kuti asimicisye mtima kuŵa ŵakulupicika kwa Ambuje.

²⁴ Banabajo jwaliji mundu jwambone, jwakulongoleledwa ni Msimu Ŵaswela ni cikulupi. Myoyo ŵandu ŵajinji ŵalipelece kwa Ambuje.

²⁵ Nipo Banaba ŵapite ku Talisasi kukumsosa Saulo.*

²⁶ Piŵamsimene, ŵapite najo ku Antiokeya. Jemanjaji ŵatemi pamo ni mpingowo kwa caka cimo, ni ŵajiganyaga ŵandu ŵajinji. Nipo kwa Antiokeyako ni kwele ŵakulijiganya* ŵatandite kuŵilanjidwa kuti aklistu.

²⁷ Masiku gelego ŵayice ŵakulocesya ku Antiokeya kutyocela ku Yelusalemu.

²⁸ Jumo jwa jemanjajo lina lyakwe Agabu, ŵajimi kusala yindu ya pasogolo mwamacili ga Msimu Ŵaswela kuti, tikuciŵa kwana sala jakogoya mcilambo cosope. Nipo salajo jayice ndaŵi ja mwenye Klaudiyo.

²⁹ Ŵakulijiganya ŵala, ŵapangene kuti ŵatumicisye cikamucisyo acimjawo ŵakutama ku Yudeya, nipo jwalijose atumisye malingana ni kupata kwakwe.

³⁰ Yeleyi ŵayitesile, nipo ŵatumile Banaba ni Saulo kuja kupeleka kwa acakulungwa ŵa mpingo.*