Masengo 10 - Chiyawo Bible

Petulo ni Koneliyo

¹ Ku Kaisaleya kwapali mundu jwine, lina lyakwe Koneliyo. Jwaliji jwamkulungwa jwa likuga lya asilikali ŵa ngondo ŵa Ciloma, nipo likugalyo lyaŵilanjidwaga kuti, “Likuga lya ku Itale.”

² Jwaliji mundu jwakusamala dini, nipo jwalakwejo pamo ni liŵasa lyakwe lyosope ŵamjogopaga Mlungu. Ŵakamucisyaga Ayuda ŵakulaga, nipo ŵamlambilaga Mlungu ndaŵi josope.

³ Lisiku line ligulo, ndaŵi jili mpela 3 koloko, ŵayiweni yindu mu m'mesomkulola. Ŵaliweni nditu lilayika lya Mlungu lilimkwisa kwa jwalakwe ni kuŵeceta kuti, “Koneliyo!”

⁴ Jwalakwe ŵalilolecesye lilayikalyo ni woga, nipo ŵaliwusisye kuti, “Ana kwambone, Ambuje?” Lilayikalyo lyajanjile kuti, “Mlungu asangalele ni mapopelo genu, pampepe ni masengo genu gakwakamucisya ŵakulaga.

⁵ Sambano mwatume ŵandu ku Yopa kuti akamŵilanje mundu jwine, lina lyakwe Simoni* Petulo.*

⁶ Akutama kwa Simoni, m'misili jwa mapende, jwele nyumba jakwe jili mungulugulu nyasa.”

⁷ Lilayika lilyaŵecete najo lila lili lityosile, Koneliyo ŵaŵilasile ŵamasengo ŵakwe ŵaŵili ni msilikali jwele juŵaliji jwakutumicila jwakwe nambo soni jwakulambila Mlungu.

⁸ Piŵamasile kwasalila yiyamwonecele, ŵatumile ku Yopa.

⁹ Kundaŵi kwakwe, ali pa ulendo wawo nipo katema kiŵaŵandicile msindawo, Petulo ŵakwesile pa msakasa watyatyatya kupopela ndaŵi ja musi.

¹⁰ Ni jamkwete sala ni ŵasacile kulya. Nambo piŵakolocesyaga yakulya, ŵatesile mpela akomwece.

¹¹ Ŵakuweni kwinani kuli kuwugwice, cindu cili mkutulucila pasi mpela nguwo jajikulungwa jajitaŵidwe songa syakwe mcece.

¹² Mwelemo mwaliji mwana yinyama yakulekanganalekangana, nipo yakwaŵa, ni yijuni ya mwinani.

¹³ Petulo ŵapikene maloŵe gakuti, “Petulo mjimuce, mwulaje, mlye.”

¹⁴ Nambo Petulo ŵatite kuti, “Iyayi, Ambuje, une nganindyeje wamba cindu cangaswejela kapena cangalumbana.”

¹⁵ Ŵapikene soni maloŵe kaŵili gakuti, “Yindu yele Mlungu yayiswejesye, m'mwejo kasimyitenda kuti yangalumbana.”

¹⁶ Yeleyi yawonece katatu, kaneko yindu yila yajigalidwe kwawula kwinani.

¹⁷ Petulo ŵatandite kuganicisya ya kugopolela kwa sagamisi. Ndaŵi jijojo ŵandu ŵele Koneliyo ŵatumile ŵala ŵawusyaga nyumba ja Simoni, nipo ŵaliji sambano ali ajimi pa mlango.

¹⁸ Ŵapoposisye ni ŵawusisye kuti, “Ana kwana akuno mlendo, lina lyakwe Simoni Petulo?”

¹⁹ Petulo ali mkuganicisyape ya sagamisi sila, Msimu Ŵaswela ŵamsalile kuti, “M'mwe, ŵandu ŵatatu akumsosa.

²⁰ Mjawule mkawonegane nawo mwangakayicila, pakuti natumile une.”

²¹ Apo Petulo ŵatulwice mwinani mula ni ŵatite kwa ŵandu ŵala kuti, “Jwamkumsosajo ndili une. Ana kwambone?”

²² Jemanjajo ŵajanjile kuti, “Jwamkulungwa jwa likuga lya asilikali ŵa ngondo, Koneliyo atutumile uwe. Jweleju ni mundu jwambone nipo jwakogopa Mlungu, soni Ayuda wosope akusamcimbicisya. Lilayika lya Mlungu lyasalile kuti ŵaŵilanje wawojo ajawule ku nyumba jakwe, kuti akapikane maloŵe gele gali ni ŵalakwe.”

²³ Pelepo Petulo ŵasalile ŵanduwo kuti ajinjile m'nyumba ni ŵagonile lisiku limope. Kundaŵi kwakwe ŵalongene nawo ŵandu ŵala pampepe ni ŵane ŵakulupilila ŵa ku Yopa ŵaliji nawo yalumo.

²⁴ Kundaŵi kwakwe soni ŵayice ku Kaisaleya, kwele Koneliyo ŵamjembecelaga pampepe ni acalongo acimjakwe ni acimjakwe ŵane ŵele ŵiŵaŵilasile.

²⁵ Ndaŵi jiŵajinjilaga Petulo m'nyumba, Koneliyo ŵamcingamile, ni ŵatindiŵele pa sajo sya Petulo ni kumlambila.

²⁶ Nambo Petulo ŵamjimwisye ni ŵatite, “Jimukani, une none ndili mundu wamba.”

²⁷ Petulo ŵaŵecetaga ni Koneliyo katema kele kiŵajinjilaga m'nyumba, nipo ŵasimene ŵandu ŵajinji ali asongangene.

²⁸ Petulo ŵatite kuti, “Jemanja mkumanyilila kuti malamusi ga mpingo* wa Ciyuda gangakunda mundu jwa mtundu wa Ciyuda kuti akamulane kapena kumanyigana ni ŵandu ŵa mitundu jine.* Nambo Mlungu amanyisye une kuti ngamkolanga mundu jwalijose kuti ali jwangajenela kapena jwangalumbana.

²⁹ Ni ligongo lyakwe yice mwangakayicila pambikene kuŵilanga kwenu. Sambano ngumwusya kuti, mumbilanjile cici?”

³⁰ Koneliyo ŵajanjile kuti, “Lijusi, naliji mkupopela m'nyumba mwangu, ndaŵi mpela jinojino ja 3 koloko ligulo, nagambile kumwona mundu jwine jwam'wale yakuwala yakunyesimila ali ajimi pasogolo pangu.

³¹ Ni ŵatite, ‘Koneliyo, Mlungu agapikene mapopelo genu ni masengo ga canasa gimkwatendela ŵakulaga.

³² Sambano mumtume mundu ku Yopa akamŵilanje mundu jwine lina lyakwe Simoni Petulo. Jwalakwe ali mlendo ku nyumba ja Simoni, jwakupanganya mapende, nyumba jakwe jili mungulugulu nyasa.’

³³ Ni ligongo lyakwe namŵilasile, nipo atesile cenene pa kwikapa. Sambano wosope tuli apano pameso pa Mlungu kuti tupikane yosope yele Ambuje yiŵatumile ŵalakwe kuti atusalile.”

Maloŵe ga Petulo m'nyumba ja Koneliyo

³⁴ Petulo ŵatandite kuŵeceta acitiji, “Une sambano manyilile kuti yakuwona Mlungu jwangali lusagu.

³⁵ Jwalijose jwakusamjogopa jwalakwe ni kutenda yambone akumpocela, pangalolela kuti akutyocela mtundu wapi.

³⁶ Akumanyilila kuti ŵatumicisye Aisalaeli maloŵe gawo ni ŵasalile Ngani Syambone* sya mtendele kupitila mwa Yesu* Klistu,* jwali Ambuje jwa ŵandu wosope.

³⁷ Akumanyilila yiyatendekwe ku Yudeya kosope, kutandila ku Galileya panyuma pa ndaŵi jele Yohane* ŵalalicilaga ya ubatiso.

³⁸ Akumanyilila ya Yesu jwa ku Nasaleti kuti Mlungu ŵampungulile jwelejo Msimu Ŵaswela ni macili. Ŵapite ku malo galigose ali mkutenda masengo gambone ni kwaposya ŵandu wosope ŵiŵaliji m'myala mwa Satana,* ligongo Mlungu ŵaliji najo.

³⁹ Uwe tuli mboni syakwe sya yosope yiŵayitesile mu Yelusalemu mcilambo cosope ca Ayuda. Jemanjajo ŵamwuleje pakumkomela pa msalaba.

⁴⁰ Nambo gali gapite masiku gatatu, Mlungu ŵamjimwisye ku ŵawe ni ŵakundile kuti awonecele pakulanguka.

⁴¹ Nganawonecela kwa ŵandu wosope, nambo kwa mboni syele Mlungu ŵasisagwile cile. Ni kuti ŵawonecele kwa uwe, ŵatwalyaga ni kumwa najo pamo ali ajimwice ku ŵawe.

⁴² Nipo ŵatulamulile kuti tukalalicile Ngani Syambone kwa ŵandu wosope, ni kutendela umboni kuti jwalakwe ni jwele Mlungu ŵamsagwile kuŵa jwakulamula ŵandu ŵa cijumi ni ŵawe.

⁴³ Ŵakulocesya wosope ŵatendele umboni, ni ŵatite kuti, jwalijose jwakumkulupilila jwalakwe mwa lina lyakwe tacikululucidwa ulemwa* wakwe wosope.”

Ŵandu ŵa mitundu jine ŵapocele Msimu Ŵaswela

⁴⁴ Katema kele Petulo kiŵaŵecetaga, Msimu Ŵaswela ŵayicilile ŵandu wosope ŵiŵapikanilaga maloŵego.

⁴⁵ Ayuda ŵakulupilila ŵala ŵiŵayice pampepe ni Petulo ŵasimonjile kuti, Mlungu apelece mtuka wa Msimu Ŵaswela kwa ŵandu ŵa mitundu jine.

⁴⁶ Pakuti ŵapikene ali mkuŵeceta yiŵeceto ya cilendo ni kumlumbaga Mlungu mnope. Pelepo Petulo ŵatite,

⁴⁷ “Ŵandu aŵa apocele Msimu Ŵaswela, mpela mutwapocelele uweji mula. Nambi apali jwine jwakulekasya kuti ŵanduŵa akabatisidwa ni mesi?”

⁴⁸ Ni ŵalamwile kuti abatisidwe mu lina lya Yesu Klistu. Nipo ŵandu ŵamŵendile Petulo kuti atame nawo masiku gapanandi.