Masengo 1 - Chiyawo Bible

¹ Ŵakucimbicikwa Teofilo: M'buku jangu jandanda jila namlembele yosope yiŵatendaga Yesu* ni kuyijiganya ndaŵi jiŵatandite masengo gakwe

² ni mpaka lisiku liŵajigalidwe kwawula kwinani. Mwamacili ga Msimu Ŵaswela, ŵaliji aliŵasalile yakutenda ŵandumetume ŵakwe ŵele ŵiŵasagwile.

³ Kwa masiku makumi mcece panyuma pakuwulajidwa kwakwe, ŵalilosisye kakajinji mwakwasimicisya ŵanduwo kuti ali ŵacijumi. Ŵanduwo ŵam'weni Yesu, ni ŵaŵecete nawo ya Ucimwene wa Mlungu.*

⁴ Piŵaliji wosope pampepe, Yesu ŵalamulile kuti, “Mkatyoka mu Yelusalemu, nambo mjembecele mtuka wele Atati ŵangu ŵatite tacimpa, mpela munaŵecetele mula.

⁵ Pajatu Yohane* ŵabatisyaga ni mesi nambo mkanigapite masiku gamajinji, jemanja timcibatisidwa ni Msimu Ŵaswela.”

Yesu ajigalidwe kwawula kwinani

⁶ Ndaŵi jelejo ŵandumetume ŵala ŵaliji wosope pampepe ni Yesu, ni ŵamwusisye jwalakwejo kuti, “Ambuje, ana sambano jino ni ndaŵi jakuti awucisye Ucimwene kwa Aisalaeli?”

⁷ Yesu ŵajanjile kuti, “Nganigaŵa masengo genu kuti m'manyilile ndaŵi jele Atati ŵangu jiŵaŵicile cilepe mwamacili gawo.

⁸ Nambo timcipocela macili, Msimu Ŵaswela uli wumyicile pa jemanja, pelepo timcindendela umboni ku Yelusalemu, ku Yudeya ni ku Samaliya kosope, mpaka kumbesi kwa cilambo.”

⁹ Piŵaŵecete yeleyi, Yesu ŵajigalidwe kwawula kwinani, jemanjajo alimkulola. Nipo liwunde lyamwunicile ni nganawoneka soni.

¹⁰ Ŵandumetume ŵala piŵaliji mkulolecesya kwinani, Yesu ali mkwawula, mwacisisimucisya ŵandu ŵaŵili ŵawale yeswela ŵajimi pambali pawo

¹¹ ni ŵatite, “Jemanja ŵandu ŵa ku Galileya, ana ligongo cici mgambile kwima ni kulolecesyaga kwinani? Yesuju jwajigalidwe kwawula kwinani kutyocela pasikati penu, taciyika soni mpela yimkuti pakumwonamu pakwawula kwinani.”

Jwakwinjila m'malo mwa Yudasi

¹² Pelepo ŵandumetume ŵala ŵawujile ku Yelusalemu kutyocela Kwitumbi lya Olifi.* Mkuli wakwe wakwana kilomita jimo kutyocela ku Yelusalemu.

¹³ Piŵajinjile mu msindamo, ŵakwesile kwawula ku cipinda ca mwinani mwele muŵaliji mkutama Petulo* ni Yohane, Yakobo* ni Andileya;* Filipi ni Tomasi,* Batolomeyo, Mateyu,* Yakobo (mwanace jwa Alifeyo), Simoni* Mselote, ni Yudasi mwanace jwa Yakobo.

¹⁴ Wosope ŵaliji ni mtima wakupopela pamo, pampepe ni acakongwe ŵane, ni Maliya mama ŵawo Yesu ni acalongo acimjakwe ŵa Yesu.

¹⁵ Gali gapite masiku gapanandi, Petulo ŵajimi pasikati pa ŵakulupililawo. (Ŵanduwo ŵaliji ŵakwana 120). Nipo Petulo ŵatite,

¹⁶ “Acalongo acimjangu, yikwenela kuti yitendekwe yele Malemba gaŵecete ya Yudasi. Pakupitila mwa Daudi,* Msimu Ŵaswela ŵaŵecete ya jwelejo juŵalongolele ŵandu ŵiŵapite kumkamula Yesu.

¹⁷ Yudasi ŵaliji jumo jwa likuga lyetu, nipo ŵasagulidwe kuti aŵe jwakutumicila pampepe ni uwe.”

¹⁸ Ŵasumile mgunda ni mbiya siŵapatile pakutenda yangalumbana yila. Kweleko Yudasi ŵagwile cakulosya mtwe wakwe pasi, ni ŵawulice lutumbo, matumbo gakwe gosope gakusucile pasi.

¹⁹ Yeleyi yapikanice kwa ŵandu wosope ŵakutama ku Yelusalemu, mwakuti mgundawo ŵaŵilanjidwaga m'ciŵeceto cawo kuti Akeledama, kugopolela kwakwe ni kuti “Mgunda wa miasi.”

²⁰ “Pakuti yilembedwe m'buku ja Masalimo kuti, ‘Nyumba jakwe jiŵe lisame akapagwa mundu jutatame mwelemo,’ yilembedwe soni kuti, ‘Jwine ajigale masengo gakwe.’

²¹ “Sambano pakusosekwa jwine aŵe pampepe ni uwe kuti aŵe mboni jakuti Ambuje Yesu ŵajimwice ku ŵawe.

²² Akwenela kuti aŵe jumo jwa ŵandu ŵele ŵiŵaliji mwikuga lyetu ndaŵi josope jele Ambuje ŵaliji mkwenda ni uwe, kutandila ndaŵi jiŵalalicile Yohane ya ngani sya ubatiso mpaka kwika pa lisiku lyele liŵajigalidwe Yesu kutyocela kwetuwe kwawula kwinani.”

²³ Pelepo ŵakolasile mena gaŵili; Yosefe ŵiŵaŵilanjidwaga Balasabasi (lina lyakwe ni Yusito), ni Matiyasi.*

²⁴ Ni ŵapopesile kuti, “Ambuje, ŵalakwe akumanyilila nganisyo sya jwalijose, sambano atulosye mwa ŵaŵiliŵa ŵele ŵaŵasagwile ŵalakwe

²⁵ kuti apocele masengo aga ga undumetume, m'malo mwa Yudasi ŵele ŵiŵalesile, kwawula ku malo gagamjenele.”

²⁶ Nipo ŵalondwele cisango pa ŵaŵiliwo, Matiyasi ni ŵiŵasagulidwe, ŵele sambano ŵaliji ŵakonjecesya mu likuga lya ŵandumetume likumi ni jumo.