Masalimo 99 - Chiyawo Bible

Mlungu mwenye jwamkulungwa mnope

¹ AMBUJE* ali mwenye; mitundu ja ŵandu jitetemele. Jwalakwe akutama pa akelubi mpela citengu cakwe ca ucimwene, cilambo capasi citenganyice.

² AMBUJE ali jwamkulungwa ku Siyoni;* ali penani pa mitundu josope ja ŵandu.

³ Wosope alilumbe lina lyakwe lyalikulungwa ni lyakogoya; jwalakwe ali Jwamswela.

⁴ Ŵalakwe mwenye jwamacili, ŵakunonyelwa ni kulamula kwambone, ajiŵisile ndamo jangali lusagu, ni kulamula kwagoloka mcilambo ca Yakobo.*

⁵ Mwalumbe AMBUJE Mlungu jwetu, mumpopele AMBUJE ku citengu cakwe ca ucimwene. Jwalakwe ali jwamswela.

⁶ Mose* ni Aloni* ŵaliji ŵakutaga mbopesi ŵakwe nombe Samuele ŵaliji jumo jwa ŵandu ŵele ŵiŵalikolangaga lina lya AMBUJE mwakupopela. Ŵamlililaga AMBUJE ni jwalakwe ŵajangaga.

⁷ Ŵaŵecetaga nawo jemanjajo mu cipilala ca liwunde lyacimile njoo. Jemanjajo ŵasunjile yilanga ni malamusi giŵapele.

⁸ AMBUJE Mlungu jwetu, ŵalakwe ŵajangaga jemanjajo; ŵalakwe ŵaliji mkwakululucila, nambo soni ŵaliji mkupocela cilango ligongo lya yitendo yawo yakusakala.

⁹ Mwalumbe AMBUJE Mlungu jwetu, mwalumbe kwitumbi lyawo lyaliswela. AMBUJE Mlungu jwetu ali jwamswela.